好想時間即刻去到2016年9月

甫踏入2016年第一日，教青局已率先公佈各間幼稚園K1面試時間，由二月尾橫跨至整個三月。而我亦早有準備，攞定假陪考。

面試既時段係冇得揀的，教青局提供的時段，原意係俾你在報名時自行錯開d日子。但我又覺得唔係重點，因為心目中既定要報邊幾間，就無論佢喺邊日考，照報可也；並唔會為左唔撞日期，而去報一d根本唔諗住讀的學校。

澳門政府推出的中央報名新策略，係第一年試行。上網報名就得，最多報六間，唔駛好似往年咁，排幾日幾夜，餐風宿露只為了一張報名表，間間咁排法仲得了？可以話，我同瞕瞕係新政策的第一批受惠者。

選校方面，當然是近家的。一線，二線，三線學校我都有報。花落誰家我倒不是十分在意，畢竟戈六間都係出於初衷選擇。

緊接著的日子應該會很忙。其一要請工人姐姐，事關瞕瞕正式上學後，情況會比目前複雜，99不再方便接送，加上99日漸年老，總不可能一直幫忙到瞕瞕能夠獨立上學，長遠而言我地仍然需要工人。

我地商量過，待瞕瞕考完入學試，我地才會申請批文，搵工人試工，原因係唔想呢一刻轉換新的照顧者，令瞕瞕情緒唔穩定，而影響到佢的考試表現。幸好99會繼續幫我地湊住瞕瞕先，俾充足時間我地試工人，搵到好為止。

之前有在「每月發展」的blog文中，提過瞕瞕前囟門仲未閉合的問題，由於這case萬中無一，經專科評估後，下個月要作進一步檢查，包括驗血和住院。相比起考學校、讀邊間，呢件事我會更上心。

這種心情我相信你地都會明白的，所以我真係好想時間一下子去到今年9月，過左醫院戈關，請到好工人，瞕瞕安坐在K1課室裡。。。所有事情settle down。

PS 2015年12月31日 count down