Terrible two提早來臨？

近日瞕瞕性情有變，特徵包括：1)唱反調，2)扭扭擰擰，3)佻皮搗蛋，4)暴力。。。等等，我懷疑歲半的他是不是提早進入了terrible two？起初我只是靜觀其變，不久後從托兒所派回來的手冊，表現由全佳變成一半佳(即一半不佳)，使我的疑惑得到證實-____-

逐個point分享下瞕瞕d曳野，究竟係咪同一個階段的小朋友唔多唔少都會係咁？

1) 唱反調

配合語言能力，我地知道瞕瞕成日唱反調。叫佢企0係度著褲，佢講一聲「坐呀」就直接坐左0係度；叫佢快d訓覺呀，佢就話「我要走呀，我要玩時」說時遲，那時快，真係爬落床走返出廳的；叫佢遞d野俾你，佢會一手拋在地上，話「唔要呀!」總之叫佢做一樣野，若然佢知道相反意思，一定一定會做相反既事情出來。

仲經常指鹿為馬，見到猫的圖片話汪汪，見到狗的圖片又話係貓。。。佢絕對識分辨的，有時又叫下嫲嫲做妹妹，叫daddy做哥哥，叫哥哥做弟弟，我估佢都係貪得意，想見到我地錯愕個樣呱。

睇書話唱反調呢家野，係接近兩歲的幼兒學習「say no」的權限，但可惜呢個做著相反指令既行為，絕對不利於k1 interviw，但願terrible two早來早去。

2)扭扭擰擰

一如其他幼兒，一識企之後就唔肯乖乖就範俾你換片，之前仲可以求其俾d野佢在手，例如藥膏和濕紙巾，引開佢注意力。而家佢要求愈來愈高，堅持要自己撕開尿片張貼紙，係咁話「要meet呀，要meet呀」，如果佢真係咁神心幫手就好，但佢撕開張貼紙後係唔會俾返條尿片我，我都覺得算了，去攞過第二條尿片就算，但佢見狀又遞返條尿片俾我「拿，拿」，當我想接手時，佢又收返埋，仲哈哈大笑，然後又再扮遞俾我，繼續捉弄我。好在瞕瞕已戒左屎片，否則咁扭擰法都幾麻煩。  

一聽到叫佢洗白白，就好似玩捉迷藏咁走左去，愈走愈遠，當你捉到佢，佢就會sir落地下，化身做一條軟皮蛇，抱不起來。送佢返學時都係咁，一出lift口，佢就突然放軟手腳，雙膝跪地，繼而親吻土地。佢明明係好鍾意洗白白和返學的，係都要特登扭擰下。

去街又係咁，好細個戈時，佢一知道我地話去街，就即刻飛奔過來，從鞋架上拿下自己的鞋襪，再爬在大人膝頭上等人幫佢著。而家呢，叫極都唔過黎，即使著好晒鞋襪，都突然行返入廳話要玩玩具。接放學時亦然，阿姨從走廊盡頭拖住佢行緊出黎，佢一見到我地就往回跑，阿姨便強行拖佢出黎，經過每一間課室門口，瞕瞕都伸個頭想要走入去，又或者行行下停0係度，扮睇牆身上的公仔圖案，拖極都唔走。從來都只有小朋友扭計唔肯返學，但瞕瞕就好似唔捨得放學咁。

幸而身邊所有人都明白(包括托兒所阿姨和99都明白)，呢d扭擰行為是一個過渡階段而已，並不代表佢本身唔鍾意做戈樣野，更唔係佢天生性格如此，所以都唔會太放在心上，仲會調戲下佢，「哦，你唔返屋企，咁daddy媽咪走架嘞~」瞕瞕見我地行遠了少少，阿姨又作勢抱佢返入裡面，便著急地大叫：「我要返屋企！我要返屋企！」

3) 佻皮搗蛋

屋企既玩具，瞕瞕都大致掌握到一個正確的玩法，跟住就開始黎料啦。佢會將d細細粒既積木，放在撈魚網中，大力一揮，粒積木便呈拋物線咁飛左出去，呢個玩法都幾有創意，不過d玩具配件經常被佢飛到成屋都係，甚至丟失了。

關於佻皮搗蛋方面的事件實在太多了，有些很零碎，例如他會將d餅碎曬在自己的頭髮上，再捽勻佢；將頂帽蓋在臉上而不是戴在頭上，盲中中地行幾步跌低；阿嫲睇緊電視，佢會拿起茶几上的電視關掉它；我在廳傾緊電話，佢又會用手指cut左你線。。。諸如此類，實在太多，不能盡錄。

我唔知道需唔需要糾正佢，畢竟同樣一件壞事佢好少做第二次，因為佢好快又再嘗試做其他壞事><

4) 暴力

暴力通常同情緒和發脾氣有關。呢樣真係要嚴加管教，以免佢無情力傷害到別人，或者給人一種不好的感覺。

以前瞕瞕超錫佢d米奇，羊咩咩和巧虎公仔，但而家成日蹂躪佢地，一捉住米奇和巧虎條尾，就丟到老遠，仲嫌唔夠遠，再丟得遠d。於是我就收埋佢d公仔，話無左，因為佢唔鍾意你咁對佢地。瞕瞕覺得好傷心，求我攞返出黎俾佢。反覆告誡之下總有改善。

有次我湊近點看他，他無端端打我一巴，我便用返同等力度拍他，他起先一陣不知所措，我同佢講你都會痛係咪，下次你想摸人時，要細細力，說時我溫柔地撫摸他的臉龐，他釋然了，學我講「細細力」，溫柔地摸我。

老公買左塊神奇畫板俾瞕瞕，枝畫筆係連住條線安放在一個坑位中，瞕瞕攞唔到枝筆出黎，就狂拍塊畫板，拍到砰砰作響，明顯發脾氣。但小朋友大多聽不進任何否定語句，此時若說「不可以拍呀，做乜你成日都發脾氣呀」，根本起不到作用，要說些積極的意見。嫲嫲用一句簡單的話制止了他：「傻豬！你扯住條繩拉枝筆出黎咪得囉」。瞕瞕恍然大悟，照住阿嫲講既方法做就消氣了。

我睇過書，話要令小朋友不發脾氣，首要是「掌握小朋友的尺度，在臨界點爆發之前，協助他解決問題」。這個句子是不是很玄妙呢，甚麼叫做掌握其尺度？開頭我都諗唔明，後來透過畫板一事和99的處理方法，使我突然有了一種覺悟。

為了讓瞕瞕練習手口動作協調，我將他愛吃的藍莓放在碗中，由他自己拿著匙羮舀起來吃。起先瞕瞕舀不到，還想發脾氣翻碗。我對他說：「你放粒藍莓在匙羮上，再放入口，咪得囉！」猶幸瞕瞕理解力非常不錯，在沒有示範給他看的情況下，他也能完全明白言語中的提示，他用一隻手拿起粒藍莓，放在匙羮上，再用另一隻手拿著匙羮放進口中，成功了。

這就是所謂的「臨界點」「尺度」「協助」的意思了，要掌握到孩子的尺度，真的要對他們傾注多點關注，盡力去了解他們，而且也不建議直接替他們做，而只是「協助」他們解決問題就好了，這樣做的目的，是為了將來在面對不同問題時，不要用發脾氣的方法去解決，否則一而再，再而三，脾氣很快就愈來愈壞，而要自己想想方法，或向旁人請求協助。

迪士尼一週年紀念 (下)

見間酒店咁靚，所以我地第二日都沒有安排再入樂園玩，而係留0係酒店裡面享受，我地知道酒店有個迷宮花園，室內外遊樂場等。 可能日間的旅程太豐富，瞕瞕玩到夠皮，飲完枝奶大覺訓，完全無醒過，開頭仲驚佢受刺激後夜晚不斷發夢喊醒添。

 

朝早梳洗後，我地就落去花園散步，由於時間尚早，偌大的花園只有我們一家人的身影。四周環境清幽，寧靜，瞕瞕自由地跑來跑去，開心到飛起。此時他的狀態仍很正常，影全家幅時又很合作，但想不到再過兩小時之後。。。

太陽一出，花園就曬，我地轉移陣地回到室內繼續玩。一入到室內就頭痛了，瞕瞕不停地跑來跑去，我好驚佢撞親人地，佢攞左某樣野出黎，摸兩下就丟開，又去攞第二樣，搞到亂七八糟，加上我地覺得室內空氣明顯唔好，玩左一陣就決定返房。

上房後我開始整理行李，整baby food；老公就在打機，post相；瞕瞕自己行來行去，好像劉姥姥出大觀園咁四圍參觀。本來都好地地，突然瞕瞕扭計，老公氹唔掂，便叫我停低手上的工作去睇住佢。瞕瞕由哭哭啼啼變成大聲哭鬧，我地兩個輪流咁抱住佢都唔得。瞕瞕開始眼淚鼻涕一齊流，抹極都仲流緊，根本止唔到，以前都未試過咁。幸好身上有帶備相關藥物，不久瞕瞕就陷入昏睡，額頭發滾，一探熱已是39.7度。由佢身體不適扭計到發現佢發燒，只不過是一個鐘，真的很突然。


幫佢塞肛後，我地去左酒店的中菜餐廳食野，因為一早已經book左，仲俾埋錢，唔食唔得。雖然一桌子都是極度精美的點心，但見瞕瞕病到咁樣，真是一點心情也沒有，當然更加一張相都無影到。在茶樓的時候，瞕瞕醒左，但佢自己坐在high chair上又伏在桌子上睡了，處於一種非清醒狀態。 我地催促侍應盡快上晒全部點心後，便匆匆check-out回到澳門求醫。


這一場生病真是毫無預警，好似撞邪咁，曾經有諗過係咪瞕瞕誤開了某個衣櫃的門或抽屜，有些不明塵埃或氣味導致佢急性過敏，鼻水倒流變成中耳炎。此病一病就是半個月，無返學但仍要交學費的捐失，再加上醫療費用，泊得住整個迪士尼旅費，唉。

迪士尼一週年紀念（上）

這個一週年，是紀念甚麼的呢？是紀念我們上年同一個日子來過迪士尼呀。

原本plan左11月8至9日，但因為11月8日有要事不能離澳，改為11月15至16日，恰巧變了一週年^___^

這是瞕瞕第三次探訪香港，歲半的旅程，比起以往任何一次的認知都要多，也是他首度對「海」和「船」有了概念。

由於滿一歲要買船票，所以瞕瞕獨佔一個座位。我們就選了靠窗的位置，瞕瞕在自己的座位上非常開心，他雙手按著玻璃窗，望著出面的景觀，讚嘆地銳：「哇~哇~」我們一向也有對他給予積極回應，便附和地說，係喎，出面係海，仲有船。。。想不到他可以一直望住出面個海逾二十分鐘，直至駛遠了，再也見不到其他船，只有白茫茫一片海面，他才靜靜地坐了下來。

我預先準備裝滿了玩具的百寶袋，又有少少零食，一小時的航程很快便過去了。Touch wood瞕瞕體質應該似daddy，唔怕暈船（我家族幾乎個個都暈車暈船，當然包括我），而每三個朋友之中，就有一個告訴我，佢地的小朋友，泊船時嘔到大家全身都係＞＜嗯，如果真係有此問題，一落船就要幫小朋友著定一件反穿防水食飯衣，其實我都有咁做，以防萬一。

在酒店放低行李，再坐shuttle bus出樂園的過程中，發生了一件事--我地部bb車唔見左！原來係被其他客人中途拿了下車，遺棄在另一間酒店門口。幸好工作人員相當熱心，盡責地幫我地找回來，這件小意外花費了我們半小時。

 

時間耽擱到2pm才入園，第一件事是餵飽瞕瞕，很欣賞迪士尼的baby care設備，有舒適的high chair，有熱水供應，有sink盤洗野，etc

因為我地事先有研究過官網咩啱咁細個小朋友玩，所以入園後便毫不猶豫地選擇玩了這三個遊戲：小小世界，轉轉杯和小飛象。雖然當天是星期六，遊人比較多，但玩了這麼多，我地排隊的時間加起來只是約莫一個小時而已，比想像中好好多。

迪士尼真是一個充滿童真和歡樂的地方，儘管我的童年欠缺這些，但看見瞕瞕快樂地去感受這一切，我的心情也隨著他躍動的身影而開朗起來。

 

為求坐得舒服d，同埋搵到瞕瞕可以吃的東西，我地book左傍晚既自助餐。想不到瞕瞕可以自己一個人仔食左四個面包，幾塊餅乾，半碗石斑魚肉飯，和一杯蘋果汁。他一向也吃得不少，卻食極都唔肥，或者咁講，佢係長計唔長肉。

可能一來是瞕瞕長大了，二來是巧虎書咁啱有個主題是「煙花」，令他知道煙花是怎麼一回事，今次他不再害怕了，我記得上次佢喊到七彩咁。

行經某個攤檔時，瞕瞕對一柄電光劍很感興趣，不過我地驚佢用會督親人，最後決定唔買。

對比一下當年今日，瞕瞕真係大個仔左。今次間酒店正好多，還有前後花園，室內外遊樂場，可惜好景不常，第二日佢就突然病左，燒到40.8度+昏睡，嚇到我地11am check-out就馬上搭船返澳門求醫。

（未完待續）

18個月大語言能力

在幼兒各項能力發展當中，我覺得語言這一項是最令人驚喜的，因為它代表了其思維，也迅速拉近了大家之後的關係，當瞕瞕一開始學識表達自己，和各種訴求之後，我地已將佢當係一個人仔，而不再是一個乜都唔識的bb了。

 

歲半兒童保健的內容有：度高，度重，頭圍大小，打針，外加這幾個問題：出牙出成點？行路行成點？講野講成點？

瞕瞕用實際行動代我回答了最後一個問題，他首先禮貌地叫醫生「早晨」，隨即就指住醫生張書枱上面個食物金字塔圖表，興奮地大叫「有apple」「飯飯」，他還發現窗邊上種了一盆植物，直呼「有花花喎」，甚至見到這盆栽中有魚（真好眼力！栽種的盆子是透明的，裡面的確養了幾條魚毛，游來游去）窗台的另一邊則放了一隻Snoopy擺設，瞕瞕認出來，說「汪汪」。

這些都是他自己主動講，而非有人問他這是甚麼東東。因為我每帶瞕瞕去到目的地，例如遊樂場，放他落地玩之前，都會率先跟他說「呢度係邊度呀？等我地描述下個環境先，係遊-樂-場喎，你睇戈邊有滑梯，在千秋，有搖搖馬，有好多小朋友一齊玩，有哥哥玩緊踢波波，有妹妹玩緊踩車車。。。」其他場境如醫務所，超級市場，碼頭，巴士站等亦然。

瞕瞕都算留心聽我講解，我這樣做是希望瞕瞕習慣每去到一個新地方，細心留意下現場環境，籍此培養他的觀察力，刺激他開口講野。目前都頗有收效。

 

臨走時我同醫生講聲「唔該晒」，瞕瞕又醒目地跟住我講「唔該晒」。醫生話佢發展得好好呀，不過奀左d，10.7kg，80.3cm

瞕瞕也會將熟悉的詞語組織成句，我聽佢講過的有

「我要玩呀」

「我要走呀」

「我要訓覺」

「我要奶奶，快d喎！」

「我要洗手，洗呀洗呀洗」

「我要擺戈度」

「bb要揹呀，bb會喊架」

「我要。。。」幾乎凡事都以「我要」開頭，難怪專家說過，小孩子的哲學就是「我的哲學」，一切都是自我中心。

Ps 呢個階段既小朋友，發音真係好搞笑。

出街百寶袋

而家帶瞕瞕出街食飯，我唔想為左令呢個小朋友安靜就俾部iPhone 佢（無得返轉頭），所以學柑媽咁準備左一個「出街百寶袋」。

原本我想揀個紅黑米奇款的袋，但瞕瞕自己睇中了這個小火車圖案，非買不可。

裡面裝住幾樣瞕瞕平時愛玩的小玩意，包括：字母金剛，穿珠仔，幾粒LEGO，一幅砌圖。

正常小朋友專注時間有限，我先至同時要帶咁多玩具出街，而且間唔中要轉下口味。

好似變形金剛咁，其實它是由一套26個字母組成，擰來擰去可以變成金剛。由於瞕瞕每次一熟悉了一種變身後就會厭倦，所以我次次都會換另外兩個字母俾佢玩。當變身方法唔同左，對佢黎講又係一種新玩具。

至於套穿珠仔，已經穿到滾瓜爛熟，近日我換左一套「穿鈕」。別看輕這些鈕，難度比穿珠仔大，圓圓滑滑的，瞕瞕經常拿不住，因此頗具挑戰性。更重要的是，我想誘導瞕瞕學下顏色。學顏色一事，一籌莫展，唔知佢幾時先識？

d LEGO就無咩特別，舊年既聖誕禮物，差唔多買左一年，不久前先開始識玩，自己砌高五六塊。再之前瞕瞕只會偷偷將d LEGO收埋落櫃桶（也許這個就是他的玩法），致使屋企每個櫃捅都有幾塊LEGO，分散分佈XD

幅砌圖搵左好耐，我心目中係兩塊一個，由淺入深俾瞕瞕試下玩。結果搵到Green Star出既，一副有六個，淘寶野，廿蚊咋。原單的品質非常好，出口去美國依然賣返廿蚊，不過人地戈邊係美金。瞕瞕識得將兩幅配啱一齊，但就未識砌落個凹凸位度，我好奇佢究竟係用顏色去分，定用圖案去分架呢？