瞕瞕兩歲近況

在暴雨季節中，迎來了瞕瞕的兩歲生日。

現在的他已經可以自己動手食完一餐飯。不過嫲嫲總是嬚他吃得慢，忍不住出手餵他2/3，甚至塞他吃兩碗，每餐都飽到撐著^^＂

老人家就是這樣的了。

由於落雨不斷的緣故，五月以來無乜機會落街去公園玩，幾乎全部日子都留在家裡。而事實上，在家中可玩樂和學習的也不少：油顏色、指印畫、搭積木、穿珠仔、搓泥膠。。。etc，這些瑣碎的事兒令瞕瞕手指間的精細能力增進了不少。

經其他媽媽推介，我淘了一個輕便書架給瞕瞕。我很滿意這種帆布材質，省卻了木頭的笨重和安裝的煩惱。書架不同於書櫃，它是用來展示適合圖書，隔一期就換一批，開放式的擺放方法，讓幼兒拿書隨手可及。

我花了少少時間，整理出一個空間，為瞕瞕創造閱讀環境，培養他看書習慣。瞕瞕對書架和書都盡顯興趣，但願這個好習慣會伴隨他一生。

每個bb與生俱來的氣質皆不同，一歲時會露出一點端倪，兩歲時會更明顯，有晒個人想法和喜惡感覺。兩歲小朋友既思維係點，也可以從佢地既語言對答中窺知。我寫幾件事情描述下瞕瞕呢個小朋友，讓大家自行感受。

事件一：

帶瞕瞕落街買兩個橙，準備整鹽蒸橙佢食。都幾重，但瞕瞕堅持自己拎，就由得佢試下。此時一個路人從我地身邊經過，話「咁叻仔識幫手拎野呀。」行多一小段路之後。。。

我「好嘞，重呀，俾媽咪拎啦~」

瞕瞕「唔駛呀!」

我「點解唔俾媽咪幫你拎？」

瞕瞕眉飛色舞地「阿姨話我好叻啊~」

原來因為咁，就係咁，瞕瞕拎左全程。

事件二：

我問瞕瞕「你生日帶你去長隆玩好無呀？」

瞕瞕反問我「有咩玩先？」

事件三：

我問瞕瞕「你鍾意咩小動物呀？」

瞕瞕沈思不語。

我唔知佢知唔知動物的意思，於是我轉了個方式問佢。

我「你最鍾意的小動物係咪小白兔呢？」

瞕瞕即時有反應「我鍾意獅子王！」

（獅子算是小動物嗎？)

我「你鍾意獅子d乜野呀？」

瞕瞕大吼了一聲「鍾意獅子叫得好大聲，好叻啊~」

即係鍾意佢夠惡啦。。。

事件四：

瞕瞕將10粒LEGO疊成一條長條，猛話「好高啊好高啊。。。」

我「哦，係高樓大廈呀？」

瞕瞕「No! 係長頸鹿黎~」

（是長頸鹿條頸嗎？）

事件五：

瞕瞕係咁話「俾媽咪，俾媽咪」，仲要我伸手去接住，但他交到我手心的，是空氣；

我問佢「咩黎架？乜都無既？？」

瞕瞕哈哈大笑「呃下媽咪先！」

都唔知呢個小壞蛋呢d野喺邊度學返黎。

事件六：

瞕瞕對嫲嫲說「我泥膠擺張櫈度，嫲嫲無得坐，哇哈哈哈哈~」

佢的小惡作劇。

我相信佢既惡作劇係無惡意既，佢想睇下我地有乜反應咋。

嫲嫲扮無辜問佢「咁點坐呀？」

瞕瞕吐吐舌：P「拎返開」