網頁

2013年10月31日 星期四

Hello 十一月

十一月終於有大假。大假的定義係起碼放十日,我由11號放到26號,老公都係咁上下。心情應該好似放緊產徦咁,無憂無慮,可以全天候廿四小時陪住個仔。


因為瞕瞕而家仲細,所以我同老公唔打算丟低佢自己去旅行。目前我地plan左既節目有:去香港,去迪士尼,返鄉下探親,大賽車,美食節,去飲,去生日會等等。其實都夠啦。。。係咪?


這個月瞕瞕半歲了,正在發展緊社交情感,開始有少少懂事,覺得佢愈來愈好玩。



2013年10月30日 星期三

好物推薦 - 韓國電動嬰兒指甲機

本來只係想買枝指甲銼,睇下睇下買左部磨指甲機返黎。




瞕瞕出世時頭仔只有我半隻手掌那麼大,手指就更加小了,尾指指甲直頭得一粒米那般小。但他的指甲卻極之銳利,好像鳳爪咁。




因為唔識點剪瞕瞕的迷你指甲仔,唯有俾佢戴住手套。99仲笑稱佢戴住拳套添,個post又真係幾似打拳喎,係咪好型呢?




但當時正值炎熱夏天,瞕瞕成日出汗,焗到手指罅紅晒。加上保健時醫生話bb唔應該長戴手套,皆因佢地需要用小手來探索外面的世界,不可阻擋佢地既本能發展。醫生叫我地無論如何都要幫佢剪指甲,仲要三,四日剪一次。


第一次由99操刀,但一來老眼昏花,二來的確難剪,搞到剪親肉,流左幾滴殷紅的血。。。心痛死><


99都驚左,所以剪指甲任務又交返俾我。由於有先前的流血事件,我都唔敢剪太貼,剪完好似無剪過咁-__-" 間唔中又見到瞕瞕塊面有條傷痕。唉,人地刀疤強,你就刀疤瞕。





而隨住佢抓握東西的能力愈強,而家搣人好痛。最後我都忍唔住買左呢部韓國電動嬰兒指甲機。貴就貴左少少,官網賣35蚊美金,我搵淘寶代購,也要人民幣250幾蚊。





部野有咩好?輕巧,方便,最重要係安全。趁瞕瞕一訓左,我就靜靜地磨短佢的指甲仔,讓佢的小臉不再怕傷痕累累。試用過後心裡的感覺是非常後悔,後悔買得太遲。


指甲機的外型討好,容易揸手。指甲磨片係糖果色,好得意,共有四片可更換,粉紅-0至3個月,天藍-3至6個月,靑綠-6至12個月,鮮橙-12月個月以上。





使用方法就係開機,力度有兩檔選擇:靜d同慢d vs 快d同大聲dd。瞕瞕咁醒訓,但部機從來都無嘈醒過佢。




不得不提的是,它的安全系統設計得很精巧。磨指甲時見到粉末飛散,但一碰到肉時會立即停下來,十個讚。完全不用擔心會整親咁細個bb。其實就算bb唔乖,日間磨都沒問題的。





呢度有段教學片添:

2013年10月29日 星期二

食長頸鹿

暑假戈陣,我同老公出走香港的bb展,搜刮到兩件寶物,NUK奶嘴和長頸鹿牙膠。


此長頸鹿並非大家都熟悉的Sophie, 而是另一隻韓國牌子,標榜有天然乳膠味,好吸引bb咁話。我估食開乳膠奶咀的瞕瞕,應該會鍾意掛。




接近出牙階段,拿返出來讓他嚐嚐。一如我所愿,瞕瞕超鍾意。只要一有鹿鹿在手,就啜個不停。


我亦突然明白,點解一舊牙膠要設計到長頸鹿的形狀,因為好揸手d(試想像如果設計到企鵝形狀點揸手?)見到瞕暲食長頸鹿個樣好搞笑,佢隻手仔鍊實長頸鹿條頸,便急不及待將它往嘴裡送,有時個位未對準,佢只會吃到鹿鹿的耳仔,一旦對準便狂趙它的頭,食到jup jup聲。






而呢幾日瞕瞕又學識左個新動作,就係不論甚麼東東在手上,都會仔細研究和把玩一番,包括隻長頸鹿。佢發現原來鹿鹿是可以反轉的,便開始咬它的腳腳,咬完一隻再到另一隻。自此他便樂此不疲地將隻鹿鹿翻來覆去,咬下呢度,又咬下戈度。











其實瞕瞕而家已經全部中哂以下個表既徵兆,但暫時仲未見有任何牙仔,唔知幾時至會出呢?




追奶追追追

自從復工以來,奶量一直有減無增,加上上星期月經返黎,更一度跌至零奶量。 


有見及此,我便拎住500蚊quota的醫療卷,去公司附近睇鄭其昌醫生,順便從中醫角度調理下產後既身子。


中醫有一樣好特別既野,就係夾唔夾。曾經纏擾我兩年的濕疹,我喺佢度飲左兩個星期藥就好晒,所以今次都想搵返佢。


鄭醫生戈度既藥方全部都係沖劑,優點是極度方便,缺點係藥力稍遜(人地講,我唔知,因為我無得比較)。


是次藥方如下:益母草,甘草,黨參,菟絲子,白朮,熟地黃,女貞子,茯苓,繼斷,山藥,蓮子,墨旱蓮,制何首烏,共十三種藥材,一日一劑,幸而味道不算難飲。





我既心愿係餵到六個月,仲爭少少就達到了,讓我盡最後一分努力。

2013年10月28日 星期一

一次過學識三個動作

瞕瞕每大一個月,我便會搜查有關嬰兒發展軌跡既資料,睇下佢黎緊呢個月應該學識甚麼動作,達唔達標。其實佢每次識多一樣野,我地全家人都會高興萬分,為佢興奮一陣子。


五,六個月大的嬰兒,協調能力逐漸提升,好明顯識多左呢幾樣野:


- 小手能主動地抓握距離物件


- 能夠兩手互傳,將玩具由左手交到右手,又由右手交到左手


- 丟東西。這是嬰兒發展 "因果關係" 的首輪概念,佢地會將手上的東西丟開,發現它消失在眼前,同時還體驗到地心吸力的作用,因此會樂此不疲地嘗試


而瞕瞕剛踏入五個月的時候,佢只係識渣住我地遞俾佢既野,佢隻手仔掂到野便會自然打開,再屈曲手指渣實。有時佢又會用兩隻手一齊渣住,例如波波,牙膠。


睇住佢渣住d野玩緊,我0係度諗,點解佢仲未識以上戈三個動作既?


但佢有日突然學識左,而且係同一時間學識晒。原來嬰兒識做新動作總是這樣意想不到,在錄片時我無諗過佢會咁做,真令我感到有點驚訝。


佢坐在搖搖椅上,手仔撥下撥下摸到放在椅邊的獅子花花(不是刻意放在那裡的,是上次玩完遺留在那),佢用左手拿起來,看了一眼便交到右手,再用瞬雷不及掩耳的速度,一丟就丟開了,丟得都有一點距離。


去片:



2013年10月25日 星期五

瞕瞕的第一本書

在我小時候,布書是珍稀品。到了我孩子的這一代,要為他挑一本布書,從bb實體店到網上淘寶,那款式多到呀。。。我真的看了三天三夜也沒看完。


但我不想一下子買那麼多本,說不定他一下子就改成看紙版書,或者玩其他玩具了,所以我打算買住一本先,因此想盡量找來一本內容包羅萬有的。


找了很久,終於睇中左一本。首先,我要求書要夠大本,唔係那些手掌書細細本;封面和封底有沙沙聲的响紙;色彩鮮艷,能下水洗不褪色;有安全鏡;有觸感材質(例如棉花球做兔仔尾巴,流蘇做獅子尾巴那種);會教ABC,顏色,數字, 形狀,還有故事性。


其實我係咪要求多多,甚至有點貪心?


這一本書可說是完全符合了我的要求,雖則貴是貴了一點,差不多人民幣一百元,不過收到實物時有點喜出望外。



官網對這本書的介紹極之詳盡,我也樂意在這裡分享一下。


果然好大好大一本,仲大本過瞕瞕塊臉,五顏六色的確幾吸引他,好像有一種磁力,個衰仔又睇得幾認真喎,哈哈。他奮力地拍打本書頭尾戈兩頁,發出沙沙聲响令他興奮到大叫。











原來隨書附有一個可以拆卸的搖鈴,也幸虧這個搖鈴是可以拆出來的,因為99超驚整壞佢部洗衣機。瞕瞕好鍾意這個玩意,他同時用小手和嘴巴 去探索。咩黎架?咁硬既!







本書有一樣野幾特別,其他布書好難搵到的,第一,二頁是黑白和幾何圖案,聽說能刺激初生bb的視覺神經發展。瞕瞕最初接觸這本書的時候剛滿月,他緊緊地盯著這頁,動也不動。




第三,四頁是彩色圖案和齒輪,瞕瞕有排都未識轉,跳過先。




第五,六頁是認識形狀,第時要俾心機d教佢,幼稚園k1必考。




第七,八頁相對複雜,關於事物的相反概念,長vs短,大vs小,多vs少,日vs夜。




第九,十頁有塊鏡仔,瞕瞕最鍾意,佢望住鏡裡面的自己望到入晒迷,如果我同時出現在鏡裡,佢會以為見到我, 跟住瞇瞇笑。這一頁還有數字和水果。





第十一,十二頁教人體器官,眼耳口鼻戈d,等我都要晒張全家幅出來放入個透明套度先,順便教佢認下相入面既爸爸媽媽。



第十三,十四頁教人物表情,如開心,喊,驚等。




第十五,十六頁數蝌蚪,1至10,蝌蚪脫變成青蛙,青蛙是蝌蚪的媽媽。瞕瞕都會長大大,誰是瞕瞕的媽媽?至於個謎宮,我估至快都要到兩三歲先識玩。




第十七,十八頁是農場動物,每種動物身上都有不同材質的軟毛,我成日都會捉住瞕瞕的手指仔,俾佢摸下,訓練下佢的感知能力。我曾經在圖書館見過一個約莫只有兩歲的小朋友,非常專注地用手指刮著公仔書的毛毛。 人類手指的指紋位置,有著極其敏感的神經細胞,比起身體其他部位多一千萬倍。每摸一次便會認識一種新感覺,多d刺激會聰明d架。




第十九,二十頁係唔同的交通工具,火車在軌道上奔馳,飛機在天空上飛,輪船在大海中行駛。仲有紅綠燈,斑馬線,又係點用架呢?




最後兩頁帶有故事性,可以說說草地上的昆虫和溪邊的小動物做了好朋友,還有天氣狀況,等等。




係咪好多野睇呢?唯一不足之處是簡體字,但到認字年紀的時候,我當然會買另外的書給瞕瞕。理論上可以由零歲睇到三歲,最後我覺得算抵買。




2013年10月24日 星期四

證件相第二round

咁啱見到肚b媽post d 靚靚證件相出黎,令我驚覺起聽日到期幫瞕瞕拎回鄉證。


為左申請回鄉證,我特登帶瞕瞕去影左第二次證件相。因為我覺得第一次影得唔靚,成個地中海伯伯咁。





今次瞕瞕個樣好正經,表情好嚴肅,同以前戈張比較,事隔三個月,明顯大個仔左。




不過費用就貴咯,影+晒=60蚊,得戈半打,咪即係成十蚊張!!


而且一哂完就用左五張,剩返一張喺屋企。


有日無無聊聊地上淘寶,發現有間公司幫人晒證件相,1蚊半有6張寸半,或者9張1寸,或者4張2寸,真係好平好平,平得好緊要。


於是我將消息告知妹妹,問下佢有無興趣一齊哂,反正郵費又係要咁多。但佢話未駛住,叫我試下晒少少睇下質量如何先喎。


咁我就將我同老公的證件相相底send過去,用15蚊哂左62張相返黎。不論係客服態度,物流速度,最重要係相片質量超級好!


第時瞕瞕報托兒所,考幼稚園都需要大量相片。但而家瞕瞕仲細,個樣不斷變,等佢大個小小,先幫佢影多次,再哂返十打八打回來,嘻嘻。


如有需要可問我拿link。

2013年10月23日 星期三

認人爆喊

幾個月大的bb腦部尚未發育成熟,但已經有自己的情緒。不過他們的思想是單純的,所以表達情緒的方式是直接的。


我的意思是,如果他見到喜歡的那個人,會高興得手舞足蹈,反之就。。。我們從瞕瞕的反應,很容易知道佢諗乜。


相處了五個月,瞕瞕認得我和爸爸和嫲嫲是正常的,那亦是我們感到心甜的時刻。當然他也認得奶樽,認得屋企。


而在最近,我們發現瞕瞕動不動就喊,原來佢開始認生了。陌生人聊佢都會笑下,俾少少面,但抱佢就唔得。佢會扁嘴,繼而爆喊,仲要喊好耐先平息。


因為咁樣會搞到人地有點兒尷尬,老人家就會叫你多d帶bb出去見人,等佢無咁怕"生保"。


通常我地個個星期六日都有家族飯局,我地唔單止帶埋瞕瞕出去,仲會俾其他人輪流抱添。對眾人黎講,瞕瞕每次出現都長大了一點,變左樣(我日日見住唔係好覺),於是便好奇地包圍佢。。。包到父母都被摒離在他的視線範圍以外。


抱住瞕瞕的是表姑媽,你睇佢個樣幾驚,佢既眼神在發出求救訊號:媽咪!唔好俾人拐走我。





影完呢張相之後,瞕瞕再忍唔住,爆喊喊喊喊喊,好大滴眼淚,淚流成河咁流哂入耳仔裡面。


老公見狀便接手抱返瞕瞕,隻喊包仔在爸爸懷抱中仍顯得猶有餘悸,狂啜手指自我安慰返弱小心靈。





親戚都好體諒,話bb認人係一種本能,再大個少少自然又唔怕的了。唯望到時考入學試千祈唔好咁呀。


各位blog媽,你地既bb認人情況又係點架?點樣開導佢唔好咁驚人呢?