瞕瞕20個月大

在寒冷的冬日，迎來了瞕瞕20個月大。儘管我們已經很小心幫佢保暖和養好身體，但他還是病了，掛住兩行鼻涕，這幾天都在吃藥，還好應該沒甚麼大礙。

日常生活作息，自理 

食飯，睡覺，如廁等生活作息跟上個月一樣，都算食得訓得，長了點肉肉。

因為我知道21至24個月是幼兒進入自理方面的敏感期，也將在這段日子裡，迅速拉開了幼兒之間在自理能力上的差距，所以我目前特別想瞕瞕自己學識食飯。

聽說過有三歲幼兒入讀k1後，由於唔識自己食飯，因此即使學校有搭食服務也享用不了，需要勞煩家長或家傭親自到校餵食，一直餵到六歲仲餵緊:(

這種感覺我真的不會形容，但我決不容許瞕瞕這樣。我覺得一個人即使學習成績再好，卻不會照顧自己，是一種嚴重的缺失。

但家中有老人家幫手湊，愛孫心切，要俾瞕瞕自己學食飯喎，談何容易？？現階段想說服她是極其困難的事，我唯有趁她每次約左人出街食飯先抓緊機會教。

適逢此時友人送了一套圍裙連手袖給瞕瞕。但即使在有圍裙覆蓋保護的情況之下，食完一餐飯都要將瞕瞕整個人拿去大清洗，就連high chair，地板都要一併清潔。

前後搞左個幾鐘，曾經有一刻我覺得自己攞苦黎辛。不過在回想整個過程，腦海中滿是瞕瞕拿著小匙，手震震地把飯送進口中的模樣，而儘管他使勁地張大嘴巴配合，卻因手部不熟練的動作，仍會把飯灑出來，令他落了個空。我按捺不住想助他一把，但瞕瞕堅持自己來，一次又一次，天一半地一半，最後都成功幹掉了一碗飯。

特登整左條片去紀念一下，連結在這裡：

http://magis.to/LTs6RUwBRwIsIX0EDmEwCX14

蒙特梭利很多理念我都很很buy，我最深刻是這位女士的一段說話「幼兒天生有自主學習的本能，特別是在生活自理方面，他們會不斷練習直至這種種技能臻至完美境界」

很感慨！連孩子都這麼努力學習，為何我們大人要阻止他們成長？

你幫孩子的愈多，他們的能力便會愈弱。

大肌肉運作

講下瞕瞕其他方面的發展，他這個月的大肌肉動作進步了，步伐逐漸跟得上同齡。見到吸引既野，可以

踎低玩好耐都唔覺累，識跨過障礙物。

還有開始倒退行十步八步，這叫做「本體感覺」。倒退步行時眼睛不能作指導，身體觸感便會特別靈敏。人在黑暗的房間中行走，摸索，靠的就是這種本體感覺。不看琴鍵而彈琴，不看鍵盤而打字，也是本體感覺在起作用。

其實去到一定月齡，小朋友便會自然地爬梳化，反轉身落床，原地自轉，倒退行走，踮著腳尖行，跑跑跳跳。。。通通都是正常發展，而唔係曳，小心d睇住就ok。

小肌肉精細動作，認知

之前有淘過一些手抓板給瞕瞕，練習精細動作和認知，他學識擺之後已失去興趣。現階段的他狂熱地迷戀三件事情：聽故事，唱兒歌，砌LEGO。

瞕瞕能理解和記憶簡單故事的內容。有一本書叫做＜七色彩虹花＞

，關於一朵有七色花瓣的花，因為心地好meet左d花瓣給小動物，所以自己無晒d花瓣，最後枯死了但變了一道彩虹，更為美麗。

第二朝自己巢返本書出黎，係咁話meet meet meet，自我不斷地回味裡面的情節。

 

相對於零食，圖書亦是一種利誘。我成日都同瞕瞕講「乖先有書睇」，咁佢又真係會短暫乖一陣。朝早叫佢起身poo poo，但佢唱反調在張床度碌來碌去，捉實d被舖枕頭，根本無法將他抱起來。我話「你坐喺度poo poo，媽咪去攞本書俾你睇。」點知佢一坐上塔度，就抬頭問我「我本書書呢？」我話「咁你坐喺度，唔好走開呀，媽咪去攞書」佢答我「知道」。

自此，朝早poo poo和臨訓前，都是故事時刻。

身邊有唔少朋友的小朋友都認識了幾乎全部字母和數字，但瞕瞕係一個字都唔識的，一同佢講親呢d就好抗拒。我唔想迫佢，呢d暫時放緩一邊吧。不過佢又唔係完全唔識字母和數字，佢見到衣服或招牌上的英文字會大叫「ABCD」，見到超市收銀機打出來的價目則大叫「1234」，而且佢識唱半首ABC song，由A唱到P，又識打算盤，一粒一粒珠咁數1234...

至於顏色和形狀，佢可以做啱晒d 配對，但依然未講得出任何一種顏色和形狀，至少我知佢辨認顏色無問題就得，都係等佢慢慢來吧。可能下個月會識，又可能下下個月會識。

LEGO是歷久不衰的經典玩具，真係由一歲到一百歲都啱玩，我覺得值得投資。除左學動手砌一樣野出黎之外，最重要的就是構建了一個想像世界。細路成長過程中，極需要想像遊戲，好似煮飯仔，Barbie都係一種想像遊戲。

我同瞕瞕一齊用LEGO Duplo 砌左個停車場，加上一架Vtech車車，瞕瞕沈迷地玩左好耐。「開車，坐車，停車，砵砵，開門，關門」等字眼佢都係從呢個遊戲中學識的。

後來我得知淘寶有仿LEGO玩具，有很多不同主題，包括：遊樂場，海洋，農場，火車軌道，森林。。。etc，我小試牛刀買左佢地的遊樂場和汽車套裝，質量好極了！而家瞕瞕日日沈醉在自家LEGOland裡，推薦左俾好多朋友。

語言

瞕瞕意識到世上萬物皆有其名，所以佢現在極努力地學習更多的名稱，大至於滑梯秋千，小至於母指食指中指無名指尾指，佢都很積極地去記住這些名字。

這一個月以來，我看到瞕瞕語言方面的最大進展，明顯在於組合句子。

他會表達一切需求「我要玩／睇／食飯／落地／訓覺／渣住／抱我洗手／幫我剝鞋。。。」

表達一些感覺「我鍾意／開心／驚／唔要。。。」

表述人地做緊乜「嫲嫲走左／daddy洗手／樂樂返屋企／媽咪換衫。。。」

表述發生咩野事「花花跌左／飛機爛左／提子食晒，無啦／水水飲晒，無啦。。。」

 

有時講d野好搞笑。話說瞕瞕很貪靚，出門前幫佢戴好帽，頸巾，手袋後，佢會自己走去開衣櫃門照連身鏡，邊說「我要睇靚仔」

比較起以前無咁生保，但依然很怕醜。搭同一部lift時，陌生人聊他，他會害羞地把臉埋在我懷裡。姨姨叔叔打趣地問他「bb你去邊度啊？」此時我在他耳邊輕輕的提示說「我要返學」，他又會鼓起勇起同人地講「我要返學！」

 

總結

這個時期能看出瞕瞕性格的雛型--專注而不執著，內向但開朗，雖膽小但給予鼓勵也願意嘗試。

特別的韓國手信

好像心有靈犀一樣，當我正在物色緊d認物掛圖，行左幾間書店+淘寶都未有心水的時候，突然收到一份來自遠方的心意。

掛圖一共五張，主題分別是：動物、交通工具、生活用品、人物器官、顏色形狀。韓文其實無礙於圖像認知，而且我一向也傾向於實物認圖，而非卡通，所以我可以話係超鍾意這份禮物，當然瞕瞕都好鍾意啦。

由於家中地方有限，一次我只能掛一張出來，其他暫時收埋先，等瞕瞕學到咁上下，先至換另一張。我打算動物放在最前面，顏色形狀放在最後面。

雖然瞕瞕最鍾意睇動物，但掛圖中至少有三分之一他是不認識的，例如熊貓、狐狸、駱駝、企鵝、孔雀等，我們可以慢慢學習了。而有左這張掛圖之後他新學識的有老虎、長頸鹿、蝴蝶、蜻蜓、兔仔等。搞笑既係，瞕瞕會成日指住隻蜻蜓叫「飛機」，乜真係有咁似咩？不過當我問佢邊隻係蜻蜓，佢又可以指啱俾我睇。

我將此事post上Facebook分享，有些朋友以為我瘋了，咁細個就灌輸瞕瞕學韓文，畢竟現在學韓文是大熱。但梗係唔係啦，邊有d咁既事，我自己都唔識韓文又點教佢喎。等佢識認晒全部圖畫，用廣東話講得出來，我已經很開心的了。

玩貼紙書的樂趣

第一次淘貼紙書，是為了搭夠郵費；第二次也是。因為貼紙書很便宜，大概5元一本，如果我還差10元才能包郵，我會拍兩本，如果差20元，就拍四本，前前後後共拍了十多本，哈。當初沒想到瞕瞕會咁鍾意玩，而且透過貼貼紙，都學到d野，還增進了我們的親子關係。

我們的玩法是這樣：打開中間有貼紙戈頁，我問瞕瞕要邊個貼紙，等佢揀一個之後，再引導佢貼在相關戈頁適當既位置。

以下分享一些瞕瞕自己貼出來的作品，童稚的世界真的很有趣。

1）馬騮仔

瞕瞕鍾意將d 動物貼埋一堆，但又不至於覆蓋在上面。尤其係睇完'Five little monkeys' 之後，佢覺得幾隻馬騮應該要撞埋一齊玩，而且方向隻隻都唔同，就好似five little monkeys在床上又跳又翻筋斗咁。

2）戴眼鏡

瞕瞕是有見過我戴眼鏡的，所以他亦知道眼鏡是貼在眼睛上。對於一個不足兩歲的孩子來說，他準確地做到這個對應貼，是成長過程中的理程碑，我依然清晰地記得當他掌握了這個概念時給我的驚喜。

3）菜市場

這有點像分類遊戲，將各種蔬菜group埋一齊。瞕瞕學識左講「菜菜」「蕃茄」「蘿蔔」etc。

4）派糖

我同瞕瞕講話長頸鹿想食糖，你俾佢食好唔好？瞕瞕高興地答我「好！」佢明白「俾」的定義是要交到對方手中，所以佢都能逐一將糖果貼紙精準地貼啱在小動物手上，我又代青蛙說「呱呱，我仲未有呀，快d啦！」此時瞕瞕會加快速度。一頁貼紙書就好似一個故事咁，每一頁都可以玩好耐好耐。

5）雀仔d羽毛

把彩色的羽毛隨意貼在小鳥身上，這個task表面看來沒有甚麼特別，但瞕瞕一邊貼一邊喃喃地跟住我講「雀仔d毛毛。。。雀仔d毛毛」咁樣又學識了一個新句式。邊貼邊說，其實是導入小朋友學講野的最佳時機。

即使貼完了一本貼紙書，我也不捨得馬上丟掉，而且瞕瞕會把它當作一本圖畫書經常攞黎睇。有樣野令我頗感驚訝的是，某天瞕瞕翻開了貼紙書中間戈頁，指住右上角被meet走了的貼紙空位，說「雀仔d毛毛」，我記得戈個位真係雀仔d毛毛，然後佢又指住左下角個貼紙空位，說「眼（鏡）」，真神奇，佢竟然記得大部份貼紙空位曾經是甚麼，而我已經無晒印象了。

托兒所接放學，在職媽媽的心酸

未入托兒所之前驚無人湊，入左托兒所之後又擔心無人接送，相信這種情境是很多澳門在職媽媽共同的心路歷程。

我和老公都是明理人，自知湊孫並不是老人家的義務，所以要輪班的我倆，總是盡量夾好時間，親自接送瞕瞕返學放學，放假的時間一定全天候自己湊返，即使萬一真的要勞煩99接送，我也會在放工後飛奔回家接手。

2014年年尾和2015年年頭，因為工作時數上的交接，所以每日要補1個鐘零15分鐘，變相返工時間長左，早極都要5：15pm先走得，到達托兒所的時候已是6：00pm，而平時是4：45pm。

返左半年托兒所，我都係第一次咁遲先去接瞕瞕，唔知佢會有咩反應呢？

托兒所係6：30pm關門的，但此時已走剩4至5個小朋友，瞕瞕就讀的「小小班」更只剩返佢一個。。。課室全部關了燈，d小朋友被帶到走廊，坐在等候區的梳化上引頸以盼，書包堆放在一角，現場一片冷冷清的感覺。

只見瞕瞕依偎在班主任身旁，邊度都唔去，甚麼玩具也不玩，亦不跟其他小朋友互動。班主任看見我，就揶揄瞕瞕說「我地仲講緊媽咪係咪忘記左來接你啦。」

瞕瞕露出了一個苦笑的表情。

我幫瞕瞕孭好書包，向班主任道別和道謝，行到電梯口，瞕瞕突然轉身，離遠向班主任揮手，說「姨姨bye-bye，我要走嘞。」

他的話語裡，包含了一種不捨和感激之情。那一刻，我覺得他頗為懂事和生性。事關我都聽過很多其他媽媽話，送孩子返學，不要是第一個；接孩子放學，更不能是最後一個，否則孩子會感到被遺棄而哭的。但瞕瞕又唔怕，孤單感他肯定是有的，不過他亦似乎很懂得穩定自己的情緒，而且家人在聽說了這次的經歷後，99自告奮勇地承擔了代接放學的責任，除了感恩，我還能怎樣呢？

PS. 平日準時接送瞕瞕，他歡快地從課室跑出來的模樣，神氣極了。

花展的最後一天

澳門有個地方睇花好靚，叫做龍環葡韻，一年大概會搞兩，三次花展，而今次跨越2014至2015年的花展主題是「花之海．金魚草花卉展」，裡面分左兩個場景組，一組為燈塔指引在花海上航行的船隻回歸，船內載滿了花藝擺設，喻意一帆風順，滿載而歸；另一組為一座大型的海底宮殿，代表外出航行的船隻歸來回家，正正呼應了回歸十五週年的盛事。

瞕瞕打扮醒目地出現在花展場地入口，我覺得猴子圖案好襯佢，嘿嘿。

跟住我地好快就搵到傳說中好靚既船，非留影不可，可惜瞕瞕好似唔係好合作咁，why? 原因你估佢唔到。

瞕瞕當然唔係驚隻船，又唔係扭落地，佢不停指住對面，叫我同佢一齊過去睇青蛙。

戈度真係有隻大型青蛙擺設，瞕瞕鍾意青蛙。

而瞕瞕認識青蛙，只不過是之前一晚既事。話說有一本叫做<Brown bear, what do you see?>的書，我相信很多母親和孩子也擁有吧。

弱水三千，取一瓢飲。與其求其責備買上一堆認物大卡，不如精選這樣的認知繪本。外國繪本，Eric Carl的經典之作，用色的方式與眾不同，這樣的美術作品在培養孩子的審美情趣，比起一般的認物卡片存在不可估量的價值。

它採用中國古典詩歌的重章複唱和頂針修辭式，複現各種主要動物，包括：熊，鳥，鴨，馬，青蛙，貓，狗，羊和顏色：啡，紅，黃，藍，綠，紫，白，黑，幫助孩子逐一認識它們。

以上是書評之言。在眾多繪本之中，瞕瞕其實並不特別垂青這本，可能是故事性不夠強。那些熊呀鳥呀貓貓狗狗馬馬。。。瞕瞕很早的時候已認識，但唔知點解，佢唔肯指認俾我睇。我有我問，佢有佢掀，完全唔理我，佢將本書掀來掀去，直至目光停留在青蛙那頁上。

「嗯？」瞕瞕突然抬起頭，眼神似在詢問我這是甚麼東東。我答佢「青蛙」，瞕瞕跟住我的發音讀了一次，小臉上展現一種釋然的笑容。

然後佢又繼續掀來掀去，最後都係去返青蛙那頁。佢小心翼翼地，反複吐出「青蛙」這個音節，再望向我，求證讀音是否正確。

至此，我突然明白佢對青蛙深感興趣，因為之前貌似未見過。於是我就同佢一齊探討青蛙既野，我教佢一組關連詞語「青蛙-綠色」，瞕瞕喃喃講左幾次「青蛙-綠色」「綠色-青蛙」後，變左「青蛙係綠色」，我又唱我僅認識同青蛙有關既兒歌俾佢聽，佢跟住哼少少：

「青蛙媽媽睡醒了，呱呱呱呱呱呱叫。。。」（廣東話）

「日頭漸漸落山後，田頭田尾水蛙咯咯哮。。。」（福建話）

我覺得細路仔個腦好像一塊海綿咁，不斷地渴求吸收新既知識。我都睇得出瞕瞕係一個會好奇和主動探索的孩子，所以我也會盡我的能力去滿足佢愛學習的心。 

講回正題，花展睇左唔係好耐就要走啦，因為現場好多蚊+蜜蜂。我地仲見到一個女人頭頂上圍繞了幾百隻蚊滋在飛舞，狀甚恐怖，唔知係噴左噴髮膠定香水，但佢本人卻絲毫未覺，我地就嚇傻左＞＜

最後一天的花展，燦爛的陽光，活潑的小孩，起勢地跑來跑去。

半夜的怪聲

半夜，表妹在facebook上post左段留言，抱怨樓上不斷發出擾人噪音，包括鋸木聲，搬桌椅聲，扔東西聲，高跟鞋聲，流水聲。。。等等，令她無法安睡。她曾往管理處投訴，但管理員皆她上門按鈴無反應，致電業主則表示每一個星期才在上址居住一天，其餘時間均不在單位內。

看到這裡，會不會讓大家感到毛骨悚然？

我曾有六次搬家的經驗，其實在每間屋裡面都或多或少聽到上述的聲音，係而家住緊呢間叫做好好多，印象中今年入冬以來只聽過兩次，一次係波子落地聲，一次係搬動桌椅聲。

按正常邏輯來說，不可能家家戶戶都有波子，波子在今時今日已經唔算係普通玩意，而且有乜理由這二十多年來，不論我住在哪裡，都會聽到波子聲呢？至於搬動桌椅，我也不認為這個動作會如此應聲。

由於我並不相信鬼神之說，所以在很久之前已找出答案。事關舊樓鋼管老化，在熱脹冷縮的情況下，管道與石屎之間的縫隙產生磨擦，而發出各種各樣疑真疑患的噪音。不過有時又未必關樓齡時，都要睇返樓宇結構。

有左科學求證，就不會對生活既事產生疑惑或恐懼。

但瞕瞕並不是這樣想。他第一次聽到「波子」聲時，馬上丟下手中的玩具，飛奔到廚房找我。不過我想先完成洗奶樽的工作，再加上認為這種聲音沒有甚麼大不了，便決意讓他等一等。瞕瞕站在門口喪喊，我出來的時候，他滿臉都是眼淚鼻涕，儼如一隻小花面貓。氹左好耐佢都仲抽抽噎噎，搞到抱左成晚。

第二次餵瞕瞕食飯時，在寧靜的大廳內又聽到樓上有類似搬桌椅聲，瞕瞕驚到面都青埋，佢嗚咽著說「嚇死我，我要媽咪抱抱」。這次我學精了，馬上從high chair抱起瞕瞕，攬實佢，話「媽咪喺度，會保護你架」，善意安慰一番之後，再放返落high chair繼續食飯都ok。

如果當時我的反應是「有乜好驚呀？乜你咁細膽架？男仔黎架嘛！乜都驚。。。」這樣說完全於事無補，既不能增加他的膽量，卻只會令他更沒安全感，無疑是將他稚弱的心靈推向萬刼不復的深淵。

我覺得適時給予安慰，才能增加他的安全感，在長大一點的時候，再跟他解釋當中的科學原理，自然能消除那些莫名的恐懼。