由於初為人母太興奮的關係，訓在床上無乜睡意，見凌晨12點都未有人黎叫我起身餵奶(佢地係逐間逐間房，逐張逐張床叫，只係未輪到我姐)，我便自行走到育嬰室對面的哺乳室視察環境。
日間姑娘教我在自己張床躺著餵奶，但到了哺乳室則要坐著手抱餵奶了。正確姿勢是背脊挨住椅背，雙腳腳板撐住地下，手臂托著bb的後尾枕但腰不能彎，所以膝頭應該搵d野承托著，於是我又返入房攞個枕頭墊住。
成個產後房有成40個媽咪生左，但哺乳室卻只見3位出現，已包括我。咁即係其他30幾個媽咪都選擇夜晚唔起身餵，交俾姑娘。bb一餓就會呱呱大哭，嘈到咩咁，做到d姑娘同助理都踢晒腳，少不免有些埋怨。個助理邊做邊嘆氣：唉，d太太又唔肯起身餵，我地又唔夠人手，都唔知幾時先餵得完，如果佢地見到自己個b喊得咁凄涼，一定心都痛埋。
那一刻覺得自己懷中的寶貝很幸福，可以埋身食到媽媽奶。然而傷口貼著硬邦邦的坐椅真的超痛，加上bb每啜一啖，個肚便那住那住痛，姑娘解釋說是子宮收縮痛，由催產素定催乳素引起，但有助子宮迅速復原。。。可謂痛楚的雙重體驗。但儘管如此，母愛的流倘使我能暫忘這些不適。
聽講以前係唔駛出哺乳室餵的，會有人抱個bb去你床度，但後來好似出過意外，所以院方唔會再咁做了。而我就覺得出哺乳室比較好，一來有人睇住，二來個人精神d，三來姑娘又會教下我地野，我地幾個奶媽又可以互相交流下心得。
每次餵奶時限是半個鐘，下輪是凌晨3點和6點，當然我還有繼續出現，另外兩位媽媽也是。我餵完6點戈輪就放心訓一教等8點食早餐。
昨天因為仲吊緊針無出canteen食早餐唔知，原來早餐時份是會播放一些教育片，包括點樣幫bb換片，洗臍帶，沖涼，著衫，辦理bb出院手續，預約兒科保健和產褥檢查。。等等，我好有心機睇，從中都學到唔少野。
一食完早餐，姑娘便會催你認領返自己個bb，自行照顧。呢一樣就係山頂同鏡湖最大唔同既地方，山頂差不多要你全程自己湊返，如果驚辛苦一定要去鏡湖生，鏡湖會在你出院先俾返bb你。我本人就很buy母嬰同室，見bb第一面之後根本一直掛住，我好享受同bb獨處既時光，醫院有人睇住我地，我又可以專心學習同熟悉點照顧你。
不過唔係個個都頂得順，試過有人在山頂生完，先至知道竟然要自己湊返bb直到出院，完全接受唔到，結果翌日便急不及待要求出院，起碼屋企會有人幫手。其實我都爭d頂唔順架，畢竟傷口真的很痛，上床落床都要就住就住，活動能力好似喪屍咁，超可憐。但我也深深地明白，出院之後都係要靠我自己，否則怎會堅持到。
10點幾，鬼佬醫生又黎巡房，他觀察完我傷口說明天可以出院了。意料之中，而家床位咁緊，如果無乜事又點會俾我住得耐？但佢就同隔離床個太太起左d爭執，內容大概係個太太谷奶要求止痛藥，但醫生認為谷奶既解決方法當然就係餵奶，除非唔餵，咁佢就直接開回奶丸，總之唔會開止痛藥。姑娘翻譯醫生的說話，俾太太兩個選擇：一)餵人奶，而且一定要埋身餵，佢地會開始吩咐育嬰室不再給予水奶(即奶粉)；二)不餵人奶，開回奶丸唔駛煩。
但我聽得出個太太既不想服食回奶丸，但又不想埋身餵人奶，佢調返轉向醫生提議：育嬰室繼續給予水奶，而佢會等出院唔痛嘞先開始餵人奶。醫生聽完勃然大怒，若谷奶無法及時排清的話，最壞既後果係乳腺炎，要做外科手術排膿。佢裝一裝個病歷表，鬧個太太諗野太天真，"30 years old already, but it seems nothing ready to be a mother!"
最後個太太死死氣答應餵返人奶，醫生即時了斷話，咁我落命令叫育嬰室唔再俾水奶你。佢地行開後，太太走埋黎我度呻，d醫生護士都痴線，係咁迫人餵人奶，山頂鬼死咁孤寒，連枝水奶都唔捨得俾。我自然好言相勸，佢地都係為你好姐，谷奶都係要快些清空好，唯有努力d餵bb，否則一旦搞到乳腺炎要做手術就大件事嘞。後來一個產後護士親自幫佢按摩通返乳腺，仲一面讚佢d奶幾好，唔餵極之可惜。反而我到這個時候仲未上奶，有少少羨慕佢。
午餐係魚尾飯，整得好腥，令我胃口持續不好，好在中午99攞過黎既湯水好味咋，補返。今日係嫲嫲第一次抱bb，bb眼仔碌碌望住嫲嫲，好似識聽佢講野咁。跟住仲有舅公舅婆，公公婆婆上黎睇bb，大家一致認同bb個樣似我。隔離床太太d親戚都過左黎吹水，仲無心咁問我bb係咪早產，sigh。。。我都唔係好明，點解bb明明有6磅1，但睇落咁細粒，似隻5磅的貓仔。
連續兩日，老公都一個人陪我，留到保安清場趕人先捨得走(其他探訪者最多來打擾半個鐘)，佢對這個小生命真的感到非常疼惜。佢見到人地從育嬰室出出入入渣住枝水奶，便問我有無問佢地攞一枝餵bb。我話我係全人奶，唔補奶粉的。佢很疑惑既然我未上奶，又唔補奶粉，咁bb食乜維持生命？關於這一點我同樣充滿問號，因為我雖然有埋身餵，但事實上我一滴奶都未有呀！老公焦急了，係咁催促我問姑娘。咁啱有個姑娘在身後經過，主動地解答左我地。佢話bb係帶住能量從母體娩出，開頭可以幾日幾夜唔食野都得，直至媽媽上奶，佢會幫我地監察住bb的大小便，以評估這種能量是否消耗完。
下午又發生同尋日一樣既事件，打開條片發現有胎糞，今次我可以自己搞得掂嘞，不過我同時有個疑問，人仔細細，痾左兩次咁大pat既野，腸胃應該清晒喇呱？體內仲可有能量剩低？係咪要叫姑娘開始補奶粉？諗下諗下都係好唔放心，便行下入育嬰室搵姑娘問過究竟。
點知我見到母乳講座個姑娘呀，佢都好似有少少認得我，事關戈日落住雨比較少人上去聽，加上我老公又捉住佢問左好多問題。我同佢講我無奶驚餓個b，唔知點算，佢反問我有無飲足夠既水，一日3公升，餵奶前後各一杯，我話有呀；佢又問我有無食錯野，豬腰，白鴿，紅棗，桂圓是但一樣，我話無呀。佢話ok轉頭黎幫我。
一分鐘後佢就去到我床邊，按左我個胸幾下，就擠左滴好細既乳白色液體出黎。佢理所當然咁話，呢d咪奶囉！而且係好珍貴既初乳。好驚喜！不過佢話有少少杰同埋份量未夠，叫我再飲多d水，繼續努力俾bb啜，啜下啜下就有架嘞。覺得呢度d產後護士都好專業，好感激佢的幫忙。
皆因大部份會探我既人已上過黎，所以這天晚上無人探訪，我也樂得清靜。我慢慢地完成了晚餐－菜心炒飯，算係咁多日以來最好既一餐。我sent左張相俾老公睇，佢都話唔錯。跟住既時間就上網同老公傾左陣，佢匯報一下執拾屋企既情況，bb床已送來放了在哪個位置等等。反正住院期間有人照顧我同bb，老公決定呢幾日照常返工，等我出院先用佢d侍產假，前後連星期六日有10日。
唔知係咪精神鬆懈左。凌晨3點戈輪助理入黎叫我起身餵奶，我第二次至知醒。我聽到佢問我一句：係咪唔餵喇？我拿拿聲仆起身攞住枕頭奔去哺乳室。人多左，有5個媽媽，仲有個姑娘好好心機同我地分享餵人奶的成功要訣。佢話埋身奶係好緊要好緊要的，特別是半夜，半夜餵奶能刺激造奶機制，日間都會多d奶。如果可以，最好唔好泵奶，因奶泵只是負壓原理，可能會愈泵愈少，bb個嘴仔先係最強而有力的吸奶器。
相對起其他幾個媽媽一路餵bb一路訓，即使掃風風都唔醒而要停止，其實我個bb好勤力不斷博命吸，只係遺憾我仲未有足夠既奶餵佢，我有d懷疑佢係咪吸緊空氣。
- 留言者: 黎生黎太
- Email: py_chung1030@yahoo.com.hk
- 網址:
- 日期: 2013-06-11 04:44:39
[版主回覆06/11/2013 12:38:11]好開心聽到你話今次成功左, 我在生產的醫院裡面的確學了不少哺乳知識, 可以行到全母乳這條路有賴他們幫忙. 目前也餵了短短一個月, 希望能繼續下去, 至少到3個月! 甚至是WHO的6個月啦! 其實bb是帶著母親10個月的能量先出世, 唔食野都可以頂得順2, 3日, 一般的產婦亦要第2, 3日先上奶, 時間配得得剛剛好.
[黎生黎太回覆06/11/2013 04:48:13]我地一齊加油，餵母乳有時真的好累呢！
- 留言者: 檸檬BB女
- Email: joyce81580@yahoo.com.hk
- 網址:
- 日期: 2013-06-10 16:09:44
我都想全人奶。。。不過放完２個月產假返工就真係擔心之後餵唔到。。。我８月尾聽母乳講座喇～希望到時認識更多， 可以下定決心喇！！
[版主回覆06/10/2013 16:19:09]記得有母乳講座, 分娩知識, 分娩呼吸技巧.. 一定要去聽, 真係有幫助
如果我唔係分別在唔同既地方聽左3次母乳講座, 都唔知母乳係咁好架, 可能亦未必會咁落力
其實返工之後唔係話餵唔到人奶, 而係未必可以全人奶, 我既計劃係補奶粉, 放工再埋身餵,唔知得唔得呢??
遲些少我會另外寫篇blog,關於我餵母乳既心得, 多謝支持呀
- 留言者: 傻婷
- Email: g_annali@yahoo.com.hk
- 網址:
- 日期: 2013-06-08 18:38:23
[版主回覆06/08/2013 23:21:44]哈, 乜成篇野你淨係留意到呢樣野ga, shy shy
- 留言者: Mi Mi
- Email: wong_ju_lee@yahoo.com.hk
- 網址:
- 日期: 2013-06-08 08:30:11
[版主回覆06/08/2013 16:00:33]當我完成＂3日人仔，我在產房的經歷＂，就會開始寫我既全人奶經驗架嘞，多謝支持
沒有留言:
張貼留言