又到中秋

今年係瞕瞕陪我過既第三個中秋節啦。第三個？佢兩歲都未夠喎，何來第三個？

對呀，真的是第三個了。

2012年9月30日，佢已在我肚裡面，剛剛開始萌芽。

2013年9月19日，佢四個月大。

2014年9月8日，佢一歲三個月。

佢出世之後，我地都有帶佢去睇燈籠，地點是家附近的「婆仔屋」，電影＜激戰＞都有在這裡取過景架，特色是人手製作的紙兔仔燈籠。

瞕瞕係咪大個左好多呢？

瞕瞕識講「揸住」和「拖住」。佢要求自己揸住個燈籠（托兒所派的），又要拖住我地四圍走。

但漸漸地佢覺得唔對路，佢唔係幾鍾意d紙紥燈籠，事實我都覺得有少少詭異氣氛，佢驚到要匿埋，更嚇到暴走，語帶哭音大叫「媽媽，嗚嗚嗚。。。」

回憶小天地

近日聽到其他媽媽提到一個叫做「回憶小天地」的地方，話有野啱bb玩，所以某日我趁著瞕瞕放學，又未返屋企食飯這段空檔時間，帶佢過去睇下咩環境。

由於該遊樂場設在工業大廈裡面，其實交通不大方便，等左成半個鐘先有巴士，光是來回就已花了一個小時以上。

收費一個小時40元，相比起科學館不限時15元，威尼斯人這麼大型的遊樂設施一小時100元，它是有點貴的，但性價比卻不高。因為一進去，就看到地方非常簡陋，狹小，更有一些年約八，九歲的大孩子在奔跑追逐，玩具散滿一地，場面混亂，完全沒人監管。

不過既然一場來到，就湊下熱鬧吧。瞕瞕都是第一次玩波波池，池內還有另一個同樣是一歲三個月的小男孩。男孩家長聽到瞕瞕話「波波」，「媽咪」，就話「你個仔識講好多野喎，我地個乜都唔識。」我就同返佢講，個個小朋友的發育都唔同，你個企得好穩，我個係未得的。實情係人地個小朋友在充滿波波的池中真的企得很穩，而且行走靈活。

跟住我又俾瞕瞕坐下車車，騎下馬仔，玩下多功能玩具桌，打下電話。。。

最後玩左半個鐘就離去，瞕瞕當然是不捨得的，我教佢同d玩具講bye bye，佢知道要走了，個樣很傷心。

佢玩的時候會很投入，唔怪得咁鍾意返托兒所。

我們的安全依附關係

九月一日，是很多學校和托兒所開學的日子，瞕瞕間托兒所都在這幾天陸續有新生報到。由於是第一次離開父母身邊，所以d小朋友都喊得好淒涼，而一些稍大的孩子則在門口糾纏：「我唔要返學呀，我要返屋企。。。」

瞕瞕比佢地早一點入托，已經返左一個月，從來無喊過，阿姨和導師都一致公認佢乖巧，面對此情此境，我覺得很感慨。講真瞕瞕絕對不是天賦異稟，佢能夠有這樣理想的表現，是我用心努力過的成果。

話說在佢七，八個月大，剛進入分離焦慮的時期，只要我一稍為離開佢的視線，佢就驚慌地哭，大概只是去了一趟廁所的時間吧，佢已哭到眼腫，聲沙，滿面鼻涕，全身顫抖，令人心酸。於是我睇左好多好多關於緩解分離焦慮的資料，得知背後有一個terms叫做「安全依附關係」。如果可以成功跟孩子建立起這種關係，那麼分離焦慮的程度便會減至最低，此階段最終必然順利渡過。

曾經有一位心理學家做過一個對bb的「陌生情境測試」。個實驗係將一歲大的bb同媽咪，陌生人一齊放埋同一個空間。然後過一陣，媽咪走左出去，無幾耐又返黎。研究發現，bb會有三種反應：

1）安全依附型 -- 媽咪在身邊的時候，bb敢稍微離開媽咪身邊，自由地探索周遭事物；當唔見左媽咪時，bb會有少少緊張，不安，但會慢慢地穩定自己的情緒；當媽咪回來時，bb會顯得高興，歡迎。

2）矛盾抗拒型 -- 媽咪離開後，bb的反應非常焦慮，大喊特喊；但當媽咪回來時，bb的反應卻很衝突，想接近媽咪，卻又對媽咪拳打腳踢，惱恨媽咪為何要丟低佢一個人。

3）逃避型 -- 當媽咪離開後，bb的反應很平淡，唔喊；但當媽咪回來時，佢又唔會顯得很高興，總之由頭到尾就是淡淡漠漠的。

專家話，以上三種不同的反應，都是跟平日媽咪與bb之間的互動有關。越是安全依附的孩子，所表現的分離焦慮便愈少，這是因為佢地相信父母仍然會回來的緣故。

當時我接觸到這篇研究文章，內心感到很震撼，尤其當我知道了「安全依附關係」對一個人一生發展影響之深遠，我發誓我會不惜一切，去與瞕瞕建立這種美好的關係。

但我要點先至得到這種關係呢？我開始嘗試去構建一些模擬環境，我帶過瞕瞕去家附近的二龍喉公園，裡面有個「環境資訊中心」，有展覽，有圖書，有早教玩具分別放在四張枱上。原先我抱住瞕瞕坐，跟住俾佢自己坐，我坐在佢身邊，再悄悄地移師到另一張枱。佢機警地察覺到我行開左，想丟下手中的玩具撲向我，我輕聲對他說：媽咪喺度呀，你繼續玩啦。佢見我只係走開左少少，唔係要離開，便如釋重負地一笑，繼續自己玩。佢玩玩下又會望下我係咪真係喺度，我會報以他一個微笑。

我又帶過佢去科學館麥當勞的遊樂設施，我坐在一旁，push佢自己出去玩。佢在playmat上爬了幾步又回望我，眼神想我跟住佢出去，但我都係擺擺手，叫佢GOGOGO，佢猶豫過一兩秒左右，便歡快地爬開去玩了。

而這些練習，我並不是做了一兩次，而是在他入托前，連續地做了一個月。終於，在付出了這些心機之後，我淺嘗到了科學育兒的甜頭。現在他朝早返托偶爾會扁嘴，但他很快就能穩定自己的情緒，不致於爆喊；放學的時候，阿姨抱他出來，他離遠從走廊盡頭見到我，開心得手舞足蹈，猛揮手大叫「媽咪，媽咪！」還有甚麼比這讓人放寬心的呢？

托兒所的接放學時間是4：45pm to 6：30pm，我和家人每天第一時間趕去接瞕瞕，因為我們不想他留到後面先有人接。要是他見到小朋友一個一個被接走，而自己遲遲未見父母來到，肯定會不高興。辛苦建立起來的安全依附關係，絕對不可以隨便打破。

超感動的一天，不是幻覺

睇書和睇保健醫生都話，正常bb在一歲至一歲三個月識行。於是在瞕瞕滿一歲後，我天天都盼望著佢識行。可是一天一天地過去了，直至足足一歲三個月，瞕瞕都仲未識，而且連放手企都未得。更令人心急的是，成個五月蛇b群組裡面，基本就剩返瞕瞕一個未識行。。。

回想起來，瞕瞕都要到十個月大先真正識坐，山頂醫生物理治療師講過佢「肌張力低」，所以樣樣都遲，我曾經擔心佢會遲過一歲半deadline都唔識行，咁就唔知點算。

為此，我經常有捉住佢練企。不過瞕瞕都係鍾意爬多d，佢會用力掙脫我，然後九秒九爬走左，我都奈佢唔何。

有時我唯有安慰自己，佢ready好就自然識行，就好似我根本唔識溜冰，你俾對溜冰鞋我，叫我自己行過對面，我一定死都唔肯甩手。如果你迫我，搞到我跌親，驚左，咁我就更加唔會行添。將心比己，其實我都明白瞕瞕既心理。

而又在呢幾日，我發現瞕瞕只需要少少支撐就可以企到，例如伸俾隻手指俾佢。開始時佢只肯在嫲嫲張床上企幾秒，很快地佢進展到肯在地面上企。

我覺得瞕瞕同我一樣，都是極需要被鼓勵，給予他一點勇氣就能跨出第一步的人。於是，我不斷不斷地在佢耳邊說：「唔駛驚架，媽咪會在後面睇住你。我地一二一二。。。」終於，在一歲三個月零十四日的這一天，佢放手自己行了！行左十幾步，仲識轉彎投向我的懷抱。

相信每個父母在自己bb行出第一步的時候，都會非常感動。現在我放低了心中懸著的一塊石，更是感動之上的感動。

瞕瞕十五個月大

有幾篇blog寫左個開頭，但都未有時間/心機/靈感去完成。不過我想分享左呢篇先，因為瞕瞕剛好十五個月大，幾有意義，又是成長路上的一個里程碑。

先講下一天的生活流程：

07:30 起身食奶（8安）

08:00 出門口返托兒所

08:30 到達托兒所阿姨手上，量度體溫，做早操，飲水，排洗

10:00 體能遊戲，或小肌肉活動，或音樂堂

10:20 小息，排洗，吃水果

10:45 體能遊戲，或小肌肉活動，或音樂堂

11:05 自選玩具（唔知瞕瞕會揀個咩玩具呢？我都好好奇）小息，排洗

11:30 午膳

12:30 飲奶午睡（6安）

15:30 起身，飲水

16:00 下午茶

16:45 接放學返屋企

18:30 晚飯

19:00 自由活動（其實只是搞搞震吧）

20:00 洗白白，玩水

20:15 親子時間（陪佢一齊玩玩具，講故事，唱歌)

21:00 食奶睡覺（8安）

食

瞕瞕返托後，基本每天只在家搭食一餐，而戈餐亦多數由99代勞，通常在阿嫲的淫威下，瞕瞕都會乖乖食晒一碗。爛飯的餸有豬絞肉或魚蓉，配以蕃茄，或南瓜或西蘭花。

好鍾意食水果，特別是奇異果和蘋果，也有吃橙，香蕉，提子，西瓜。由於佢有餐後吃水果的好習慣，又肯飲水，所以從來都沒有為便秘問題苦惱過。

前幾日試下俾佢自己吃橙，佢似玩橙多d。佢用力揸d橙汁出黎，再放進口中品嘗咩鮮味。弄得橙汁四濺，事後當然要為佢清理了一大輪。因為怕清理，99就更不會俾佢自行食飯。不過好在托兒所係有大把機會俾佢學食飯的，清理這回事，也就交由阿姨去搞吧。。。我地係咪好衰^___^

另外都有俾餅乾和面包之類的零食。

大小二便

差唔多日日都有便便。雖然未開始戒片，但瞕瞕識表示佢poo poo左，佢有時會講「弊啦！」，有時會用手禁住下面，等人幫佢換片

能力發展

大動作

仲未識行，真係估佢唔到。而家我會手抱住佢返托兒所（之前用bb車），路程廿零分鐘。我想行一段又放佢落地自己行一陣，練習多d，拖佢手可以行到20-30米吧

精細動作

可以用母指和食指指尖執起小物品，甚至頭髮和砂粒。識入彩虹圈，cup蓋，打開包裝紙盒，逐頁掀紙本書等等。我物色緊一套積木俾佢練疊高高，還有釣魚等玩具

語言

這是相對於瞕瞕自己，發展得最好的一項。佢可以講雙音節的詞，發音頗為清晣。一個月前佢仲叫緊「媽媽，爸爸，嫲嫲，姨姨」，而家會叫「媽咪，爹哋，阿嫲，阿姨」。

會催我地「快d」，甚至識得將「快d」和其他野組合在一起，例如「快d奶奶」，「快d街街」，「快d」呢個字幾好用，可以即刻得佢想要既野。通常我地都會盡量滿足佢，鼓勵佢學講更多既野。

識得講「唔係！」「唔制！」「唔得！」，並且真係明白代表咩意思。有次公公上黎探瞕瞕，99話：「呢個阿公黎架，叫聲阿公啦」，點知瞕瞕同佢唔熟，耍手兼擰頭話「唔係呀，唔好架~」，跟住走鬼左去，笑死我地。

帶佢去玩秋千搖搖板，話夠鐘返屋企，佢緊緊抓住扶手，大叫「唔制」，見我無即時捉佢走，佢展露一個奸計得逞的笑容。不過會同佢講，我地再玩多十下（一路數出聲），跟住同搖搖板講bye-bye，就走啦。

講得出生活見到既物品，奶奶，飯飯，包包，餅餅（因為講得出先有得食），花花，duck，貓，汪汪，咩咩（羊咩咩），啤啤（熊啤啤），PP(尿片)，襪，鼻，卡（腳）等等。

知道「擺，攞，俾」的分別，會邊做邊講。

識講「ABC」，分開講和合埋講都得。

學我地拎起電話，對著話筒，叫「喂喂喂喂喂！咩~呀？咩~話」似模似樣。

成日跟我地口水尾，跟到最尾戈個字，好似對答咁，哈哈。

知唔知呀？知~

靚唔靚呀？靚靚~

你叻唔叻呀？叻~

你隻腳好臭呀，矣?矣~

認知 

識得收埋d「寶貝」。曾經試過收埋兩粒星星餅在衫櫃，又收埋過奶粉隔的蓋在櫃桶，搞到我搵餐死。佢的「佔有」敏感期來到了。

見到方的就按，圓的就擰，洞洞的伸手指進去，有蓋就打開或cup返好佢。記得邊度有燈制開關，lift制，每次經過都要按下先得，我同佢講每次只能按一次，佢暫時都肯聽我講。

似乎認得返學和回家的路，在街上係咁手指指。見到紅燈d人停晒也會跟著安靜下來，仲會模仿交通燈的「得-得」聲，見到綠燈d人起動佢會非常興奮。

叫佢全名，佢識舉高手答到。

社交

目前佢既分離焦慮都幾嚴重。朝早送佢返學係無問題的，事實佢都幾鍾意返學。但唔知點解，我一返到屋企就只跟著我一個，嫲嫲和爸爸都不要，但我們三人跟他相處時間是一樣多的。每當我一入左廁所，廚房，佢就會大哭，幾乎哭到我出來為止，即使廳間有其他人陪佢，氹佢都唔得。真係唔知點解？？

每當一見到陌生人或少見的人，如果我抱住佢，佢會即刻將臉埋在我心口，但是kakaka的笑；如果我拖住佢，佢會九秒九躲在我pat pat後面。這究竟是正常必經的過度階段，還是佢天性真的如此害羞？

經常跟我們玩peekaboo 遊戲，佢扶住high chair企，大叫一聲「阿嫲」，當99轉頭望向佢，佢會馬上躲到high chair後面，然後kakaka咁笑。

在床上的時候，佢會用自己張被仔同我玩peekaboo.

對其他小朋友有興趣，大聲叫人地「阿b」。 

體格

9.45kg, 78cm, 偏瘦，但依然有繼續長高和增重。我地有俾維他命和魚肝油佢食，遲d仲想俾魚油。

其他

有14隻牙，出緊第15隻

前囟門尚未閉合

捐血中心有野玩

老公突然間話要去捐血，為左表達我對佢的支持，所以陪佢一齊去（我本人不能捐血，因為體重不足100磅），但瞕瞕無人睇住，亦即係要帶埋佢去。 

捐血中心有一個偌大的休息室，內有三文治和鮮奶提供俾捐血者補充體力。正當我餵完瞕瞕食幾塊餅乾，拉著學步的他走來走去，等待時間過去之際，一名工作人員善意地跟我說，其實我們可以使用他們的玩具室設施。

唔講唔知有呢樣野，滑梯韆鞦各式玩具一應俱全，重點是得瞕瞕一個，唔駛迫唔駛爭，佢開心得擦亮了眼睛，興致勃勃地爬來爬去，摸摸這個，又碰碰那個。

最後他將目標鎖定了在一個玩具雪櫃上，他用小手指摳開那一道道的門，取出裡面的小東西（魚、菜、雞、罐頭、飲料等），然後又一件件放回去，砰的一聲把門關上。他不停重複這些動作，自己玩得不亦樂乎。

我見有個玩具洋娃娃，嘗試俾佢抱住，教佢輕輕拍和摸摸bb，培養下他的同理心。睇返瞕瞕同個bb的合照，突然有點感慨，這是仿初生嬰兒大小的，回想起瞕瞕剛出生的時候，被抱在懷裡，都是這麼細小，現在他已長大了許多。。。有點兒不捨得他長大。

 

另一樣他非常感興趣的，是個玩具電話。他能透過這件玩具，充分地發揮他的想像力，模仿力。他認真地按下數字，對著電話呼叫的情境，讓我笑翻了。

覺得現在政府服務有夠貼心的，考慮到捐血過程耗時甚久，為此提供了適當的遊樂設施讓小朋友邊玩邊等，這種溫暖的感覺，我都不知道再說甚麼好了。