終於輪到山頂的物理治療

八月份的時候，覺得瞕瞕條頸有d唔妥，帶佢睇醫生，先知係＂先天性斜頸＂。

當時鏡湖同山頂都有一齊睇，兩邊既醫生都話要做物理治療。不過鏡湖係私人醫院，自己俾錢，所以好快在一個星期後已排到，並且在十月已經完成療程。

至於山頂，則在鏡湖宣佈close file的一刻，依然未有聲氣。好在我地有先見之明帶瞕瞕去鏡湖咋，因為依個症唔拖得，唔可以錯過黃金治療期。

終於在不久前的十一月中，山頂通知我地有位，open file。雖然排左足足三個月，但比我想像中快左好多好多了！我心目中要排半年左右的。

其實瞕瞕算好返哂，但我都決定帶佢睇下，當係檢查都好，仲諗住即時pass，第一次就close file添！結果。。。沒有我諗得咁簡單。

放心，唔係話瞕瞕有咩事。而係經過與治療師會晤，了解到原來安排左要做十次物理治療，要全部做完哂之後，治療師會寫份報告交俾醫生，再由醫生跟進。所以亦唔係治療師覺得有無需要做，決定權並不在治療師。

治療時間係每星期四早上九點，每次做一個鐘，中途不能缺席，即使病左，都要交返張醫生紙，請假一堂，戈堂會順延至下個星期四。佢地非常有系統而認真，令我明白如果唔follow佢地，就會被black list.

治療師叫Janet，是一位十分年輕的姑娘，應該剛畢業不久。第一堂主要係觀察下瞕瞕的整體情況，佢話瞕瞕條頸活動大致良好，只係爭少少野，就係當瞕瞕平臥時，佢轉右塊面仔可以完全貼住張地墊，但轉左卻留一隻手指罅既位，即係話，向左約有十度未轉得晒，條筋緊緊地，click住左。  

另外瞕瞕有大細面既問題（斜頸徵狀之一）。好明顯佢左眼細d，左眉低d，左邊嘴角戚d，未知是否真的跟肌肉協調有關。。。繼續做物理治療治療，希望幫到佢啦，唔好再有事嚇媽咪。

PS. 兩個月幾大時斜頸非常嚴重

經鏡湖治療後條頸正返，不過山頂話爭少少，大細面。

淘寶廿九蚊冬天bb衫實拍

有時會留意下淘寶有d咩熱銷產品，通常都好抵。之前小試牛刀買左件冬天bb衫，因為見個款幾靚，好評過千，廿九蚊仲包郵，真係抵到爛。

近日天氣漸凍，終於可以攞返出黎俾瞕瞕著。OK喎，件衫係毛絨質料，非常之厚和溫暖。如果bb已經識行仲加得意，好似個model咁得意。不過其實我都買大左，買左歲半至兩歲的size，即係話，瞕瞕明年有機會仲啱著。

件衫有好多其他色添，可能遲d我會再買件藍色，畢竟真係唔錯，值得推薦。

PS. 衰仔而家識遮住塊面唔比我影

推bb車出街，心慌慌

久違了的bb車出動，不過而家推bb車出街真係要好小心，最近的新聞搞到人心惶惶。

雖然話被拐b女個阿媽本身背景複雜，被警方鎖定為懷疑目標，改變了遁查方向。但上海戈單呢？另一個四個月大男嬰，竟然在家人開既食店內，俾拐子佬抱走左。咁都落到手，好得人驚。

想像不到這種等待奇蹟出現（被尋回）的人生，會是如何渡過。。。bb咁細個，佢食開咩奶粉，點湊法，外人會知咩？佢地會點對待bb？加上而家天氣愈來愈凍。。。唉，諗一諗都覺得係切膚之痛。

記得瞕瞕好細個戈陣，大概只有三個月大吧！我已復工了，99幫我在返工時照顧瞕瞕。有日99想倒垃圾，其實一出屋企門口打開垃圾房就係，一般我地都貪方便，唔會關自家度鐵閘。而當時99拿住袋大垃圾，走到門口，回頭望一眼訓在搖搖搖椅上的乖孫，又覺得放心不下，都係拿鎖匙關鐵閘先行開，整個過程都係十幾秒。

99話時間雖短，但佢突然諗到，而且好驚有人會趁機抱走佢粒孫。佢講返我知戈陣，我仲哈哈大笑，話澳門治安咁好，我地又住高樓大廈，都唔會有外人行過我地門口，加上體驗過先知，湊仔原來好辛苦架，邊個會咁無聊抱走瞕瞕呀，佢咁煩，送俾人都無人要啦。。。

勢估唔到，今時今日回想起這件事，原來99既謹慎係必須架！自己個小朋友係身上掉下來的一塊肉，千萬要睇緊d，萬一出事已經永遠都返唔到轉頭。

在地上玩耍

嬰兒教養指南話，六個月大之後就要放在地上玩，而不要再佝限在bb床或大人床上，讓他有足夠的空間去爬，去翻滾。所以近日同老公去bb店買左set地墊回來。

其實淘寶會係一個唔錯既選擇，我睇過款式非常非常多，價錢十分便宜，平均5蚊一塊左右。但因為要買好多塊，而我地現時唔方便出大陸，而要搵代收，驚在運費上蝕章，加上考慮到塑膠產品應以安全為重，最後都是決定在bb店買算了。

我地覺得面包超人地墊幾好，可惜店裡只有兩set, 得18塊，如果能夠買多兩set就perfect了。用住先，等佢地返貨，或者有時間再去其他bb店睇下啦。

有毛有翼，曉飛了~

但究竟幾時至識爬呢？

地墊啟用戈日，晴天，見客廳個光線幾好，趁機攞返部大機出黎，幫瞕瞕影返d靚相先。

米糊餵養紀錄

6個月大保健資料：7.8kg重，68cm身高，頭圍48cm長，啱啱好在中位生長線上，即50%。

其實瞕瞕根本極度厭奶，一日飲得10安奶，甚至沒有。但好在佢能夠以米糊當做正餐，生長線先至唔怕跌咋。

由於我係德國產品的fans, 所以用左NUK的奶樽，焓奶樽機，能恩奶粉，自然地米糊都食返雀巢牌子。

從同期媽媽的blog得知，佢地個個都餵緊米糊，咁我都分享下這方面的經驗。

我睇左雀巢營養天地戈本小冊子，介紹佢地的初階米糊（藍罐原味），可以在bb四個月大就開始俾佢試下。加上我地之前在bb展拿左超多sample（二十幾包），更加要試下。

根據醫生的講法，bb識識地坐同埋識吞野就試得。瞕瞕吞野一向好叻，事關兩個幾月時，見佢食輪狀病毒食到一滴不剩，仲俾姑娘讚。 

最初只係一兩匙，佢食到舐舐利，一星期內已變左一小碗，跟住又再換左隻大碗。佢好鍾意好鍾意食。

原來雀巢有好多隻米糊，頭先講戈隻藍罐原味，係初生米糊，適宜4至6個月食用。而bb滿6個月識厭倦原有味道，所以雀巢為呢個階段既bb設計左蘋果味和胡蘿蔔味。8個月又有蔬菜味和蕃茄味。12個月則是集合多種殼物的口味。生產商考慮得咁周全，我會繼續幫襯佢。

米糊同傳統粥仔的分別係方便，而且鈣質含量係後者的幾倍，仲添加左益生菌，增進腸道健康。當然我唔係信哂廣告商，而家我地都等待緊合適既機會，粥仔同米糊輪流一齊餵。  

我地既調配方法係6匙米糊+2匙奶粉+適量的水，一日兩餐。所以雖然40蚊一罐好平，但一個星期就食晒一罐了。我地都有d存貨，同埋鍾意它特有的罐裝（其他牌子都是紙盒裝），應該都不會考慮其他牌子了。

瞕瞕好識得睇人眉頭眼額，我記得第一次餵佢飲藍色熊仔維他命水時，因為我聞到味道唔係幾好，便不自覺地皺起眉，估唔到俾瞕瞕見到，佢又學我皺眉，仲死都唔肯開口添，收尾氹氹下先肯飲咋。

餵佢食米糊的時候，我不斷話好味道，又讃佢叻仔，佢食得好開心。轉眼間15分鐘就食哂一碗了。

某位親戚下落不明

人奶餵左五個月月經返黎，但之後又無左下文。。。

係咁既，我餵到五個月既時候，有一日月經突然返左黎，情況好正常。

而家瞕瞕六個零月，今個月無月經，遲左半個月都未見蹤影，未生之前我好準時的。其實我有用大衛同秀兒check返排卵，如果check到有排卵第十四日應該有月經，但我就係一直唔見有紅線，結果真係無月經。

為何我會如此這麼在意？並非我急住生第二個，而事實上，現階段我亦未有這個念頭。只係因為上次毫無預警，搞到一床都係，要執手尾。。。

唔知係咪同我繼續餵人奶有關，而抑制左排卵？我想知道既係，生完之後最初幾次月經係咪都唔準的，要隔多一排先準返？你地既情況又係點架？thanks!

迪士尼遊蹤。六個月大。下集

唔知係咪瞕瞕亦感受到旅途既疲倦，佢比平時遲左訓醒，就連爸爸媽媽已起身，梳洗完畢，執好晒d野，佢都依然在睡夢中。

難得一次黎到迪士尼，決定試埋佢既早餐，book房時唔包的，價值150HKD一位，真的很貴。其實個早餐都唔錯既，只不過相比尋晩晩餐既驚喜相比，就無咁特別囉。

為左等瞕瞕起身，我地九點半先出發去餐廳，好在都有位坐。瞕瞕識自己挨住梳化椅，可能仲未訓夠，個樣有d on居居咁。

d米奇頭鬆餅涷冰冰的，都唔係傳說中咁好食既。我地見有d白粥，想俾瞕瞕試下，但可能佢平時食米糊係甜，粥仔係無味，所以佢個樣好唔enjoy.

門口有米奇廚師同我地合照。

食完早餐見離check out仲有d時間，便在酒店範圍既公園行下，落腳架影下一家三口合照。

好多相都係返屋企之後，開電腦睇返，先至發覺人像咁細粒，呢d就係老公既攝影風格。。。汗

這天又落雨又凍，加上係星期三，攝於上午11時在迪士尼閘口，現場所見無乜人流。我地玩左古董火車，小小世界和森林河流之旅，全部都唔駛排隊，簡直難以置信。但我知平時一定爆多人，因為設置左好多欄架，應該係用來維持排隊秩序的。

雖然只係11月，但園內已整哂聖誕裝飾了。睇下12月有無機會再黎hk，我想睇下聖誕燈飾。

相信瞕瞕應該係全場最細的人仔，但佢一d都唔怕醜，係咁同人打招呼同笑笑，如果你再大個仔d都係咁就好了。

咁細個就學人搭火車，不過短短8分鐘既車程卻訓著左。

未試過真係唔知瞕瞕既底線去到邊度，開頭搭船都好地地，打直抱佢仲興奮地彈彈下。但去到一個位，見到水底有隻醜陋鱷魚浮上水面，張大嘴巴，眼珠骨碌骨碌咁轉，瞕瞕當堂扁嘴。再去到另一個位，有幾陣人造瀑布效果，故意令船隻搖晃不穩，同時火山又噴火又噴煙，瞕瞕狀甚驚恐，繼而喪喊，喊到落船仲喊緊，眼角掛住粒淚珠，猶有餘猶悸的樣子。

我地唔係刻意嚇瞕瞕的，事關佢上個月仲未識架，係最近先至有＂驚＂呢個概念。同認人既原理一樣，佢發展緊認知能力，再唔係往日既一舊飯。

必須一提的是，全程都係由我同老公輪流揹住，有人話過我地唔推bb車去實會死，但一來我地覺得要衝地鐵唔方便，已經要拖住一個gip了，二來瞕瞕唔肯坐，三來若真的有需要都可以在迪士尼租返架，不過到最後都無用。

總結整個旅程都沒有想像中的辛苦，其實揹住瞕瞕同我地的互動會多好多，可以即時見到佢既表情變化，可以同佢溝通，解釋佢知乜野係乜野。

一家人出遊的經歷是如此難忘，即使只係一，兩日的香港之旅都很開心滿足的了。