順利入托

七月廿一日，是瞕瞕入托的大日子，適逢老公放大假，星期一又剛好是我day off，所以我兩公婆可以親自送瞕瞕去托兒所。

之前一晚我幫瞕瞕執好晒d野放落書包仔，包括一套替換的乾淨衫，外套，3-4片尿片，學習杯，紗巾，還有星星餅零食。

一朝早換好衫，背上書包仔，我先點名，瞕瞕識話「到！」，跟住我同瞕瞕傾計：

今日返托兒所，知唔知呀？

知呀

要聽阿姨話架，知唔知呀？

知呀

同d小朋友一齊玩喎，知唔知呀？

知呀

一陣爸爸媽媽就會黎接你喇，知唔知呀？

知呀

 

我相信瞕瞕明白「知呀」的意思，亦睇得出佢唔抗拒，似乎是一個好預兆。

 

以前我同老公都以為，帶小朋友返托兒所呢，就係趁佢玩緊既時候，偷偷地離去。但在托兒所「給家長的話」中，我們才知道原來不能這樣。我們應該要將孩子交給阿姨，在他面前直接揮手bye-bye，然後掉頭即走，不糾纏，讓他明白離別的意思，慢慢他就會習慣。不辭而別是非常不好的，因為當小孩子回頭找你但找不到，他會感到被欺騙，唔鍾意返托兒所了。

頭一日返托只係試兩個鐘，事實上我地個零鐘就去接返瞕瞕。好乖呀，無喊過。。。真係神奇，阿姨話佢好鍾意玩d玩具，亦對其他同學仔感到好奇。

我一直都諗唔明，點解瞕瞕咁鍾意玩出面的玩具，自己屋企戈d就三分鐘熱度-__-

接住戈幾日，送瞕瞕返托交到阿姨手上時，佢都有扁嘴喊，因為佢開始感受到分離的焦慮，離別對他來說是難受的。

儘管這樣，但阿姨同導師話瞕瞕已經好叻，只有返托時喊一陣（有d真係喊到嘔），在新生中是適應得最好的一個。

因此在試返第三日，阿姨提議俾瞕瞕留低食埋飯先走。托兒所有一份公開的餐單，雖然唔係每一樣野都啱瞕瞕的口味，但我反而想籍此機會讓他嘗試多樣食物，減低他偏食的傾向。

托兒所另有一份活動時間表，等家長可以了解小朋友的每日流程，瞕瞕現正就讀小小班，踏入第六天，阿姨繼續讚佢適應良好，我們便放心俾佢返全日班了。

見到一群小朋友開心地在戶外踩車車，唔知瞕瞕幾時先有份一齊玩呢？