暗訓

睇過好多外國既育兒理論，都話要對bb進行sleep training, 即係要將bb的睡眠作息調整成有規律，而且要讓佢地自行入睡，唔抱唔孭唔好縱慣哂。好處是自細培養其獨立個性，同時大人又無咁辛苦。

在我三個月的產假期間，有積極地做到呢樣野。那段時間將瞕瞕放在床上，輕輕地拍佢心口仔，佢就會乖乖地自己訓著。

但在我復工以後，家人按照傳統的方法，就係用條孭帶孭起隻bb, 拍佢屁股仔，行來行去，直至訓著為止。所以而家孭慣左，每當瞕瞕有睡意，都要扭一大輪+搞一大輪先肯訓。

唉。。。我都明白家人是出於好意，話等佢訓林d, 有安全感之類，仲話個個細路都係咁，要孭到歲幾先識自己訓。可能佢地真係無見過人地科學育兒係點，我只係怕到時大家都辛苦，而這種辛苦本來是可以避免的。

不過既然孭開左，已經無得返轉頭，而家瞕瞕係要暗訓的。我始終唔想孭訓，我的做法是打直抱住佢，讓佢的頭靠在我膊頭上，拍佢背脊，唱首歌仔喑佢訓。

瞕瞕而家的重量已跟出世時有一段大距離，他的重量讓我感受到育兒責任的沉重。。。就在他釣魚般中中下，突然重重地落在我膊頭上的一刻，我知道他睡穩了，才大大地鬆一口氣。

然而我又想到，孩子成長的速度是飛快的，也許他很快就不需要我這樣做，而且他還是個男孩子，攬住佢訓的日子又能有幾年？還是珍惜於當下吧，我也喜歡他在我懷中撒嬌的感覺。

現在對他來講，我仍是他的一切，想來想去最終也䆁懷了。

我的工作

 哇，尋日做野唔覺意俾記者影左相，佔左半張報紙咁大篇幅。

留返起張報紙，等瞕瞕大個時俾返佢睇，同佢解釋媽咪返工做d咩。

臨近十.一假期，工作很忙。

特色兔仔燈籠

你地有無睇激戰呢？呢套戲有兩個主要points吸引我，1）以boxing做劇情主龫，2）在澳門取景。

我比較有印象既一幕，在中秋夜，一群小孩提著燈籠，歡快地穿過大街小巷，背景是充滿葡萄牙殖民地色彩的建築，戈一幕係在婆仔屋拍的。

婆仔屋已有400年歷史了，而家係一個藝術創作園地，裡面既一磚一瓦都還原了當時的模樣，入內探訪就好似時光倒流四百年咁。

每年中秋節，佢地都會掛些傳統手作的兔仔燈籠出來，供人欣賞。我地在天兔登陸之前，趁天氣還好，決定帶瞕瞕睇下。

這個地方離我地屋企好近，所以直接推bb車過去就得。

沿途既夜景都幾靚。我同老公喺度影過婚紗相ga。

估唔到瞕瞕咁鍾意睇d燈籠，想擰佢塊臉過黎影下相都唔得。不過算啦，三七面又幾靚仔喎。

呢度有間葡國餐廳，叫做1601，個名用來紀念婆仔屋於1601年建成。

我同老公都黎過一次，戈時已經有左瞕瞕，但佢喺我肚入面只有一粒細胞那麼大。戈餐食左400蚊，餐劵在groupon買的，係正式西餐，係咪好抵呢？

眨下眼，咁就過左一年。瞕瞕也由一粒細胞變左一個bb, 不過泊埋爸爸度，依然好似一粒骰仔咁細。唔知你幾時先長到爸爸咁高大呢？

iPhone 學習卡 for bb

得到公司關照我餵緊人奶，每日提早在下午2點9就可以收工，於是我有了很多同瞕瞕一齊的時間。

 

這個餵奶更只會持續一年，之後就變返輪間，輪到夜晚10點。餵奶更日子實在來之不易，我要將它變得有意義。

多出來的時間是瞕瞕帶來的，所以我會將它全部用返哂在瞕瞕身上。除左行公園，玩遊戲，我仲打算買套flash卡，等佢認下公仔。

不過我驚紙本flash卡會整親小朋友隻眼（其實幾十年來都係用呢d啦，包括我自己，可能係我多慮），我便試下有無d多媒體學習既flash card, 點知又俾我搵到喎，仲幾好用添。

喺呢度同大家分享下我發現的I phone apps:

我覺得最好用既係呢個baby...cards, 裡面全部都係實物圖片，配埋聲音，非常利於學習和記憶。

例如一出呢張飛機圖，就會聽到飛機在高空穿過雲層的呼嘯聲，出呢張蜜蜂圖時，又會有蜜蜂拍翼的嗡嗡聲。

我覺得瞕瞕好鐘意呀，一來d圖畫colorful, 二來d聲音又得意。一開呢個apps俾佢，即使本來在哭鬧（也許悶壞了），都會停下來全神貫注去聽去睇。

類似的apps還有很多，我只是拋磚引玉。另有一個係好搞笑好誇張的，叫做Genius baby, 卡片的難度很高，例如咩硤谷呀，岩洞呀，懸崖呀，對於"baby"黎講會唔會太難呢？Haha.

中秋節，郵輪睇煙花

i每年中秋節，除左食月餅同賞月，仲有個特備節目，就係我地公司主辦一年一度既煙花節。

 

為左俾全家人舒適地欣賞煙花，渡過一個愉快的晩上，我選擇左遊船河這種方式。

國通號係澳門唯一一首郵輪，由內港碼頭出發，航線途經媽閣，西灣湖，旅遊塔，航程約一個小時。不過煙花之夜特別d，連自助餐兩個半小時。

臨開船之前，影張相留念先。

 

隻船有三層。一樓中式（做旅行團生意），二樓西式，頂樓則是露天的觀光層。

 

 

 

而家的小朋友真幸福，咁細個就跟我地周圍去，見識咁多野。

 

 

自助餐。。。還好啦，其實我真係食唔慣魚生，所以有炒蟹，龍蝦，帶子已經心滿意足了。瞕瞕見到大人食野，佢又起勁啜下自己的手指仔，哈哈，樣衰衰咁。

 

 

 

之前我download 左個聲音apps，諗住用來刺激下瞕瞕的感官，其中就有段煙花聲，令佢接觸真正既煙花時都唔怕驚驚。不過佢依然太細個嘞，未明白係咩一回事，等佢大個d再帶佢去睇。

 

 

題外話。

我個大姨甥仔都好鐘意睇煙花架，可惜我妹妹有時要返夜，或要照顧細佬，帶唔到佢去，令他十分失望。如果第時我個仔鐘意睇，我時間又就到的話，我一定會帶佢去既，仲會教佢用腳架，黑卡同快門線，認認真真地影煙花相，讓他學懂如何留住最美麗的一刻。

我估個個細路都係鐘意睇煙花的，我記得細個時無人帶我去，無得睇，偷偷地躲在被窩哭起來，因此我十分明白姨甥仔的感覺。如果我可以，我都會盡量滿足小朋友這些簡單的渴望啊。

說聲再見

各位親愛的 bloggers, 我決定將yahoo blog 凍結備份了，因為只有這樣，我才能完整地將yahoo blog搬到 google 的 blogger, 也只有一切準備妥當，我先會有心機繼續寫blog.


其實為左這件事，我都有成個月無寫blog了，瞕瞕的成長紀錄亦因此斷開了一段時間，多不好啊！


一件事情的結束，必然是另一件事情的開始。讓我們在新地方裡重聚！我的新家地址在：


http://seekinbb.blogspot.com


謝謝探訪。


搬blog 都不會完全是一件壞事。blogger有一個極大的優點，就是它有相對應的apps, 即是可以直接在手機寫blog, 甚至up相，非常方便。所以我仍願意接受新改變。


既然方便，以後便會多寫新blog.

搬遷前奏

唔知係咪因為我天機星（主變動）入命的緣故，搬家的次數也特別多。


我不是迷信，只是為這篇blog尋找一個開頭而已。


由細到大，發生在我身上的搬家事件，少說也有十次八數之多。。。隨著年紀愈大，私人物品愈來愈多，搬家就愈來愈煩惱。


目前我經歷過感受最深刻的一次搬家（將來或會有更深刻的，例如移民），就係從大三巴搬到而家住緊呢度，我思想掙扎了很久，因為那次搬家不僅僅是搬家，還意味著我脫離了單身行列，從此擁有一個家庭。


記得遷出的一個月，看著這個獨居了六年的地方，屋內的一瓦一物，還有樓下舖頭伙記日日同打我招呼的熟悉臉孔，內心泛起了無限感慨。在最後關上門離開的一刻，我拍下了這張相片，往後在這裡的一切只能變成回憶了。

當年我二十九歲，行緊轉角運，自知生命中必有重大轉變，縱然對過去自由自在的生活十分不捨，但我總不想永遠自己一個人，而我深信婚姻是令人完整地成長的路，所以也釋然地接受了。


婚後生活尚算穩定，一年後我便有了瞕瞕這個小朋友，閒來寫點blog, 以紀錄他的成長。為了找到更多可以交流的blog友，我選擇了yahoo blog.


一段時間下來，我又真的對裡面的排版和同期生bb的blog媽們產生了感情。


一聽到yahoo blog話結業，我先是愕然了一下，接著心中一片茫然。不管我搬blog到哪裡，都要重新開始，陌生的感覺猶如置身於公海，茫茫大海中的一條船。


但搬，當然是要搬，而且要繼續寫。我說過，我寫blog的用意是恐怕有一天我老了，記憶不再清晰了，瞕瞕都能夠自行在這裡找回屬於自己的成長證據。甚至有一天我突然不在了，他也可以在我的字裡行間，發現有一個曾經這麼深愛他的媽媽。


照顧瞕瞕的日子很忙。無獨有偶地，公司又在同一時間話要搬。近日我都忙於執拾，pack箱，清點。。。回到家中已有點累，但我仍要抽些時間研究搬blog既事。


Yahoo blog有提供下載備份，需注意的是，一旦申請了備份，整個blog就被凍結，不能再寫東西的了。咁何時才申請備份？這是一塲與時間競爭的遊戲。


我想摸清楚整個路向，甚麼XML, MT檔，blogtrans先一次過執行。目前最有望的是10月11日起，放一星期大假。不過我也驚夜長夢多，其實一準備妥當我都會立即整。


這裡公佈一下我的新網址先：


http://seekinbb.blogspot.com


快d加返我啦，雖然而家未有野睇，遲少少會有的了。

---

• 留言者: Mi Mi
• Email: wong_ju_lee@yahoo.com.hk
• 網址:
• 日期: 2013-09-13 17:31:29

why i can not find ur new blog?
[版主回覆09/13/2013 21:58:07]下，你直接入呢個網址咪得囉
http://seekinbb.blogspot.com
[版主回覆09/13/2013 21:58:01]下，你直接入呢個網址咪得囉
http://seekinbb.blogspot.com

---

• 留言者: samsamdandan
• Email: samsamdandan@ymail.com
• 網址:
• 日期: 2013-09-11 14:20:01

加左了.....
對啊......感覺猶如置身於公海，茫茫大海中的一條船<---好同意，新卜，好難用...嗚.....

無記性無耳性

昨天中午，突然間醒起有位好友近日結婚，卻遲遲未見佢話派帖俾我，於是開Facebook 諗住留言提下佢。但一開收件箱，竟然見到有以下一段對話：

星期四俾你ok ma?

Ok ok.
 

段對話大概在一星期前發出的，奈何我完全沒有印象。星期四，咪即係當晚？好在睇一睇姐，否則就連個約定都忘記埋。如是者，我又再留言confirm:

 

係咪今晚搵我？

係呀，方便嘛？

得呀。

放工6點黎搵你啦。

好呀。
 

點知我抱住仔餵完奶後，將佢放在床上一齊玩。玩玩下手機有來電顯示，拿起一聽對方就話已在我屋企樓下。
 

下？喺我屋企樓下做乜？？

 

 

救命！我又再次忘記件事。唯有請求朋友原諒，話馬上換件衫落樓，好在佢都無怪我，仲主動攞上黎俾我添。

 

我覺得相當震驚，難以置信自己會無記性到這種程度。其實之前都有試過咁，經常忘記出廳想攞乜，結果站在客廳中間一片茫茫然。

 

還有很多話到口邊的名字，街名，成語等等，諗極都諗唔到。我的記憶能力好像在短時期之內急劇下降了。人地話生完之後蠢左，應該就是這樣的感覺了。唔知其他媽媽會唔會咁？

 

不過我又唔係太擔心，因為我好耐之前已經聽過點解會咁。話說生完之後，由於要花很多心力去照顧小朋友，個腦的運作就相對變慢。身體太疲累了，如果還要集中精神去想事情，會元氣大傷。所以這都算是身體自我保護的一種機制。
 

這種情況至多會持續一年，然後好轉。就像產後脫髮一樣，暫時無藥可解。

有反應了！

星期日，我如常返工，而老公就有假放。但瞕暲蝦佢，哈哈，所以湊仔有可能辛苦過返工架。


唔知點解老公諗到打開部iPad俾瞕瞕睇下我的相，點知瞕瞕又真係好鍾意睇。於是老公就話嘗試用微信的視像通話，等我氹下瞕瞕。


果然，一開通左個cam, 便已聽到瞕瞕在哭鬧。唔通係爸爸服侍得佢唔夠好，在發出抗議？記得我講左第一句：瞕瞕，你係咪揾媽咪呀？

想不到瞕瞕即時安靜下來，很專注地聽，頭仔兩邊擰擰在尋找聲音的來源方向。



喂，媽咪在呢度耶~

瞕瞕的視線與我隔空對上的一剎那，他小臉上展露了一個大大的微笑，我覺得很震撼很感動，因為無疑地他認得我。在他的印象中，我一定是經常給他溫暖的那個人。

我㧓緊機會同佢講多幾句：係咪好掛住媽咪呀？乖，媽咪一放工就會返黎陪你的了。他又張開了嘴巴在吚吚哦哦地回應我。

這個甜心寶貝兒，是你使我在忙碌的工作日裡添上趣味。

---

• 留言者: Snow
• Email: suki_hkhk2005@yahoo.com.hk
• 網址:
• 日期: 2013-09-09 16:14:53

My blog: http://snow123snow.blogspot.hk/

---

• 留言者: 艾利絲
• Email: irischow_2000@yahoo.com.au
• 網址:
• 日期: 2013-09-05 13:57:49

好sweet呀

---

• 留言者: 妹豬
• Email: laumuichu@yahoo.com.hk
• 網址:
• 日期: 2013-09-04 11:28:35

瞕瞕好叻呀~咁快認得你把聲
我會搬去blogspot,keep in touch
http://mui-chu.blogspot.hk/
[版主回覆09/04/2013 15:57:09]我都開左個新地址, 但唔係好識用, 你試下將我加入社交圈?
http://seekinbb.blogspot.com/
其實我還在考慮緊xuite和wordpress, 未有最後定案. 還是3個都可以同時點對點搬家呢?

---

• 留言者: 周師奶
• Email: cmchau27@yahoo.com.hk
• 網址:
• 日期: 2013-09-03 15:52:57

我搬去呢到呀
http://mrschauc9.blogspot.hk/
[版主回覆09/04/2013 16:03:19]加左你了
http://seekinbb.blogspot.com/

---

• 留言者: samsamdandan
• Email: samsamdandan@ymail.com
• 網址:
• 日期: 2013-09-02 17:51:30

瞕瞕好得意呀，佢一定係聽到你把聲又認得你啦
「很震撼很感動」，睇到都覺得好感動