企鵝酒店．長隆海洋王國（下）

快快手寫埋個長隆遊記先。

今次外出過夜學醒左，帶埋瞕瞕的枕頭和被。酒店戈d根本唔可能啱用。也因為有此準備，瞕瞕一覺訓天光，令我同老公都有好好既休息。

第二朝我直接抱瞕瞕坐在大人廁板上，幸好佢照樣順利poo得出。當然佢的安全意識亦很高，一邊poo一邊不停地話「媽咪扶實我呀~」

當瞕瞕的生活模式漸趨向成熟時，我地便湊得愈輕鬆。

我地好hea咁在間房hea足一個先落樓食早餐，估唔到餐廳爆滿，我地只能在偏廳搵到一個位。

瞕瞕學我地咁用刀叉，發現了被偷拍的時候向我報以甜甜一笑。

食完早餐，我地又入多次樂園。正當我地排隊過安檢之際，前方一名男子被保安員截住，因為佢被發現背囊收埋好多野食（同迪士尼一樣，唔可以自己帶野食入去），佢堅稱只帶了兩三個面包給小孩子食，但保安員揸正黎做「你敢拿出來數一下真的只有兩三個嗎？」，佢一拎出黎，其實有成二，三十個囉，而且仲要係頭先食自助餐戈度攞既。

另一條line，又有遊客同保安員在爭論小朋友的身高是否需要購買門票的問題。園規都白紙黑字寫明100cm要買飛，個小朋友泊埋把尺一度已110cm，唔明仲有乜好argue...

就係因為呢d case, 搞到後面排隊d人等左好耐，無奈。

由於想睇既都已經睇左，我地再入園係為左買紀念品同影全家幅（要set腳架）

瞕瞕睇中了一張貼紙，我正打算掏錢買時，佢突然又話「唔買呀，擺返好」結果乜都無買到。

Last一站又返左酒店間「馬達加斯加美食廊」食lunch，老公叫左兩籠點心，我同瞕瞕share左個意粉。性價比尚算ok。

 

等2pm架車，在酒店遊花園。原來同企鵝距離太近瞕瞕會驚架，哈哈。最後同bear bear熊say good-bye就歸家了。

企鵝酒店．長隆海洋王國（中）

續上篇，瞕瞕不明原因地喪喊了半個鐘。此時我地已辦理好入住手續，並取得門票，前住樂園食lunch。

可能離開了酒店環境，接觸到樂園一番新景象，瞕瞕不哭了，好奇地打量著周圍的一切。

值得一提的是，瞕瞕同daddy在當年今日同一個地方影返張相，感嘆。。。分別好大！

我地隨意揀左樂園入口戈間「港澳茶餐廳」坐低，食左個普通炒飯和薯仔雞扒沙律。少少貴，麻麻地好食。

跟住我地去左玩旋轉木馬。

又去左睇水族館，魔鬼魚在水中好像長了翅膀，像鳥一樣飛翔。

仲去左睇海豚和白鯨表演。我唔知瞕瞕係咪識睇，不過佢無話要走，只係表情有d呆滯。。。

我地見差唔多時間可以攞房，便起程回酒店。途中瞕瞕睡著了，至此真相大白，原來瞕瞕之前發癲係扭眼訓呀，陰公~ 都怪我地，一出遠門就破壞了佢既生理時鐘。

靜悄悄地上左房，為免整醒瞕瞕，我地留佢在bb車上，有佢訓得幾耐得幾耐。而我同老公就去整理行李和梳洗。

講一講d酒店。橫琴長隆有三間酒店，分別是橫琴灣酒店，企鵝酒店，馬戲酒店。上次我地住過橫琴灣，今次住企鵝，下次應該住馬戲。

橫琴灣酒店就grand d，貴d，有泳池設施和水上樂園；企鵝酒店就colorful d，有捷徑通往樂園，行5分鐘咋。

終於，瞕瞕一覺訓到黃昏時份。幸好，這一覺亦換來佢的飽滿精神。

由於張門票可以無限次出入，所以即使離酒店dinner buffet只有一個鐘，我地仍打算趁此空檔入樂園玩多轉。

今次重點係睇企鵝。提提大家，企鵝館溫度只有10度C, 記得幫小朋友帶夠衫！印象中我都係第一次睇企鵝，我仲問老公「點解d企鵝企晒喺度的？」老公理所當然地答我「有名俾你叫企鵝，梗係企喺度」

係姐！但我喺紀錄片見到既企鵝，係搖搖擺擺咁在冰塊上面行，滿滑稽的，但呢度d企鵝，係一動也不動，好似一尊尊石像佇立在人類為牠們而設的假冰山上。難道牠們離開了天然的生存環境，就連原來的面貌也失去？突然有一種悲涼的感覺。

可能瞕瞕大個仔，定性左好多。除非你帶佢走，否則每一樣野佢都可以認真地睇好耐。除了睇企鵝，還有黑熊，北極熊，唐鵝等等。

踏正6pm，我地準時到帝企鵝餐廳食buffet。其特色是一面落地大玻璃，可以邊食邊睇企鵝。如果想要呢個靚景，提早book向服務員講明。可惜因為好凍，我地換左隔離間枱。

瞕瞕而家可以食大人野，又可以自行食完一餐飯，真係好好，你有你食，佢有佢食。算係稍為甩身少少。

野食方面都ok，個場好大，我都未食勻。

食飽了我地就上房靜待8pm戈場煙花匯演。其實煙花房和園景房房價都係一樣，咁點會唔要煙花房呢？

但係瞕瞕有d驚，佢拉埋窗簾唔俾我地睇-___-＂佢發現搖控好好玩，3秒鐘轉一個台。

Good Night! 

企鵝酒店．長隆海洋王國（上）

雖然首爾遊記仲未寫完，但真係要插入呢篇先。因為有瞕瞕既參與，我總是想講佢多d。

五月同老公一齊放左幾天假，便帶瞕瞕去個兩日一夜的短trip見識下。初時諗住去hk架，但一想到船飛已經成千蚊，望門輕嘆。。。最後決定去橫琴長隆，package以1300元成交，包一晚酒店，兩份早餐，兩張兩日任玩門票。瞕瞕未夠100cm唔駛俾。

由於澳門有便利的地理環境，從中旅社門口上車，連過關時間，直達樂園只需40分鐘，呢個原因會令我地一再想黎呢度。

接近中午時份，我地帶住行李落車，但因距離2pm check-in 為時尚早，所以我地先在concierge寄存行李，往樂園食個飯，再回酒店午睡。

就在這個時候，發生了一件恐怖的事，恐怖到老公以為瞕瞕鬼上身。

話說我同瞕瞕去洗手間換條片，著老公在原地等我。但想不到洗手間有點兒遠，直行行成五分鐘先到。瞕瞕對兒童洗手盤超有興趣，洗手洗個不停。我已經放緩腳步讓佢洗左好多次，洗到衫都濕埋，佢依然未有離開的意思。我又怕老公等得耐，好言相勸不果之下，唯有夾佢走。

瞕瞕當然係放聲嚎哭。老公責怪我究竟帶左佢去邊，佢甚至懷疑我帶佢去左唔應該去的地方，撞左邪。。。      -___-

對於瞕瞕這樣的小孩，咁扭法，咁喊法的確不尋常。或許是瞕瞕一向性情溫和，或許是平時我地對佢有辦法，卻突然遇上這樣的情況，殺我地一個措手不及。

我地完全投降。

終於，瞕瞕喪喊左半個鐘之後，自己累了便漸漸收聲。

瞕瞕幾乎從來未試過喊超過五分鐘，唔好話老公，就連我都有些擔心，唔知佢發生乜事。唔通真係洗手洗到失左常理？？

期間我地當然都有很生氣，想將佢痛罵一頓，罵醒佢＞＜

真係出師不利: (

（待續）

石村湖公園看夕陽櫻花

上個月先從首爾回來，點解好似事隔久遠咁既？？其中一個原因可能係四月時我仲著住羽絨，但見d朋友仔五月過去已經可以著T恤短褲，不可思議耶。

我同櫻花好有緣份，櫻花期咁短都讓我地遇上，而且我地仲去左三個不同地方賞櫻添：石村湖，汝矣島，梨大。

 

中午時份出發，都唔知轉左幾多條線，搭左幾多個站，黃昏前一刻先到達石村湖公園。

 

我以為呢個時間d人都會歸家去，點知原來好多人都特登黎睇夕陽櫻花。對住個湖睇櫻花真係特別靚，加上陣陣微風，不斷灑落櫻花雨，景醉人醉。

2歲IQ書

本書係朋友送的，正式書名叫做＜智力開發200問＞，是一本問題卡片書，內容涵蓋了比較、觀察力， 、注意力、空間等多項題目，所以我同瞕瞕叫佢做「IQ書」，我鍾意本書細細本，方便拎，隨問隨答。

有時無無聊聊問瞕瞕「我地玩IQ題好唔好？」瞕瞕實話好；有時係瞕瞕主動拎本書搵我「我要玩IQ題！」

我手上有兩本，一本係1~2歲，一本係2~3歲。1~2歲戈本比較簡單，都是日常生活中常見的問題，我由一些瞕瞕可以接受的小問題開始問起，例如「個小朋友做緊乜？」「邊個小朋友笑/喊？」到最近「邊棵樹既蘋果多d？」「大笨象無左乜野？」都識答。

但如果遇上顏色問題，例如「樹葉係咩色？」「邊件衫係黃色？」或者異同問題，如「邊兩把遮係一樣架？」就未答到我。

2~3歲戈本與其說是深少少，不如說是抽象少少。瞕瞕最多答到我「毛巾下面有西瓜」和「小白兔呢埋喺邊」。至於邊個喺中間呢d方位，或者砌圖少左邊塊，完全唔識。

透過一問一答，好容易知道瞕瞕識d咩，唔識d咩，我又可以教佢d咩。我覺得幾好玩，d公仔畫得幾靚幾得意，呢個系列出到5~6歲，淘寶賣$6.8本，誠意推薦。