推bb車出街，心慌慌

久違了的bb車出動，不過而家推bb車出街真係要好小心，最近的新聞搞到人心惶惶。

雖然話被拐b女個阿媽本身背景複雜，被警方鎖定為懷疑目標，改變了遁查方向。但上海戈單呢？另一個四個月大男嬰，竟然在家人開既食店內，俾拐子佬抱走左。咁都落到手，好得人驚。

想像不到這種等待奇蹟出現（被尋回）的人生，會是如何渡過。。。bb咁細個，佢食開咩奶粉，點湊法，外人會知咩？佢地會點對待bb？加上而家天氣愈來愈凍。。。唉，諗一諗都覺得係切膚之痛。

記得瞕瞕好細個戈陣，大概只有三個月大吧！我已復工了，99幫我在返工時照顧瞕瞕。有日99想倒垃圾，其實一出屋企門口打開垃圾房就係，一般我地都貪方便，唔會關自家度鐵閘。而當時99拿住袋大垃圾，走到門口，回頭望一眼訓在搖搖搖椅上的乖孫，又覺得放心不下，都係拿鎖匙關鐵閘先行開，整個過程都係十幾秒。

99話時間雖短，但佢突然諗到，而且好驚有人會趁機抱走佢粒孫。佢講返我知戈陣，我仲哈哈大笑，話澳門治安咁好，我地又住高樓大廈，都唔會有外人行過我地門口，加上體驗過先知，湊仔原來好辛苦架，邊個會咁無聊抱走瞕瞕呀，佢咁煩，送俾人都無人要啦。。。

勢估唔到，今時今日回想起這件事，原來99既謹慎係必須架！自己個小朋友係身上掉下來的一塊肉，千萬要睇緊d，萬一出事已經永遠都返唔到轉頭。

在地上玩耍

嬰兒教養指南話，六個月大之後就要放在地上玩，而不要再佝限在bb床或大人床上，讓他有足夠的空間去爬，去翻滾。所以近日同老公去bb店買左set地墊回來。

其實淘寶會係一個唔錯既選擇，我睇過款式非常非常多，價錢十分便宜，平均5蚊一塊左右。但因為要買好多塊，而我地現時唔方便出大陸，而要搵代收，驚在運費上蝕章，加上考慮到塑膠產品應以安全為重，最後都是決定在bb店買算了。

我地覺得面包超人地墊幾好，可惜店裡只有兩set, 得18塊，如果能夠買多兩set就perfect了。用住先，等佢地返貨，或者有時間再去其他bb店睇下啦。

有毛有翼，曉飛了~

但究竟幾時至識爬呢？

地墊啟用戈日，晴天，見客廳個光線幾好，趁機攞返部大機出黎，幫瞕瞕影返d靚相先。

米糊餵養紀錄

6個月大保健資料：7.8kg重，68cm身高，頭圍48cm長，啱啱好在中位生長線上，即50%。

其實瞕瞕根本極度厭奶，一日飲得10安奶，甚至沒有。但好在佢能夠以米糊當做正餐，生長線先至唔怕跌咋。

由於我係德國產品的fans, 所以用左NUK的奶樽，焓奶樽機，能恩奶粉，自然地米糊都食返雀巢牌子。

從同期媽媽的blog得知，佢地個個都餵緊米糊，咁我都分享下這方面的經驗。

我睇左雀巢營養天地戈本小冊子，介紹佢地的初階米糊（藍罐原味），可以在bb四個月大就開始俾佢試下。加上我地之前在bb展拿左超多sample（二十幾包），更加要試下。

根據醫生的講法，bb識識地坐同埋識吞野就試得。瞕瞕吞野一向好叻，事關兩個幾月時，見佢食輪狀病毒食到一滴不剩，仲俾姑娘讚。 

最初只係一兩匙，佢食到舐舐利，一星期內已變左一小碗，跟住又再換左隻大碗。佢好鍾意好鍾意食。

原來雀巢有好多隻米糊，頭先講戈隻藍罐原味，係初生米糊，適宜4至6個月食用。而bb滿6個月識厭倦原有味道，所以雀巢為呢個階段既bb設計左蘋果味和胡蘿蔔味。8個月又有蔬菜味和蕃茄味。12個月則是集合多種殼物的口味。生產商考慮得咁周全，我會繼續幫襯佢。

米糊同傳統粥仔的分別係方便，而且鈣質含量係後者的幾倍，仲添加左益生菌，增進腸道健康。當然我唔係信哂廣告商，而家我地都等待緊合適既機會，粥仔同米糊輪流一齊餵。  

我地既調配方法係6匙米糊+2匙奶粉+適量的水，一日兩餐。所以雖然40蚊一罐好平，但一個星期就食晒一罐了。我地都有d存貨，同埋鍾意它特有的罐裝（其他牌子都是紙盒裝），應該都不會考慮其他牌子了。

瞕瞕好識得睇人眉頭眼額，我記得第一次餵佢飲藍色熊仔維他命水時，因為我聞到味道唔係幾好，便不自覺地皺起眉，估唔到俾瞕瞕見到，佢又學我皺眉，仲死都唔肯開口添，收尾氹氹下先肯飲咋。

餵佢食米糊的時候，我不斷話好味道，又讃佢叻仔，佢食得好開心。轉眼間15分鐘就食哂一碗了。

某位親戚下落不明

人奶餵左五個月月經返黎，但之後又無左下文。。。

係咁既，我餵到五個月既時候，有一日月經突然返左黎，情況好正常。

而家瞕瞕六個零月，今個月無月經，遲左半個月都未見蹤影，未生之前我好準時的。其實我有用大衛同秀兒check返排卵，如果check到有排卵第十四日應該有月經，但我就係一直唔見有紅線，結果真係無月經。

為何我會如此這麼在意？並非我急住生第二個，而事實上，現階段我亦未有這個念頭。只係因為上次毫無預警，搞到一床都係，要執手尾。。。

唔知係咪同我繼續餵人奶有關，而抑制左排卵？我想知道既係，生完之後最初幾次月經係咪都唔準的，要隔多一排先準返？你地既情況又係點架？thanks!

迪士尼遊蹤。六個月大。下集

唔知係咪瞕瞕亦感受到旅途既疲倦，佢比平時遲左訓醒，就連爸爸媽媽已起身，梳洗完畢，執好晒d野，佢都依然在睡夢中。

難得一次黎到迪士尼，決定試埋佢既早餐，book房時唔包的，價值150HKD一位，真的很貴。其實個早餐都唔錯既，只不過相比尋晩晩餐既驚喜相比，就無咁特別囉。

為左等瞕瞕起身，我地九點半先出發去餐廳，好在都有位坐。瞕瞕識自己挨住梳化椅，可能仲未訓夠，個樣有d on居居咁。

d米奇頭鬆餅涷冰冰的，都唔係傳說中咁好食既。我地見有d白粥，想俾瞕瞕試下，但可能佢平時食米糊係甜，粥仔係無味，所以佢個樣好唔enjoy.

門口有米奇廚師同我地合照。

食完早餐見離check out仲有d時間，便在酒店範圍既公園行下，落腳架影下一家三口合照。

好多相都係返屋企之後，開電腦睇返，先至發覺人像咁細粒，呢d就係老公既攝影風格。。。汗

這天又落雨又凍，加上係星期三，攝於上午11時在迪士尼閘口，現場所見無乜人流。我地玩左古董火車，小小世界和森林河流之旅，全部都唔駛排隊，簡直難以置信。但我知平時一定爆多人，因為設置左好多欄架，應該係用來維持排隊秩序的。

雖然只係11月，但園內已整哂聖誕裝飾了。睇下12月有無機會再黎hk，我想睇下聖誕燈飾。

相信瞕瞕應該係全場最細的人仔，但佢一d都唔怕醜，係咁同人打招呼同笑笑，如果你再大個仔d都係咁就好了。

咁細個就學人搭火車，不過短短8分鐘既車程卻訓著左。

未試過真係唔知瞕瞕既底線去到邊度，開頭搭船都好地地，打直抱佢仲興奮地彈彈下。但去到一個位，見到水底有隻醜陋鱷魚浮上水面，張大嘴巴，眼珠骨碌骨碌咁轉，瞕瞕當堂扁嘴。再去到另一個位，有幾陣人造瀑布效果，故意令船隻搖晃不穩，同時火山又噴火又噴煙，瞕瞕狀甚驚恐，繼而喪喊，喊到落船仲喊緊，眼角掛住粒淚珠，猶有餘猶悸的樣子。

我地唔係刻意嚇瞕瞕的，事關佢上個月仲未識架，係最近先至有＂驚＂呢個概念。同認人既原理一樣，佢發展緊認知能力，再唔係往日既一舊飯。

必須一提的是，全程都係由我同老公輪流揹住，有人話過我地唔推bb車去實會死，但一來我地覺得要衝地鐵唔方便，已經要拖住一個gip了，二來瞕瞕唔肯坐，三來若真的有需要都可以在迪士尼租返架，不過到最後都無用。

總結整個旅程都沒有想像中的辛苦，其實揹住瞕瞕同我地的互動會多好多，可以即時見到佢既表情變化，可以同佢溝通，解釋佢知乜野係乜野。

一家人出遊的經歷是如此難忘，即使只係一，兩日的香港之旅都很開心滿足的了。

迪士尼遊蹤。六個月大。上集

大假既第二日，我同老公已帶左瞕瞕去香港進行豐富的節目。

其實關於這趟旅程，有很多反對的聲音：咁細個乜都唔識，而且會令到大人好辛苦。

本身我同老公想去旅行既，但現實中發現根本放唔低瞕瞕，所以去邊度都要帶埋佢，但如果因為咁邊度都唔去，就白白浪費了這些假期，豈不更加可惜！

原來有左小朋友之後，即使去轉香港都要帶好多行李，多到唔拖gip唔得。而好在我地都準備充足，在迪士尼的兩天，天氣急轉直下，雨傘，棉褸仔一應俱在，先唔怕冷親瞕瞕咋。

好啦，將你放埋落gip一齊走，你話幾方便呢。

瞕瞕好似知有地方去咁，一朝早便表現興奮，全程都算keep 住這份情緒，令我更加覺得以後去邊都要帶埋你。

落船之前我在Facebook post左呢張相，好快就收到回應話今日好大風浪，oh, not a good news.

由於瞕瞕係第一次坐船，唔知佢怕唔怕好似媽咪咁暈船浪繼而嘔（似爸爸就唔怕），如果係就真係大檸樂。我特地幫瞕瞕戴左條大大口水肩以防萬一，哈，好得意，果然又好睇又好用。

一上船無幾耐便雙雙入睡。

瞕瞕第一次出行，好奇地四圍望望望。沿途我都有不斷同瞕瞕解釋拿而家我地搭船-去hk，搭地鐵-去迪士尼，陪媽咪等shuttle bus - 返酒店，check in - 攞房。唔理得佢明唔明都好，我想將呢樣野變成一個習慣。

到步的第一件事，當然係放低哂d野，休息一陣。瞕瞕好明顯對地方生保，一放佢在大床上就哇哇大哭。即刻抱返起佢，安撫佢，同佢玩左陣，佢就樂開懷了。

覺得瞕瞕好似我的迷你老公仔。

畢竟是迪士尼樂園的酒店，嬰兒配套設施非常週到，除左bb床，仲有bb浴盤。甚至乎餐廳都有提供bb餐具。

我地訂左米奇廚師餐廳的自助晚餐，呢排做緊promo, 只要在官網印張優惠券出來就可使用，258HKD一位，同樣質素在澳門這個價錢食唔到。

我係一個對沙律情有獨鍾的人，印象最深刻係個蟹肉芒果蟹籽沙律，超好味，另外一款係水牛芝士+車厘茄+橄欖，附帶一片米奇頭車打芝士，整得好靚，絕對係誠意之作。

即使我一向對熱盤興趣不大，但都試左牛仔骨，羊架，三文魚扒等，全部都唔錯。

我同老公對呢餐都十分滿意。雖然瞕瞕無份食，但只要同爸爸媽媽在一起會特別開心。

飽餐後我地就向園區出發了。夜晚既迪士尼別有一番景象，我同瞕瞕一路行，老公一路錄影，記得呢d家庭片段，第時比返瞕瞕睇。

我地剛好趕得及睇八點鐘戈場城堡煙花。煙花播放之前，d燈光特登調暗左，就因為咁樣，估唔到瞕瞕突然放聲大哭。 

一朵朵絢麗的煙花在半空綻放，照亮了整片天空。亮光吸引了瞕瞕的眼球，但是佢隨即扁嘴，眼淚在眼眶中打轉，他驚恐地注視著再來的煙花，哭得一發不可收拾，更挨在我心口博命喊喊喊喊喊。。。

於是我帶瞕瞕走左入去附近的一間禮品店暫避，個公主姐姐仲送左一張靚貼紙俾佢，又氹返佢。待煙花過後，我地便一齊直接返酒店了。

瞕瞕習慣臨睡前咬下隻長頸鹿先，係佢的至愛黎架。有時佢喊緊，塞隻長頸鹿俾佢，都可以安撫到佢一陣。

單眼say goodnight.

第二天的旅程待續。