我純粹抱住碰運氣的心態，睇下瞕瞕有無呢個機會。點知在幾十人之中，第3個就抽到佢，太幸運了。
參加playgroup的小朋友年紀相約，也是透過這次playgroup，我在身旁觀察到瞕瞕的一舉一動，還有其他小朋友的對比，加深了解瞕瞕。
一開始是warm up自選玩具，但瞕瞕並没有選定任何一件玩具，相反，佢見到地方咁大咁空曠，極度興奮，猶如脫疆的野馬亂跑左幾十個圏，轉到我頭都暈埋。
跟住就來到自我介紹時間，大家圍住一個圏坐，讓小朋友報上自己的名。對住廿幾雙陌生眼睛，瞕瞕肯講至奇。而其中一位家長就用了很好的方法，對小朋友說「我地叫咩名呀？叫余——」引導小朋友接下去。等我下一堂都試下呢個方法先。
「我地叫咩名呀？叫黎——」
期待佢會接上「逸瞕」
嘿嘿。
介紹完畢，導師教小朋友唱兩首歌：Hello Song和One Little Finger, 由於我同瞕瞕未曾聽過呢首歌，所以佢跟唔到，只有呆呆地望住導師和同學的份兒。不過我有留意瞕瞕正在努力理解首歌，和記住d動作。
呢一堂既主題係換季，從夏天到冬天的變化，我地亦因此由短袖衫換上長袖衫。正當導師講呀講的時候，瞕瞕不停地想走佬，我只得千方百計地誘導佢回來。咁多個小朋友係得佢一個企喺度「聽書」，佢堅持企喺度係因為佢無時無刻準備走佬-_-... 最終都要帶佢離場行左個圏，先肯回來乖乖上課。
變了，真的變了，衰仔而家坐唔定嘞。
幸好一到「走動」環節，瞕瞕能迅速投入其中。小朋友和家長圍住個圈慢慢行，當背景音樂一停，導師就會拎張顏色卡片出黎，考小朋友識唔識揀返地下相同顏色的襪。呢part瞕瞕做得幾好，佢鍾意呢d挑戰，總是最快最準的一個。
接著又有考小朋友在波波池中拿起衣服圖片，行去另一邊的晾衫繩中，用衣夾夾住件衫，其實係考小朋友的小手肌，識唔識用衣夾。呢個task的另一種玩法係，俾小朋友在波波池中執隻襪，再行去晾衫繩戈邊，用相同顏色的衣夾夾好隻襪。
如果就以考驗認知和完成任務的能力來說，瞕瞕的表現其實很不錯，問題係一要佢坐低聽書，就成日話要走，扭到乜咁。
我仲以為佢根本唔鍾意返playgroup，但想不到午睡時，佢主動跟我回味playgroup過程，我問佢最鍾意邊part，佢竟然話係跳舞戈part。下，係咩？？你都唔識跳，又唔跟住做。莫非d小朋友都係咁欲拒還迎既？
