過動症憂慮

瞕瞕出世無耐，嫲嫲同爸爸已成日話驚佢有過度活躍症，講笑咁話要帶佢做評估。當時我梗係覺得佢地實在太誇張，講真細路有邊個唔曳？唔曳你就驚咯，特別是男仔添。

但現在瞕瞕進入了一個頗難湊的時期，令我也在疑惑到底佢只是好動，定真係有潛在性的過動症？

雖則過動症呢家野，應該喺小朋友3歲讀書先至開始見章，不過亦有專家話其實過動症在嬰兒時期已可略見一二了。

根據專家觀察到既症狀，瞕瞕都好似中中地，令我在近期的日子裡，更不斷地睇更多相關既資料，為求了解清楚多些。

至於專家所講既症狀包括：

1）睡得少。

瞕瞕一直都訓得咁少，正常黎講，初生嬰兒應該食飽訓，訓飽食，日訓夜訓，而就在我坐月戈個月，佢有好多次試過連續五個鐘都未訓過，令我完全不能休息，產後抑鬱由此爆發。

放完產假三個月，我返回原職位，受到＂餵奶更＂的優惠待遇，好多時下午兩點九就可以放工。但我幾乎每日近到屋企，99都會同我講： 自從你8點鐘出左門口，你個仔一分鐘都無訓過。

我心裡是納悶的，邊有bb訓咁少架？？保健時我鄭重地問過醫生，醫生反問返我咁瞕瞕有否表現不舒服，我話無不但止，佢仲鬼打咁精神，醫生話即係無事，可能個個bb作息都唔同。

瞕瞕唯一訓得比較長既一段時間，就係由夜晚八點幾訓到朝早七點幾，中間仲會醒兩三次，勉強訓到十個鐘。對比返同齡既bb, 訓十個鐘真係好少好少。

2）愛哭鬧

瞕瞕未至於無理取鬧，但也非常扭計。佢好細好細個時，俾人抱住要不停拍pat pat, 一停就喊。唔肯訓bb床（即使擺一陣都唔得），唔肯坐bb車，唔肯自己一個人。對於同一樣野好快就會悶，例如我揹住佢，在超市貨架前睇洗頭水，開頭佢都有興趣睇一陣，但唔夠30秒佢會迫你走，睇過第二樣。迫到你行來行去，不停地換d新奇既野。

唔肯坐bb車呢樣野真係好愁。試想像我地一家人出去食飯，我，老公，99要輪流抱住瞕瞕，眼見人地的bb都係自己坐bb車，然後一家人可以輕鬆自如地用餐，我地心裡面有點不是味兒，每餐都牛趙牡丹。

睇過BK原來亦有一些bb係咁樣的情況，有人既見解係如果佢喊有得佢喊，習慣了就好。但推得bb車出街食飯都係公眾場合，無理由由得佢喊，騷擾到人家就不太好。

不過瞕瞕被抱住會超開心，而且佢會要求打棟抱，可以睇到花花世界，心情大好時仲會周圍聊人，Aey~ 如遇上友善的臉孔回應他，他更會開心得手舞足蹈，樂此不疲。

就算無人聊佢，佢都要踩在你大腿上跳來跳去。

扮鬼扮馬功力一流。

綜合起來瞕瞕的性格是閒不下來，而且經常處於亢奮狀態。

3）到處亂爬

雖然瞕瞕呢一刻仲未識爬，但佢近日突然學識左翻筋斗，在無人教佢的情況之下。佢將頭埋在床面，拮高pat pat就碌左過去了，不停地碌來碌去，五個幾月咋！

而家我訓低埋身餵時，佢更會不停地踹我大腿，而事實佢隻腳只要碰觸到任何物件都係咁踹。就算不是過度活躍症，也將會是超級頑皮。有預感我地好快會進入看牛階段。

由於上次既斜頸事件令我操碎了心，現在我們會更加關注瞕瞕一言一行的發展。在幼兒的成長路上，原是一步一驚心。

寫左咁多野，有無覺得我有杞人憂天的成份？當然仲有一個重要考慮的因素，就是瞕瞕父系家族那邊，有過度活躍症個案，也有自閉症個案。

不論結果如何，我都會傾盡心血教好瞕瞕。