瞕瞕十五個月大

有幾篇blog寫左個開頭，但都未有時間/心機/靈感去完成。不過我想分享左呢篇先，因為瞕瞕剛好十五個月大，幾有意義，又是成長路上的一個里程碑。

先講下一天的生活流程：

07:30 起身食奶（8安）

08:00 出門口返托兒所

08:30 到達托兒所阿姨手上，量度體溫，做早操，飲水，排洗

10:00 體能遊戲，或小肌肉活動，或音樂堂

10:20 小息，排洗，吃水果

10:45 體能遊戲，或小肌肉活動，或音樂堂

11:05 自選玩具（唔知瞕瞕會揀個咩玩具呢？我都好好奇）小息，排洗

11:30 午膳

12:30 飲奶午睡（6安）

15:30 起身，飲水

16:00 下午茶

16:45 接放學返屋企

18:30 晚飯

19:00 自由活動（其實只是搞搞震吧）

20:00 洗白白，玩水

20:15 親子時間（陪佢一齊玩玩具，講故事，唱歌)

21:00 食奶睡覺（8安）

食

瞕瞕返托後，基本每天只在家搭食一餐，而戈餐亦多數由99代勞，通常在阿嫲的淫威下，瞕瞕都會乖乖食晒一碗。爛飯的餸有豬絞肉或魚蓉，配以蕃茄，或南瓜或西蘭花。

好鍾意食水果，特別是奇異果和蘋果，也有吃橙，香蕉，提子，西瓜。由於佢有餐後吃水果的好習慣，又肯飲水，所以從來都沒有為便秘問題苦惱過。

前幾日試下俾佢自己吃橙，佢似玩橙多d。佢用力揸d橙汁出黎，再放進口中品嘗咩鮮味。弄得橙汁四濺，事後當然要為佢清理了一大輪。因為怕清理，99就更不會俾佢自行食飯。不過好在托兒所係有大把機會俾佢學食飯的，清理這回事，也就交由阿姨去搞吧。。。我地係咪好衰^___^

另外都有俾餅乾和面包之類的零食。

大小二便

差唔多日日都有便便。雖然未開始戒片，但瞕瞕識表示佢poo poo左，佢有時會講「弊啦！」，有時會用手禁住下面，等人幫佢換片

能力發展

大動作

仲未識行，真係估佢唔到。而家我會手抱住佢返托兒所（之前用bb車），路程廿零分鐘。我想行一段又放佢落地自己行一陣，練習多d，拖佢手可以行到20-30米吧

精細動作

可以用母指和食指指尖執起小物品，甚至頭髮和砂粒。識入彩虹圈，cup蓋，打開包裝紙盒，逐頁掀紙本書等等。我物色緊一套積木俾佢練疊高高，還有釣魚等玩具

語言

這是相對於瞕瞕自己，發展得最好的一項。佢可以講雙音節的詞，發音頗為清晣。一個月前佢仲叫緊「媽媽，爸爸，嫲嫲，姨姨」，而家會叫「媽咪，爹哋，阿嫲，阿姨」。

會催我地「快d」，甚至識得將「快d」和其他野組合在一起，例如「快d奶奶」，「快d街街」，「快d」呢個字幾好用，可以即刻得佢想要既野。通常我地都會盡量滿足佢，鼓勵佢學講更多既野。

識得講「唔係！」「唔制！」「唔得！」，並且真係明白代表咩意思。有次公公上黎探瞕瞕，99話：「呢個阿公黎架，叫聲阿公啦」，點知瞕瞕同佢唔熟，耍手兼擰頭話「唔係呀，唔好架~」，跟住走鬼左去，笑死我地。

帶佢去玩秋千搖搖板，話夠鐘返屋企，佢緊緊抓住扶手，大叫「唔制」，見我無即時捉佢走，佢展露一個奸計得逞的笑容。不過會同佢講，我地再玩多十下（一路數出聲），跟住同搖搖板講bye-bye，就走啦。

講得出生活見到既物品，奶奶，飯飯，包包，餅餅（因為講得出先有得食），花花，duck，貓，汪汪，咩咩（羊咩咩），啤啤（熊啤啤），PP(尿片)，襪，鼻，卡（腳）等等。

知道「擺，攞，俾」的分別，會邊做邊講。

識講「ABC」，分開講和合埋講都得。

學我地拎起電話，對著話筒，叫「喂喂喂喂喂！咩~呀？咩~話」似模似樣。

成日跟我地口水尾，跟到最尾戈個字，好似對答咁，哈哈。

知唔知呀？知~

靚唔靚呀？靚靚~

你叻唔叻呀？叻~

你隻腳好臭呀，矣?矣~

認知 

識得收埋d「寶貝」。曾經試過收埋兩粒星星餅在衫櫃，又收埋過奶粉隔的蓋在櫃桶，搞到我搵餐死。佢的「佔有」敏感期來到了。

見到方的就按，圓的就擰，洞洞的伸手指進去，有蓋就打開或cup返好佢。記得邊度有燈制開關，lift制，每次經過都要按下先得，我同佢講每次只能按一次，佢暫時都肯聽我講。

似乎認得返學和回家的路，在街上係咁手指指。見到紅燈d人停晒也會跟著安靜下來，仲會模仿交通燈的「得-得」聲，見到綠燈d人起動佢會非常興奮。

叫佢全名，佢識舉高手答到。

社交

目前佢既分離焦慮都幾嚴重。朝早送佢返學係無問題的，事實佢都幾鍾意返學。但唔知點解，我一返到屋企就只跟著我一個，嫲嫲和爸爸都不要，但我們三人跟他相處時間是一樣多的。每當我一入左廁所，廚房，佢就會大哭，幾乎哭到我出來為止，即使廳間有其他人陪佢，氹佢都唔得。真係唔知點解？？

每當一見到陌生人或少見的人，如果我抱住佢，佢會即刻將臉埋在我心口，但是kakaka的笑；如果我拖住佢，佢會九秒九躲在我pat pat後面。這究竟是正常必經的過度階段，還是佢天性真的如此害羞？

經常跟我們玩peekaboo 遊戲，佢扶住high chair企，大叫一聲「阿嫲」，當99轉頭望向佢，佢會馬上躲到high chair後面，然後kakaka咁笑。

在床上的時候，佢會用自己張被仔同我玩peekaboo.

對其他小朋友有興趣，大聲叫人地「阿b」。 

體格

9.45kg, 78cm, 偏瘦，但依然有繼續長高和增重。我地有俾維他命和魚肝油佢食，遲d仲想俾魚油。

其他

有14隻牙，出緊第15隻

前囟門尚未閉合