生長線
首先宣布一個好消息。21個月大的瞕瞕返衛生中心做保健時，被錄得體重11.6kg，身高86cm，頭圍48cm，整體生長線終於追到50%。對上一次生長線有50%，已經是一年前的事了，佢在9個月至19個月大期間，生長線一直在25%。
食
生長線突然上返去，我覺得同改變了副食有關。現在的瞕瞕牙齒出齊了，可以跟大人食一樣既飯和餸，唔再需要特登煮爛飯俾佢。開頭我仲擔心，唔知佢消唔消化到，但眼見佢胃口好左，便便情況也正常，又長左d肉肉。。。看來很快就可以跟我地一齊外出更多地方遊玩了。
訓
每晩踏正八點，瞕瞕就會自己走入房，訓上床，拉過張被子蓋在身上，再吩咐我開奶奶俾佢飲。但千祈唔好以為佢咁乖食完枝奶就訓，佢好多好多好多好多好多野講，起碼講返半個鐘，首先引吭高歌幾曲，逐漸地聲音愈來愈小，變成夢囈般，便知道佢睡著了。
大肌肉，粗動作
手可以舉高過肩拋出一個球。剛剛學識小步跑，但仲未跳得起，未能扶欄行樓梯，未識踩三輪車。
大概慢三個月左右，希望會後來居上吧。
小肌肉，精細動作
識擰蓋擠牙膏，這個動作成功了，瞕瞕開心到飛起。
無啦啦識拆開喉糖張糖紙，好在我眼見睇住，否則佢塞左入口點算。
我睇書知道疊得起5粒積木便算合格，想不到瞕瞕小心翼翼地一直疊一直疊，最終疊得起8粒。謝謝你用行動告訴我，做人應該不斷挑戰自己。
這套積木的原型是六面拼圖。瞕瞕未有耐識玩，而家都係用來玩住疊疊樂先。
認知
對橙色情有獨鍾，但所有東西都會說成「黃色」。
為了讓瞕瞕更好地學習顏色，我淘了些漂亮的顏色筆給他，經常陪他畫畫。我每次只給他一種顏色，避免分心。而且佢要講啱戈種顏色，先至有得畫。
我留意到瞕瞕由最初只識畫點和線，進展到現在可以運用肩部的力量來畫圓。
認知掛圖由「動物」置換成「形狀」，不管我怎麼教，佢只勉強地認識了圓形和三角形。我曾拿著一張長方形卡片問佢係咩黎，佢答我「電視機」，還唯恐我不明白佢意思，行過去指住部電視，話「係呢部電視黎」。
真被他搞得哭笑不得。
對字母，數字不感興趣，可能是真的未到認字敏感期呱，迫也無謂。
開始識得物品的歸屬，分別認到衫褲鞋襪和生活用品，例如手袋，杯，各自屬於何人。
樓下管理處姨姨換左人，佢亦識同我講「戈度無姨姨」「唔係戈個姨姨」之類。
能從圖書或卡通解讀主角表情，例如「bb喊呀」「媽咪鬧呀」「姐姐開心」「馬騮嬲呀」等等。
語言
班主任話瞕瞕好多野講。生活中基本野佢都識，有時仲會有d妙趣對話，令人捧腹不已。
1）我攞住筒星星餠問瞕瞕想要幾粒，預期佢會答我一粒，因為係佢唯一認識的數量詞。點知佢答我「擺低我攞。」
佢既意思係，叫你成筒擺低任佢攞。
2）同瞕瞕出街買野，佢堅持攞住袋野。我話「咁你揸實喎」，佢老氣橫揪答我「知啦~跌左無丫嘛!」
3）新春期間，爆炮聲此起彼落。每次聽到爆炮聲，佢先是呆一呆，跟住就話「唔駛驚，燒炮仗之嘛~」
4）封新年利是俾瞕瞕，佢可能未識啦，佢耍手擰頭，我話「錢黎個喎」，佢話「唔要呀，都話唔要咯~」
5）99從托兒所接瞕瞕放學回家，由他在客廳玩，她去煮飯。在廚房出來時見瞕瞕整爛了一個裝電器產品的紙盒。99話「大件事啦，媽咪返黎實鬧你」，瞕瞕左望右望，答佢「媽咪唔喺度！」
6）瞕瞕打了個c egg，對我說「媽咪，我嘔呀」
啋，嚇c媽咪咩！
瞕瞕從床頭拿起耳溫槍，貼近自己耳朵說「我發燒呀」
啋，講d咁既野！
7）帶瞕瞕去盧九公園睇展覽，展示窗內有一紫禁城模型，上面有d燈仔閃閃下。可能瞕瞕之前去過生日party，見到有類似燈牌。佢開心地指住模型問我「媽咪，咩黎架？係咪happy birthday呀？」
8）我食緊飯時，瞕瞕早已食飽。佢走過黎扭我抱，我話媽咪食緊飯，你去搵架熊仔打鼓車玩。佢真係走左去搵，我口頭提示佢話「哩。。。戈度呀，見唔見呀？」佢突然雙眼一亮，找到了，回話「見呀，搵到啦，我好叻呀」
佢咁都要讚一讚自己，我同99爭d噴飯。
9）瞕瞕而家萌發緊自我期，唔係太願意同人分享佢既食物。佢攞住盒提子乾，一粒一粒滋味地食緊。我地問佢可否請人食一粒呀，佢會急急地將手中的提子乾送進口中，再攤開雙手告訴你「提子？無喎，食晒啦！」
10）我問瞕瞕，媽咪最錫邊個呀？
佢用小手拍拍自己心口，很肯定的回答我「我呀！」
這些天來，佢都在努力揣摩緊「你、我」的用法，佢開始識講「媽咪幫我！」「等埋你呀~」之類的句子。
對世界充滿好奇的瞕瞕，成日問我地呢個咩黎，戈個咩黎。專家話，孩童兩三歲時問「是甚麼」的時候要認真答，五六歲時問「為甚麼」的時候要耐心答，讓他成為一個明事理的孩子，那他將來在青春反叛期時，就會減少反問你很多個「憑甚麼」了。
情感，社交發展
瞕瞕性格合群，友好，喜歡跟其他小朋友一齊玩模擬遊戲。
跟表哥仔玩巧虎炒菜遊戲，不亦樂乎。
瞕瞕漸漸明白和感受到甚麼是「愛」。有一日佢玩貼紙書，我在做家事，佢將兩隻鹿鼻對鼻咁貼，叫我看「鹿鹿錫鼻鼻」。
平日我同瞕瞕都有做這個「親鼻哥」動作，瞕瞕亦十分享受這一刻的情感交流。我曾告訴過他，自然界中很多動物母子之間也常用錫鼻鼻動作來表達親熱。還給他看過一些圖片，想不到他會將這個畫面深深地印記在腦海裡，還將它轉移到貼紙書上去表現出來。
當我看到這幅貼紙的時候，我內心其實極之激動。
另一張他貼得很好的貼紙是老虎母子親密依偎在一起。我想也是因為他看過相關照片，被觸動了，投射這種微妙感情到貼紙書上的效果。
