這還用問？！我馬上抱起佢衝進廁所。
自此，佢算係戒左夜片。我都估唔到咁順利。真係一配合到生理成熟期就乜都得。一日濕好多件衫褲，繼而要拖好多次地的境況，是我不曾經歷的。
同理，我不急於瞕瞕認字或者學識d乜野。我相信配合敏感期就會事半功倍，每個小朋友都有自己的時間表。
大肌肉
一路以來，我都覺得瞕瞕的大肌肉發展是比同齡小朋友差的。我對此方面的第六感是來源於Facebook，事關見到人地會擒高擒低，瞕瞕唔會；人地識踩三輪車，瞕瞕唔識；人地鍾意玩scooter，佢唔敢；人地識行平衡木，佢死都唔肯。。。
但單純地同人地比較係無意思的，為此我參閱了「丹佛發育篩查測驗 （Denver Development Screen Test DDST）之大運動能區」，它是世界上最權威的智商測試系統，即使出去做評估都係根據呢個表。
經客觀評估，瞕瞕的大肌肉發展落在尾25%，即係話，有75%的小朋友會超越佢。幸而尚屬正常範圍，但為免這種落差愈來愈大，最好給予一些幫助。
所以而家一得閒，我就帶佢上大廈天台踩三輪車。雖然地方略為殘舊，但始終身處高樓，空氣很好，風涼水冷又無外人打擾。
另外我又淘了平衡木和跨欄設施讓瞕瞕更多機會練習，眼見返playgroup得佢一個做唔到，也許是膽量和身體協調性不足，加上k1面試亦會考到。可能其他家長根本無需刻意這樣做，瞕瞕其他方面也發展得不錯，唯獨大肌肉特別落後，長遠來說，我總想佢身心發展得平衡些。
小肌肉
同樣都是肌肉，但瞕瞕的小肌肉發展倒沒有任何問題，點解呢點解，我都唔明。
參照蒙特梭利方法，我將d廢紙裁成一條條，再俾瞕瞕用安全剪刀剪成一粒粒。又俾佢玩普通3M膠紙座，佢現在已經很利索地撕下透明膠紙，周圍貼。
佢亦識用紗巾，海綿，移液管之類的工具，將一隻杯中的液體，轉移去另一隻杯，玩得不亦樂乎，甚至用沉迷去形容。
其實我最欣賞佢能夠專注地完成一整個小遊戲。例如用鑷子將一個碗中的小東西，夾去另一個碗。中途沒有失去耐性、發脾氣、夾幾粒又唔玩了的情況發生。
我還心動想淘兩款衣飾架俾佢操練（鈕扣和皮帶），本來覺得無必要買，但見雙11，做緊半價優惠，由原價幾十蚊個變成10幾蚊個，抵喎，究竟買唔買好？
認知
還有四個月，瞕瞕就要面對K1入學試。細佬對我說：「咁你就要努力同佢溫習定d考試內容了」嗯，關於考試題目，半年前我已收集了不少，也循序讓瞕瞕逐d逐d掌握，至現時要考甚麼佢大概都識，但到時肯唔肯答人卻是另一回事。畢竟2至3歲的小朋友情緖處於極不穩定狀態，我只能作最好的準備，最壞的打算。
該懂的佢都懂，所以認知這部份略過。
語言
有一段時間瞕瞕出現了嚴重的口吃。講十幾次「我。。我。。我。。。」都仲未表達到自己的意思。我直覺反應就是告訴佢不用急，慢慢説清楚就好，每每如此，佢如釋重負地鬆一口氣，向我微微一笑，似在感激我對佢的理解。
孩子，我是懂你的。我從未擔心過你會因此落下口吃的毛病，因為我看過書，知道有一個階段，腦中思想速度快過言語所能表達，就會變成囗吃，正常來說只會維持短暫時間。果然，在沒有受到任何壓力之下，很快就沒事了。
相對於同齡女孩子，也許瞕瞕未能完整地述說一個故事，不過這個月最大的進步，是應對能力增強了不少，意想不到佢會咁答。
試舉兩例説明之。
嫲嫲向我反映了一件湊住瞕瞕的趣事。
嫲嫲：「你覺得自己生得似邊個？」
瞕瞕：「似嫲嫲」
嫲嫲：「點會似嫲嫲呀？？你又唔係嫲嫲生的」
瞕瞕：「似媽咪」
嫲嫲：「下，真係似媽咪咩？」
瞕瞕：「似 daddy」
嫲嫲：「哇，你真係一時一樣個喎。你快d講，你究竟似邊個？」
瞕瞕：「似人囉。似係一個人」
嫲嫲：「乜唔似隻豬咩？」
瞕瞕：「唔係～人黎既」
接放學的時候，路經M&S Cafe, 我隨口問瞕瞕：「等你大個，帶你黎呢度食香蕉船好無呀？」
原以為佢會就咁答我一句「好呀。」
點知佢話：「我已經大個，不如而家去啦～」
自理
最叻就係識得剝香蕉皮，畢竟，B以食為天。其餘既就算識做，包括刷牙，著鞋著襪著衫，都要同你搞對抗。
曾經幻想過，呢個月齡既小朋友大致學識照顧自己，應該好乖至係，可惜現實始終沒有那麼理想，識做和肯做是兩回事。
幾時先會變得順心d？？
情感
瞕瞕開始會發自內心的主動分享，不過目前只限佢最心愛的人。如果說女兒是父親上輩子的情人，那麼兒子一定是我這個阿媽今世的情人。
那天給瞕瞕兩小包紫菜，佢撕開了獨立包裝袋的虛線，遞了其中一片給我，邊説：「拿，分一塊俾你食丫～」
那天瞕瞕在吃乳酪，佢突然遞了一匙給我：「你都試下好無味丫～」
那天表哥仔送了一個藍色貼紙給瞕瞕，瞕瞕接過後若有所思地說：「我係男孩子，要藍色貼紙。。」然後佢要求表哥仔也送一個貼紙給我，說：「我媽咪係女孩子，你送一個粉紅色貼紙俾我媽咪丫～」
對於瞕瞕的這些舉動，我既感動又激動。
至於daddy呢？唔好意思，瞕瞕視佢為情敵，哈哈。
