玩轉相反詞

自從我貼起了這張相反詞掛圖，瞕瞕便對反義詞產生興趣（也跟他本身愛說反話的頑皮天性有關），經常纏著我要講，臨訓前要講，等人時要講，遊戲的形式是我隨意說一句，他接上一句。。。雖然有些無厘頭，但不知不覺間，他已識了很多相反的意思。有些他對得幾好，出奇不意。

我：車車開得快。

瞕瞕：車車開得慢。

我：車車大。

瞕瞕：車車小。

我：車車可以載很多人。

瞕瞕：車車載得很少人。

我：車車白雪雪。

瞕瞕：車車黑嗎嗎。

我：車車洗得很乾淨。

瞕瞕：車車未洗係辣撻貓。

我：車車洗完香噴噴。

瞕瞕：車車唔洗臭崩崩。

我：車車賣很貴。

瞕瞕：車車賣很平。

我：車車遠。

瞕瞕：車車近。

我：車車前。

瞕瞕：車車後。

我：車車左。

瞕瞕：車車右。

我：車車凍。

瞕瞕：車車熱。

我：車車肥嘟嘟。

瞕瞕：車車瘦mark mark。

我：車車輕。

瞕瞕：車車重。

我：車車厚。

瞕瞕：車車薄。

我：車車長。

瞕瞕：車車短。

我：車車高。

瞕瞕：車車矮。

我：車車滑溜溜。

瞕瞕：車車鞋烚烚。

我：車車軟林林。

瞕瞕：車車硬掘掘。

我：車車乖。

瞕瞕：車車曳。

我：車車坐定定。

瞕瞕：車車走來走去。

我：車車企喺度。

瞕瞕：車車坐低。

我：車車行入去。

瞕瞕：車車出返黎。

我：車車笑。

瞕瞕：車車喊。

我：車車甜。

瞕瞕：車車苦。

我：車車新。

瞕瞕：車車舊。

我：車車老喇。

瞕瞕：車車小朋友。

我：車車係男仔。

瞕瞕：車車係女仔。

我：車車贏左。

瞕瞕：車車輸左。

我：車車飛上天。

瞕瞕：車車落地行。

我：車車匿埋喺屋企。

瞕瞕：車車要去街。

我：車車累喇。

瞕瞕：車車好精神。

我：車車要訓覺Zzz...

瞕瞕：車車起身陪我玩啊，嗚嗚嗚><

瞕瞕的三歲生日

唔知大家對近日全城熱論「贏在射精前」有甚麼看法？bb既出生月份的確係可以計算，實不相瞞，我都係咁樣計劃生瞕瞕出來的。

不過是我的出發點完全不同罷了。

我只是好傻好天真地想瞕瞕同我一齊生日咋。

雖然我老公總是認為「計劃趕不上變化」，但我卻是那種相信「凡事經過計劃總會提高成功機率」的人。

結果如我所願，瞕瞕跟我在同一個月份出世。而今年新舊曆相遇，我同佢更在同一日生日。鼓掌鼓掌。

其實我都很佩服其他媽媽落足全力地幫小朋友搞一個生日會，自問真係無咁既心力，而且我是一個喜歡平淡生活的人，所以幾年來都係一家三口簡單慶祝。

對瞕瞕來說，只要有蠟燭吹，有蛋糕切就已經夠開心。這些「儀式」在佢的角度是非常重要的，其重要程度，比我地想像中還要重要得多。話說生日當天，我地正常地吹蠟燭和切蛋糕，但蛋糕吃不完，第二天再拿出來切左一份俾佢食。點知佢一見到面前那片切好了的蛋糕，突然全身宛如雷擊，接著嚎哭不已。

經過一番了解和慰問，先明白原來佢唔可以接受「無份吹蠟燭和切蛋糕」，所以一切又要undo，我地重新找來蠟燭點上，等佢唱左生日歌，等佢吹熄蠟燭，再等佢切好蛋糕，分配好，破涕為笑。。。終於可以食= ="

某程度上佢都幾執著，但只要佢開心，呢d咁小既事我地都會盡量滿足佢。

三歲的瞕瞕，一個充滿靈氣的小孩子，無條件地愛著自己的父母，有時我都想將時間停留在這一刻。以下分享一件眼淺小事：

瞕瞕曾對我講了一句說話，令我覺得對住佢再辛苦也值得，我願意為佢做任何事情。

佢話：「大個我會照顧你。」

我感到極之愕然，追問了幾次邊個教佢講。佢話自己教自己。

當時的情形是這樣的，佢已在床上碌左一個鐘都未訓著，仲碌醒埋我。

我同佢四目交投，我沒說話。

黑暗中，佢閃亮亮的眼睛看著我，殷切地說：「我讀新學校戈時你要來接我放學喔～」

我當然想，我說我會盡力，只是我也要工作，工作的意義是什麼，是為了我們現在的生活，是為了大家將來的生活。

我講完，仲驚佢會諗唔開。

佢就突然講左句大個會照顧我。

我攬住佢。。。佢好快就甜甜地進入了夢鄕。

我還是忍不住流了幾滴眼淚。

我感動是因為我覺得佢明白事理，因為佢懂得感恩。

無論邊個做佢阿媽佢都有個心去回報，覺得自己好幸運可以做佢媽媽。

好用的床上桌

我同瞕瞕有睡前閱讀的習慣。從佢bb時只能專注一分鐘，看一頁書；到現在三歲，可以連續看上一個小時也不知厭倦。由於時間逐漸拉長，而佢日益長大的身體又被我環抱在懷中，沈重地壓坐在我的大腿上，我開始感覺到腰酸、背痛、腳痺。

正在此時，朋友跟我分享她淘到的好康物。那是一張可摺疊的小桌子，可以張開放在床上看書，打電腦，甚至飲咖啡。。。就稱它為「床上桌」吧。它取大的可取之處是桌面角度可以自由調較，斜斜地承載住本書，等我地唔駛再做低頭一族，護脊又護眼，而且收納方便，只需要一條罅，就放到，剛好我的床邊就有這麼一條罅，我覺得這個idea十分好，所以馬上淘返張。

我隨心願揀左最順眼，最潔淨的銀灰色，一收到試用就即時後悔了——後悔點解咁早d買啊？？我對質量和效果都感到非常滿意：）

對比一下，以前看書多累啊，真的不能長此下去。

還好入手最大的17吋，枱面足夠讓瞕瞕放一本畫冊，再放一盒顏色筆。等時或者做些小手工也可以。

自從擁有左這張床上桌，瞕瞕更喜歡花時間在上面看書，塗鴉，享受寧靜的時光。

恐龍初接觸

我有少少內疚，因為呢個星期日係瞕瞕托兒所既畢業旅行，去大陸d農莊玩，但可惜我同老公都要返工。佢返10:00-18:00，我返15:00-22:00，冇可能去到。

為左彌補，我等瞕瞕一訓醒就問佢：「你想去邊度玩呀？今日放假去邊都得。」起碼我有一個上午的時間陪到佢嘛。

佢答：科學館。

噢，其實我本身唔太想去的，出面好熱，路途又遠，去程要轉兩次巴士，回程仲要在一個幾近無遮檔的車站（攝氏33度）等成廿分鐘。。。一想起這些，我便說「你都唔夠高，唔俾入場呀。」

點知瞕瞕很認真地諗左陣：「唔係喎，歐玥晴係全班最矮，佢都可以買飛睇恐龍；我高過佢，即係可以買飛啦。」

我擺明係呃佢架喇，但見佢咁認真地同我解釋，打動左我。

被佢的邏輯打動。

我地9:55就去到，等10:00開門，排隊買飛。買飛戈度已有隻會郁又會叫的恐龍，漿漿已經話驚唔想睇。唔係呱，咁辛苦到你先話唔想睇？！

我無奈地問佢：「咁你唔睇恐龍，想睇乜呀？」

佢話：「想睇黃色小鴨子。」

我沒好氣地答佢：「睇鴨仔都要排隊買飛呀。」事實當然唔駛，它只是一個很普通的擺設。

成功氹掂瞕瞕入恐龍展館後，佢行左幾步又話唔想睇要走。都係既，由於我地早到無乜人，直頭好似包場咁，唔似開幕戈陣人頭湧湧，唔知究竟睇緊人定恐龍，我地相反個感覺就猶如置身在史前時代的荒漠中，恐龍造型比例既逼真又巨大，眼前的暴龍張開血盤大囗，背後又有翼龍拍翼尖叫飛過，以瞕瞕矮細的身型和稚嫩的思維，唔驚至奇。

不過我依然想鼓勵瞕瞕走畢全場，始終咁難得一場來到。於是我同佢講，要走到盡頭那邊才是出口。瞕瞕聽罷，即刻以大逃亡速度，直奔向展館的另一邊出口，逃生。。。諗起仲覺得好好笑，哈哈。

雖然瞕瞕唔想睇恐龍，但科學館仍然有好多野啱佢玩，特別是那個「建築工地」，百玩不厭，臨走時仲戀戀不捨。