瞕瞕近況，23個月大

交待了自己旅行的首個篇章外，可以update下瞕瞕最近的發展。

1歲11個月大的瞕瞕，儼如一個小人仔，佢同周遭既社會拉近左，好似咩都關佢事咁。佢變得有主見，會吐露佢既想法，學識觀察環境，甚至同大人講數。 

 

愈來愈喜歡返托兒所，佢對返托兒這件事有一個清晰的概念，朝早起床穿衣梳洗後，佢會話「去梁姨度」(班主任的名字)，會要求自己揹個書包仔。沿途指東指西，係咁話「呢度呀呢度呀」，好似真係識路咁。有時見綠燈閃緊，我抱住佢加快腳步過馬路，佢會為你吶喊加油「媽咪快d媽咪快d~」

 

最開心係佢會同我講少少托兒所既生活，我問佢「梁姨度有咩玩？」佢答我「玩玩具，有車車，砌積木」；我問佢「咁有咩食？」佢答我「有蘋果，提子，香蕉，奇異果，面面」期待你會同我分享更多事情。

 

在托兒所學識唱很多歌仔回來，可以完整唱晒成首，還會配合動作，非常可愛。「大西瓜，真好吃，個個都想食；大西瓜，切開它，味道頂瓜瓜。唔小心吞左丫，點算呀？頭頂長西瓜~」童聲稚語的音調令我繞樑三日。

 

我相信瞕瞕喜愛學習。在我幾乎沒有教過佢既情況之下，佢在托兒所認識了大部份英文字母，數字，形狀，而顏色就未得，畢竟可能比較抽象吧。不過有時佢會撞手神up中黃色和橙色。

 

曾經落後的大肌肉動作，逐漸追返同齡，終於識扶欄上梯級玩sir滑梯，也有賴於我不歇地帶佢去大廈後樓梯練習，強化大腿肌肉。

 

自理能力方面，筆飯有進步，我餵佢前半碗，佢自己食後半碗，touchwood唔駛太勞氣。除鞋除襪就唔叻嘞，淨係識坐0係度伸隻腳俾我，話「媽咪幫我」，我話你試下啦，佢係咁以扮整左兩下，就苦起小臉說「我唔識架」。不過同事叫我唔好太緊張，兩歲之後再慢慢train也不遲，況且托兒所是一定會教。。。到時可能在群眾壓力之下就學得識了。

 

未致於會講到好長的一段說話，但表達形式多樣化左。叫佢入黎沖涼，佢話「踢埋波波先」，叫佢快d食埋啖飯飲湯，佢話「食埋飯飯先」。開始識同人講數了。

 

瞕瞕對我的愛特別深，見到我主動叫十幾廿聲「媽咪」，媽到你暈。如果唔係我去接放學，瞕瞕會問來者「媽咪呢？」在家裡無時無刻要黏著我，我去了廁所，他就在門外等等等，不時發出幾聲悲鳴，我唯有隔門同佢傾計，佢聽到我的聲音便會寬心下來，更經常要我陪佢坐在Playmat上一齊玩，不論玩甚麼都好，總之有媽咪陪著就好，能夠專注很久。

 

有自己個枕頭唔訓，成日訓左我個枕頭，我問佢「做咩迫住媽咪呀？」佢給了我一個無懈可擊的答案「我鍾意媽咪」。這句說話在我心中泛起了一波又一波的漣漪，久久未能平息。