網頁

2013年12月30日 星期一

準時出牙仔

回想起今年年頭,挺著個不大的肚子照結構,時光竟一下子晃到年尾了。這是我人生經歷得最多的一年,因為我終於生左個仔。老公講過,我們是永遠都不會知道父母有多愛我們,除非等我們自己都有了仔女,怎麼現在每次一想起這句話,就會感到鼻酸的呢。


還記得照結構的時候,鬼佬醫生(Martins)同兩個實習醫生解釋,話我肚裡面個bb既姿勢,直頭同教科書一模一樣,各項指標也是標準中的標準,是難得的、現成的好教材,於是兩個醫生仔趁機好好學習,禮貌詢問了我之後便落手認真地照我個肚。


知道自己個bb咁健康,有什麼比這更重要!那一刻我是極其安慰的。 


瞕瞕出世至今,一直處於生長線的50位置,誠如當初醫生所預言,這個bb是標準中的標準。及後佢每樣發展,都係跟住育嬰書前進。所以有時我睇d書話bb幾個月大會點樣點樣,一到戈個月,瞕瞕真的會咁樣咁樣。


其中有一樣野,就係出牙仔。書話bb約在六個月大,開始出右下第一隻門牙。五個幾月時我地見乜都未有,期間99成日問點解無出牙,仲話駛唔駛帶佢睇醫生開d鈣水,我又覺得無咁既必要,早少少遲少少應該都唔會有問題,聽同事講佢個女一歲四個月先出第一隻牙,咪又係咁精靈可愛。不過後來瞕瞕上山頂做第一次物理治療時,被細心的治療師發現原來牙肉上已出左一角白色,果時瞕瞕啱啱好六個月大。


跟住隻牙仔愈生愈快,滿七月大又出左第二隻。


試過好多次想影低瞕瞕第一隻乳牙,但實在很有難度,呢幾張算係影得較為清楚的了。











2013年12月26日 星期四

平安夜自助晚餐小風波

去年的12月24日,我同老公在英皇撐枱腳慶祝佳節,當晩仲係我第一次feel到胎動,肚裡面的bb似在告訴我一切平安,那種感動與幸福真的無以復加。。。


今年的同一時間, 小生命已經變成左一個實實在在的人仔,我地一家四口,三代同堂決定外出好好地食返餐,順便感受下聖誕氣氛。由於老公指定要book新馬路的餐廳,本來心目中首選MGM,新葡京,可是早在一個月之前爆哂lu,退而求其次揀左新麗華酒店。


落訂之際講好左要留窗口位,因為那邊可以望到璀璨街景。晚餐時間為6點半到9點半,我地準時6點半就到達,但知客姐姐卻將我們帶領到另一間房的盡頭,俾左張臨時加開的枱我地。那邊的空氣較為焗促,喇叭音量又大,令瞕瞕非常扭計。


這一切與當初想像完全不乎,我們即時反映了情況,無奈知客姐姐話因為fully booked,每張枱都有自己的編號,是不能更改的。雖然這令我們大惑不解,但亦明白有d野唔係guaranteed,又唔想影響到食飯興致,只好將就下了。


開餐前影下相先。瞕瞕見張枱上面有玩具,立即非拿不可。我地便幫佢戴左頂皇冠紙帽,塞左個哨子俾佢,仲有個卜卜槌,卜左兩野佢睇,佢卡卡笑,之後就識自己揸住卜,卜下枱面,仲識卜老豆阿媽。。。-_-








食食下有聖誕老人過黎派禮物,矣,乜依個聖誕老人咁似爸爸既?唔通係爸爸扮聖誕老人氹我開心?講真佢同老公竟有幾分相似,唔怪得瞕瞕係咁睥住佢。




7點半,突然手機響,原來係新麗華酒店打黎,意想不到這的是,佢地竟然問我地幾點先會到,因為留左窗邊戈張枱俾我地,但咁耐都唔見有人到。


呢個電話令我地十分不滿,咁即係點??咪即係個知客姐姐根本無check清楚,就將我地當左walk-in客處理囉。


呢一餐真係食得非常之遺憾,不過在結帳離開後,回程中見到美麗的燈飾令瞕瞕好興奮,紮紮跳四圍望,總之個仔開心即係我地開心,情緒都平靜下來。




半夜瞕瞕喊醒我,我氹佢訓返自己卻訓唔返,便趁機寫左封電郵俾酒店。


神速地,中午已收到酒店經理的回覆,在佢地理解左事件經過後,便找到相關職員直斥其非,又解釋說該職員是新上任,經驗不足先會咁,佢地會加緊培訓,最後致以萬二分歉意,承諾同樣的事不會再次發生,如再次光顧,會打個折俾我地。


其實我地心中的氣都煙消雲散了,不過我諗短期內都無乜機會再食自助餐,甚至再到2014年聖誕節都無,因為到時未必唔駛返工。加上而家食自助餐愈黎愈貴,特別逢呢d大節日,收費往往推到一個很不合理的價位,重點仲要揍住隻不懂事的小b,食乜都係牛趙牡丹,這一次同成家人一齊試過就算了。







2013年12月24日 星期二

你隻衰豬丫。。。!

我同老公十二月中至年尾放緊大假的消息昭告天下後,幾乎日日被約出街,因為個個都想見下瞕瞕。咁佢而家呢個年紀又真係幾好玩,幾得意既。


公公婆婆一搞掂自己搬屋d野,就急不及待約我地出黎。不過瞕瞕依然認人,一過手就爆喊,而且喊聲如雷貫耳,嚇到公公婆婆唔敢抱你嘞。






咁啱姑婆一通電話打黎,知道我地飲緊茶,又趁機過黎聚下。一見面姑婆無即刻抱瞕瞕,而係塞左份禮物俾佢先。瞕瞕竟然俾份禮物吸引住,係咁摸係咁拍,唔記得左認人呢回事。其實瞕瞕見姑婆仲少過公公婆婆好多。。。好多。





哼,見姑婆你咁識do準備份禮物,我就俾面笑下啦。神奇的事發生了,姑婆抱咁耐,瞕瞕完全無喊過,連扁嘴都無。99在一旁都笑歪了嘴:好心你唔好咁現實啦!




得戈七個月大人仔,有無可能真係識呀?

2013年12月23日 星期一

bb應該自己訓

已有十多廿日無blog過了,事關呢期進行緊個大工程,就係sleep training。


主要內容有:1.戒夜奶  2.自行入睡  3.在bb床一覺訓天光。其實呢幾樣野,都係一種習慣黎,絕對係愈早進行愈好。而我礙於一些原因,才推遲到瞕瞕六個月大先進行,以下會慢慢解釋。


首先講戒夜奶,由於瞕瞕出生時生長線只有10,(即每100個初生嬰兒中,佢屬於體重最輕戈10個),所以醫生唔建議佢咁早戒夜奶,話佢想食就有得佢食,加上在旁的姑娘話咁細個戒夜奶好慘,到四、五個月先戒都唔遲。我都認同醫生姑娘既話,一心希望佢食多d,覺得追體重是最重要的。這樣。。。佢從10變成25,又變成50,增重成績頗為理想。


而我在放完產假復工後,日間99補奶粉令我奶量急跌,我好驚半夜再唔餵便無奶,二來亦慣左夜晚埋身餵住暗訓,好似無辦法戒到夜奶咁。不過這期間也實在經歷了太多次零奶量低潮,令我明白用人奶在晚上安撫入眠畢竟不是長遠之計。我必須在完全無奶之前,解決夜奶這個問題。雖然我可以用奶粉代替,但我卻不是很想這樣做,唔係因為我唔願意起身開奶,講真如果長期食夜奶是對bb有益的話,即使是半夜要餵三次,我都一定照做。可是事實並非如此,隨著bb日漸長大,作息有規律開始,夜間是應該讓腸胃休息,是真的不需要食奶的。


幸好我在戒夜奶方面也算順利,因為我發現到後來瞕瞕雖在半夜有尋乳反應,但他每次啜十零下又訓返著,我便知道他只是搵野啜而已,唔係真正肚餓。為此我用左NUK安撫奶嘴,這是一種特別奶嘴,仿乳頭設計,開頭佢都唔肯的,但試多幾次又肯,訣竅係一聽到佢低聲哭叫時,馬上塞住佢把口,半睡半醒之間佢根本唔識分真假。




戒夜奶同一覺訓天光有莫大關係,事關bb若果不需要食夜奶,就唔會有意識半夜三更醒幾廿次。聽過身邊有人無刻意幫bb戒夜奶,結果食到三歲。咁樣除左大人辛苦,小朋友無得休息,仲好易有蛀牙、哨牙問題,no good。


跟住分享下讓bb自行入睡的心得,即係唔駛暗訓,這可能係最難的一part,尤其是家中有老人家的,佢地似乎都會幫你抱訓,孭訓,就係唔相信bb識自己訓。我的家人也不例外,這件事之前都有在blog中提過。為何我這麼緊張自行入睡?因為正常黎講,一個五個月大的bb有15磅重,都幾重,再到一歲。。。兩歲戈時點算,好多手部病痛因此而來,我真的不忍心見家人如此辛苦,所以總是苦心婆心勸佢地俾瞕瞕自己訓。本來佢地都很堅持要孭要抱,但見到我以身作則,可以令瞕瞕自己乖乖地在床上睡著,便好奇地睇下我點樣做。


每當我留意到瞕瞕用小手揉眼睛,便知道他扭眼訓,便將他放在大床上。有時運氣好的話,一隻米奇公仔就能令他訓著,他特別喜愛玩弄老鼠的尾巴,可能要抓住細細長長的尾巴很花精神,他搞下搞下便訓著左。。。Zzz(媽媽偷笑)。他跟米奇兄弟的感情不錯,自從迪士尼帶回來後,便成了他的安撫玩偶,要一齊睡,醒來時還手牽著手。





通常我都係先讓瞕瞕在大床上訓著,再轉移到bb床。即使佢半夜醒來哭叫,我都唔會心軟將佢抱返大床,當然佢係唔制的,我曾用盡一切方法氹佢在bb床訓返,我個人不是太能接受由得他喊到訓返為止,我從嬰兒心理學入手,深諳他們極需要倚賴與安全感,原來只要我倚在bb床欄,讓他看到我微笑的臉孔,得知媽媽一直在身旁,他也會很快訓返,而且是含笑而睡,這樣就好多了,不會嘈到成屋企乃至成層樓醒哂,同時也給予了他安全與信賴感。



12月我攞左二十日大假,今天是我放大假的第七日,我幫瞕瞕進行的sleep training已經成功左,達到目標。好有成就感,見證左科學方法真係得,於是寫左呢篇blog去記低這段歷程。這是一個重要的里程碑,這使我日後在瞕瞕的教育上,也有信心繼續以科學方法取得成果。


2013年12月6日 星期五

聖誕party鬧情緒

小學的時候,我很是羨慕那些父母做公務員的同學仔,因為他們可以得到政府的聖誕津貼,開開心心地揀禮物。


雖然幾百蚊並唔係多,但咁耐以黎政府的津貼額一直無乜加過,所以在二十年前幾百蚊已算很多很多,夠買一整年的玩具,滿足哂小朋友的願望了。


而家都自己做左公務員,個仔可以享受這種待遇,我也很替他感到開心。不過瞕瞕仲細乜都未識,由我幫佢揀左同保管住先。


除左聖誕禮物,公司仲搞左個員工聖誕party,可以帶埋家屬去。由於老公要返工,得我單拖瞕瞕去,好在同事唔怕麻煩,車埋我地去。


對於個party,真係期待左好耐。記得舊年大住肚參加party,睇住同事們帶小朋友出席,現場一片歡樂的氣氛感染了我,我就覺得到時都一定會帶自己個bb去。


其實我都唔怕麻煩,雖然要帶好多野,bb車,媽咪袋。。。etc,而且亦預左湊住隻b無啖好食,但只要開心就行,話哂亦係第一次帶瞕瞕出黎見人。


可惜一切同想像中相差太遠,事與願違。瞕瞕可能怕生保,全程喊足兩個鐘。


係,一d都無誇張,就係唔停咁喊左兩個鐘,見人喊,有燈光喊,播音樂喊,司儀講野喊。期間用過所有方法都唔得,放bb車喊,抱住喊,孭住喊,餵奶喊,換片喊,就算帶住暫時離開會場,在外面行左個圈都喊。


佢要我走呀,返屋企,最後一上返車就完全唔喊。


喊喊喊喊喊,勁扭計,喊到眼腫同抽筋咁滯,雖未至於令我發癲(我EQ好姐),但也倍感受挫與無奈。


環看場內亦有同年紀既bb,但無一個會係咁既情況。例如車我黎既好同事,我地係同期生,佢個b女都係同瞕瞕差唔多大。人地就好乖,任抱唔嬲,仲笑添。我成日都讚佢d仔女好乖架,咁乖唔怕生多d啦,所以佢在三年間生左三個,哈哈。





而我一個已經夠了,講真的,認真的。




同事話,要耐心聆聽bb的哭聲,觀察其肢體動作,嘗試了解其哭鬧原因,從而給予適當安撫。但事實就係佢都有眼見,好難搞。佢認為瞕瞕超硬頸,超有脾氣,咁我都認同,每個細路本身性格都不同,可能天淵之別。


另一個同事就話佢個仔當年都係咁,仲話係聰明的表現。佢既看法係,哭鬧代表有要求,愈哭鬧代表要求愈高,他朝對自己也定必會有相應要求;對週遭環境抗拒,則是感官敏官的表現,將來觀察力強,感情細膩。。云云。佢既結論係,總之呢d都係聰明的表現,忍下啦。


我將此番說話轉告99,佢聽完後,感嘆了一番:但係難湊呢。


點都好,目前瞕瞕的確進入了一個頗難湊的時期,明顯有分離焦慮情緒。有時一見大人轉身就喊,甚至放低換片都喊,都幾得人驚。d書話大大下就好,希望這段時期快快過去。


本身仲幫瞕瞕著到好靚添,但佢都唔出得大場面。返到屋企仲要嬲霸霸,唔睬人。






2013年12月2日 星期一

母乳的尾聲 - 母乳皂

近期我又睇多次中醫,同醫生講我無奶。經佢把脈之後話無得救了,一來我月經已經返左黎,其實有返月經代表催乳素下降,好難追得返;二來bb都六個月大,本身就是離乳階段,所以亦唔建議我追奶。


其實我都認同佢既講法,即使唔捨得都好,事情總會有總結的一天,餵奶一事就順其自然吧!日後我亦可以將時間和心機放在其他親子活動上。


可以說餵人奶(特別是埋身餵),是我育兒以來,同瞕瞕最親密,最美好的一段時光。為此我亦找左間專門幫人整母乳皂的店,做返幾塊用以留念。


間店叫Mama Shop, 相約交收的地點在寰宇天下M記,我提供了120ml(4安)的冰奶。講真我覺得戈度好鬼遠,自己又唔熟路,揸車竟然揸左八個字。。。


我首選了這個側面女性頭像模具,也是我最喜愛的一塊。因為它看上去是一位慈母,散發著母愛的光輝。





當然成品唔止一塊咁多,我仲揀左雪人,生日蛋糕,正方形hand made等。當我拿著這些迷你的母乳皂,聞到香香的甜杏仁味,心想餵人奶餵到這個程度都心滿意足的了。