瞕瞕28個月大

28個月大嘞。。。從何說起呢？

食

從前可以飲13安奶，現在只飲3安，算不算是重大的飲食變化？

不過我地又唔會因此擔心，因為瞕瞕雖然飲少左奶，但食多左其他野，例如一整個面包作為早餐。

只係我地唔會再成箱奶粉入貨，因為目前跡象似有可能突然斷奶。

瞕瞕非常喜歡吃水果，被我地戲稱為「水果王」。佢亦喜歡吃蔬菜，甚至洋蔥、青椒、西芹。對肉類卻麻麻，you are what you eat, 這種飲食口味係佢身型纖瘦的原因。

但健康就好。

訓

我地係一個早睡早起的家庭，8:30pm就會帶瞕瞕入房，通常9:00pm佢就會訓著。

6:45am準時訓醒，7:00am已經精力充沛，7:30am出門口返學，未試過賴床不起，這樣的schedule是我未生bb之前想像不到的。我本身是個夜訓亦唔願起身的人，跟住個仔長大，自己變得正常左，係一件好事。

戒片

這方面我真的很幸運，我沒準備過甚麼，托兒所就叫我在書包帶底褲仔，不再用尿片，而事實上佢又無整濕衫褲回來，意味著佢戒日片接近成功。

 

點解托兒所戒片會咁容易成功呢？我覺得歸因於其規律作息。佢地會定時俾小朋友飲水，定時帶小朋友去廁所。小朋友見到人地飲水就飲水，見到人地去廁所就去廁所，群體學習的力量就是這樣。

動作

活動能力大了很多，開始跟同齡小朋友互相追逐。而佢亦明白自己有「跑」的需要，成日提出「想去公園跑跑跑」的要求。

識得離地跳，也識得向前跳，當然不太高也不太遠。

可以不用扶手上樓梯和跨過障礙物。

仲未識踩三輪車，唔敢行平衡木。但我見部分同齡小朋友已經可以，應該要繼續幫瞕瞕加強大肌肉訓練。

精細動作發展到可以穿魚絲線的細珠子，還有使用玩具士巴那扭開六邊形螺絲。

家裡所有電動玩具都幾乎不能再動，事關瞕瞕會拆開電池蓋兼拿走裡面的電池。佢自己的玩具都算了，但有時拿起電視搖控才發現無電，令人氣惱。。。鬧佢幾句佢又會倖倖然拎返d電池和電池蓋出來，然後熟練地安返上去，被佢搞到哭笑不得。

一堆殘骸。

佢甚至會拆卸一些不能拆開的玩具，例如這款「滾珠平衡遊戲」，我也不知道佢係點拆得開的。聽說小朋友愛拆東西是有研究精神的表現，但，唉～遲早屋企d野都俾佢拆爛晒。也許我再物色下這方面的玩具吧。

認知

在懂得字母和數字的基礎下，而家叫得出巴士編號，如「32號巴士」，「9號A巴士」，「25號X巴士」等。

除了知道自己的性別，也知道爸爸叔叔爺爺哥哥弟弟都係男仔，媽媽嫲嫲姑媽姐姐妹妹都係女仔。

講到五官和四肢的功能，生活用品的用途。

能判讀別人或書中人物各種表情和感受。

理解空間方位詞，前後左右上下。

掌控了0-5的數量和序號。知道0的意義代表無野，代表電器關掉了，代表搭電梯戈時地下戈層。問佢有幾多粒提子，5粒之內會答到正確數量，多過5粒就答你好多粒。叫佢去第四個櫃桶攞對襪，第三個櫃桶攞條褲，佢真係會順住個五斗櫃去數「第一個。。第二個。。第三個。。」，最後亦攞啱。我並没有覺得佢數感好，我只歸功於蒙特梭利教具，有機會再開blog講下。

語言

明顯地有了質的飛躍。

1）瞕瞕無端端説：「嫲嫲，你有錢」

嫲嫲：「嫲嫲都無做野，邊會有錢？」

瞕瞕轉數極快地答佢：「嫲嫲有錢，邊駛做野？」

2）洗了幾粒提子俾瞕瞕食，佢很高興地說：「我鍾意食提子，一粒一粒的提子，粒粒圓滑無疵瑕。」

99和老公震驚了，問我佢點識。

事緣我教過佢唱一首兒歌「落大雨，水浸街，阿哥擔柴上街賣，阿嫂喺屋企綉花鞋，在鞋花襪花腰帶，珍珠蝴蝶兩邊排，排排都有十二粒，粒粒圓滑無疵瑕。」

佢自己將歌詞最尾戈句安左落去。

3）家裡種了Ok便利店的小確幸盆栽。

由於隻杯係透明，所以可以看到植物吸水長高的原理。

我對瞕瞕說「你看，花花飲水就長高了。你也要多飲水，才會長高的啊！」

瞕瞕反問我「咁係咪唔飲水就唔長高啦？？」

4）瞕瞕首次留意到馬路上的旅遊巴比普通巴士大架好多，高出一截。

佢驚訝地叫我看：「媽咪！點解架車咁高呀？？？」

我將問題交返俾瞕瞕：「係喎，點解架車咁高既？」

瞕瞕：「架車係咪食左好多飯呀？」

為了氹瞕瞕乖乖食飯，我地不時同佢講「食多d飯先會長高高。」

5）99：「瞕瞕，你尋晩做左咩曳野被嫲嫲打手板，快d話俾媽咪聽。」

瞕瞕唔答佢。

我：「佢都唔知咩叫尋晚。」

此時瞕瞕接腔：「燦眼？咩咁燦眼呀？」

99：「佢咋咋帝帝，扮晒野，人地話尋晚佢話燦眼，特登架。」

瞕瞕哈哈大笑。

佢已經識用這種諧音相關了，厲害厲害。

6）我：「你有幾隻眼？」

瞕瞕：「兩隻眼。」

我：「你有幾隻耳仔？」

瞕瞕：「兩隻耳仔。」

我：「你有幾個鼻？」

瞕瞕：「一個鼻。」

我：「乜唔係有兩個鼻咩？眼同耳仔都有兩隻啦！」

瞕瞕從容不迫比劃給我看「鼻得一個，鼻窿先係有兩個。」

好野！整估你唔到。

7）我在廚房倒熱水，對瞕瞕說：「熱水瓶很燙，千萬不要摸。」

為了令佢明白到底有多燙，我抓著佢的小手迅速地觸摸了一下瓶身。佢拼命縮回小手，一臉惶恐地望著我：「我唔會搞架，等大個先可以搞。」

我：「你點知幾時先大個？」

瞕瞕：「好似媽咪咁大個就係大個。」

8）某天我接瞕瞕放學後，好奇地問佢托兒所訓醒晏覺有咩做的。

佢話：「阿姨幫小朋友紥辮辮囉，（條像筋）係紅色，好靚架。」

我：「咁你有無份紥呀？」

瞕瞕：「無喎」

我：「點解既？」

瞕瞕：「我d頭髮短，唔紥到。」

我：「其實男仔都唔紥辮辮，女仔先紥吧。」

瞕瞕：「男仔都唔留長頭髮，女仔先留長頭髮。」

9）瞕瞕講左幾次「我有巧虎，有米奇老鼠，有豬豬，有熊啤啤，有馬騮，但我無小白兔，叫daddy買俾我啦。」

愛子心切的老公就同瞕瞕一齊揀左隻Miffy回家。

瞕瞕對Miffy愛不釋手，佢溫柔地撫摸它的耳朵，說「耳仔好長啊～」又告訴我「小白兔食青草，食蘿蔔。」

最搞笑係佢話「小白兔有尾巴，圓碌碌。」

我「咁你想唔想要尾巴丫？」

瞕瞕耍手擰頭「我唔要。尾巴會梗住pat pat的，唔舒服。」

情感

近期深入看了一些關於「害羞氣質」的研究書籍（非育兒書），又仔細觀察過其他外向兒的媽媽教養方法，都有d得著。我重新調整了教養手法，瞕瞕變得大膽了不少。

其實又或者我根本無需要做咁多野，上到了某一月齡，小朋友自自然然無之前咁怕醜。這刻佢都會大方地跟人家打招呼，極易融入同伴之中一齊玩，甚至主動牽其他小朋友的手示意友好。

瞕瞕知道大家都錫佢，而佢就特別記掛媽咪。尋晚老公同我講，原來佢每天早過我返屋企的話，瞕瞕都會問他「媽咪呢？媽咪喺邊度？我好掛住媽咪啊～」

但老公又發現，如果我早過佢返屋企，佢並不會問daddy喺邊。

依然同性相拒，哈哈。