24w5d：住院記(下)

30/01/2013 - 01/02/2013
由於篇幅太長，所以要分開上、下兩篇來寫。


從小到大，我從來都未試過腸胃炎，更從來都無住過醫院。第一晚0係呢度真係好唔慣。。。


心裡面好多野記掛，份工會點，屋企會點。。。我最多諗過攞到一日病假，卻估唔到要即時住院，而且唔知要住幾多日，只好每天打電話返公司向主管匯報。又唔知老公會唔會表面上唔太憂心，其實亂諗野呢。。。


在胡思亂想和噩夢連連間，我在凌晨兩點才勉強睡去，但清晨五六點又俾護士同助護搞醒。一個幫我聽胎心，一個幫我度血壓。兩邊數據都好正常，但都較之前虛弱。


好在d工作人員全部都好好人，佢地知道我係劇吐入院，特登在我床邊放置一個大膠袋，以備不時之需，每次有人睇我都問我仲有無嘔，我話無嘞，不過有d胃酸逆流，同埋胃口奇差。佢地亦根據我既訴求，不斷為我調配用藥和餐飲，證明佢地有細心聆聽，並唔係傳說中一間謀財害命的醫院。

我開始了解病理婦產科的作息規律，08:00早餐，12:00午餐，18:00晚餐，20:00宵夜，而在早午晚餐前的一個小時內，都要聽胎心同量血壓。大概9點零10點幾，就有醫生巡房。至於探病時間係13:00-15:00，or18:00-20:00。


老公每日都有上黎探我，仲帶埋99上黎，佢真係坐到夠晒鐘先捨得走，幫我往返家中拿換洗衣物。有次99一轉身走後，老公竟然返轉頭親了我一下。。。嗯有d安慰。在同一間醫院工作既姑姐，明明放緊假都過黎陪我傾計。最搞野係我阿妹，得返十分鐘都堅持要上黎，真係見左一面就俾實Q趕走左。事實也證明，最關心自己的永遠都是屋企人。


公司方面有好多電話，好在我床頭有充電插座。有同事打黎問我去唔去春茗，職務主管問我係咪繼續病假，人事部叫我儘快簽新約，前主管都要我返去簽分。。。也有其他同事打黎問候，講下人地是非之類，哈哈。


當所有人走晒之後，所有聲音都消失之後，身邊環境又迅速沉靜下來。唯一熱鬧就是用膳時候，能下床的病人都會自行到canteen等待開餐。雖說膳食是精心調配，可惜味道對我來說卻非常不好。我被安排的是"乾餐"，以早餐為例，就只有一個乾面飽和一片芝士，或一碗沒有湯的通心粉。午餐晚餐是沒有汁料，沒有油鹽的豬扒，或雞肉，少少蔬菜。健康程度是無容置疑的。(其他還有流質，糖尿餐，正常餐，但都不關我事)

 

住院這幾天，明顯地腸胃功能不好，胃口也不好，每餐我只吃得下幾口，根本沒吸收多少，瞬間覺得自己消瘦了，肚皮也扁了，連胎動也減少了，說不擔心也是騙人的。。。


不知外間日與夜，我廿四小時也有機會訓著，因為我百分之八十的時間都是躺在床上，靜得連點滴的聲音也聽到。我轉側身，輕輕地撫摸肚子，bb你還好嗎？想不到肚皮傳來輕輕的顫動，原來胎動一直存在，但可能是腸胃不舒服的緣故，感覺變得麻木而已，又或者身處在陌生環境之中，bb需要透過我掌心傳來的溫暖，才尋回那種安全感吧。當我發現這一種互動之後，雙手便離不開肚子，整天摸個沒完沒了。


住進這裡的病人，多半是為了安胎，我同房的兩個孕婦也是。其中一個因為頻繁宮縮，沒法自己穩定下來，所以醫生要她由25週住到28週，這段期間她全程要躺卧床上，即使吃喝拉撒，就連洗澡也不可以，每天清晨會有一個助護過來幫她抹身。另一個已過了28週，但同樣宮縮恐有早產之兆，所以也需要住院，安得一日得一日，膳食方面為她供應蛋白粉，催谷她的胎兒快些長大，即使萬一真的要生下來，也能較為強壯。


想想一個懷孕過程真的不易，要面對很多風險不足為外人道，因此我很是珍惜我現有的身體，少少的不適或是預知的陣痛我仍是願意承受的，只盼望安然等到那一天。

 

---

• 留言者: 小小媽媽
• Email: tamhiumei@yahoo.com.hk
• 網址:
• 日期: 2013-02-11 07:43:11

嘩澳門D醫院餐好豐富！
[版主回覆02/11/2013 10:44:31]我老公都話睇落好好食，但我覺得佢整比我既好食好多囉

---

• 留言者: 熊貓安安
• Email: an111an@yahoo.com.hk
• 網址:
• 日期: 2013-02-07 10:51:36

我之前都試過ketone +++要入院, 果d乾餐比起你呢d難食得多了, 係一pat pat冇味嘅米糊加白烚菜, 鹽都冇粒啊!!
[版主回覆02/11/2013 10:44:36]我戈d都無加鹽無調味個喎，真係唔慣，不過為左快d好返出院，唯有乖乖食飯

---

• 留言者: 大小姐
• Email: wing_smallsammi@yahoo.com.hk
• 網址:
• 日期: 2013-02-04 09:03:28

加油呀準媽媽
[版主回覆02/11/2013 10:42:53]我會架嘞，你都係呀