電子版童書初體驗

香港的英文教育一直都在國際上領先，比澳門行早很多，很多步。我也經常在香港朋友的blog中，知道原來佢地從bb學講野開始，就摻雜著一些英文在裡面。例如，香蕉，會教bb講banana，如果最初發唔到咁長既音，就會教「nana」，米奇老鼠，佢地會教Mickey, 或者「搣搣」。但澳門真的不會這樣，我身邊的人也不會這樣，個個屋企都係全中文去教的。總之，絕大部份的小朋友都係入學之後先會接觸到英文。

我本來也沒有這個意識要自己教瞕瞕英文，反正第時學校一定會教。不過在拜讀了汪培珽老師一系列的書後，特別是＜培養孩子的英文耳朵＞，才知道不管學習哪一門外語，盡早愈好。所以近日我都在思考這方面的事情。

我翻看過汪老師推薦的英文書單，即使是第一階，但對瞕瞕目前的月齡來說，仍是有點深奧；我又聽人講<Oxford Reading Tree＞好，但花些時間翻閱過後，感覺更為複雜，現在肯定不適合。

我心目中啱瞕瞕睇的英文書應該是1）同實際生活內容相關 2）句型簡單 3）有附帶的mp3  4）size細細本

綜合以上需求，最後我將目標鎖定在Heienmann(海尼曼）這套書上。大量的真實圖片馬上就吸引了我的眼球，而且據很多用戶的經驗，他們的小孩一歲多已經在看海尼曼了，看得津津有味。

我花了一些時間，將幾本海尼曼的電子書和錄音安裝在iPad上。然後，試探下瞕瞕是否喜歡。

可能是本身鍾意睇書的關係，瞕瞕表現出極大興趣。佢亦主動地跟住錄音講market, banana, apple, baby。基本上佢係跟到每一句句子最尾戈隻字，執口水尾，哈哈。

曾經我諗住等瞕瞕兩歲半之後先入手海尼曼，因為我亦恐怕過早的外語輸入會令他產生語言混淆。但瞕瞕的語言發展得比我想像中迅速，至今他已有了一定的母語基礎，能表達日常生活中簡單既野。如果等多七個月才買，到時他的母語已經變得相當強勢，外語反而無咁易融入。

都係趁佢而家仲未識分咩係「中文」「英文」的時候，去薰陶下佢先！研究證明，強而有力的早期干預，是可以改變一個孩子學習外語的途徑。讀寫障礙之類的問題，其實係可以避免的。

由於我甚為抗拒俾小朋友接觸太多電子產品，我驚害左佢。於是我最終決定了買海尼曼的紙本書，輔以無光影畫面的mp3播放機。

我揀左以下這間淘寶店家。它的價錢比其他店貴少少，但我鍾意它的包裝盒，便於收藏，畢竟有70本書仔！它還有目錄冊和家長手冊，賣家評價也是非常好，全五星好評。

因為我都係啱啱落單，實際唔知幾時收到，而家暫時同瞕瞕睇住電子書先。

另一本我俾瞕瞕睇過的電子書是汪培珽推薦的<In the dark dark house> （Peguin group)。想不到瞕瞕可以專心地聽完這個長達六分鐘的故事，佢唔會搶住部iPad 亂咁督，我教過佢要聽到錄音「叮」一聲先翻頁，佢亦乖乖地照做。

究竟學唔學到野？瞕瞕成朝不停在講「dark dark house」，我反問佢你又知「dark dark house」係咩，佢答我「黑嗎嗎，驚呀」。證明佢或多或少都感受到d野。

而我相信語言需要「累積」「沈默」一段日子，才會有輸出，所以我一點也不心急瞕瞕在短期內有甚麼成績。

瞕瞕呢三日係咁唱「排排坐，食果果，你一個，我一個」（成首）我地成家人都無教過，很明顯係托兒所教的，托兒所應該每朝在「水果時間」都會唱呢首歌。但為何瞕瞕這三天才唱這首歌，他已入托半年了。這意味著，他都要聽半年才識唱。

累積了半年才有輸出。

所以即使我在今天開始同佢睇海尼曼，我也不會期望佢短期內有什麼「輸出」。就算真係有效果，都起碼在4，5歲之後的事。

善意地提供一個學習環境給他就好。

瞕瞕20個月大

在寒冷的冬日，迎來了瞕瞕20個月大。儘管我們已經很小心幫佢保暖和養好身體，但他還是病了，掛住兩行鼻涕，這幾天都在吃藥，還好應該沒甚麼大礙。

日常生活作息，自理 

食飯，睡覺，如廁等生活作息跟上個月一樣，都算食得訓得，長了點肉肉。

因為我知道21至24個月是幼兒進入自理方面的敏感期，也將在這段日子裡，迅速拉開了幼兒之間在自理能力上的差距，所以我目前特別想瞕瞕自己學識食飯。

聽說過有三歲幼兒入讀k1後，由於唔識自己食飯，因此即使學校有搭食服務也享用不了，需要勞煩家長或家傭親自到校餵食，一直餵到六歲仲餵緊:(

這種感覺我真的不會形容，但我決不容許瞕瞕這樣。我覺得一個人即使學習成績再好，卻不會照顧自己，是一種嚴重的缺失。

但家中有老人家幫手湊，愛孫心切，要俾瞕瞕自己學食飯喎，談何容易？？現階段想說服她是極其困難的事，我唯有趁她每次約左人出街食飯先抓緊機會教。

適逢此時友人送了一套圍裙連手袖給瞕瞕。但即使在有圍裙覆蓋保護的情況之下，食完一餐飯都要將瞕瞕整個人拿去大清洗，就連high chair，地板都要一併清潔。

前後搞左個幾鐘，曾經有一刻我覺得自己攞苦黎辛。不過在回想整個過程，腦海中滿是瞕瞕拿著小匙，手震震地把飯送進口中的模樣，而儘管他使勁地張大嘴巴配合，卻因手部不熟練的動作，仍會把飯灑出來，令他落了個空。我按捺不住想助他一把，但瞕瞕堅持自己來，一次又一次，天一半地一半，最後都成功幹掉了一碗飯。

特登整左條片去紀念一下，連結在這裡：

http://magis.to/LTs6RUwBRwIsIX0EDmEwCX14

蒙特梭利很多理念我都很很buy，我最深刻是這位女士的一段說話「幼兒天生有自主學習的本能，特別是在生活自理方面，他們會不斷練習直至這種種技能臻至完美境界」

很感慨！連孩子都這麼努力學習，為何我們大人要阻止他們成長？

你幫孩子的愈多，他們的能力便會愈弱。

大肌肉運作

講下瞕瞕其他方面的發展，他這個月的大肌肉動作進步了，步伐逐漸跟得上同齡。見到吸引既野，可以

踎低玩好耐都唔覺累，識跨過障礙物。

還有開始倒退行十步八步，這叫做「本體感覺」。倒退步行時眼睛不能作指導，身體觸感便會特別靈敏。人在黑暗的房間中行走，摸索，靠的就是這種本體感覺。不看琴鍵而彈琴，不看鍵盤而打字，也是本體感覺在起作用。

其實去到一定月齡，小朋友便會自然地爬梳化，反轉身落床，原地自轉，倒退行走，踮著腳尖行，跑跑跳跳。。。通通都是正常發展，而唔係曳，小心d睇住就ok。

小肌肉精細動作，認知

之前有淘過一些手抓板給瞕瞕，練習精細動作和認知，他學識擺之後已失去興趣。現階段的他狂熱地迷戀三件事情：聽故事，唱兒歌，砌LEGO。

瞕瞕能理解和記憶簡單故事的內容。有一本書叫做＜七色彩虹花＞

，關於一朵有七色花瓣的花，因為心地好meet左d花瓣給小動物，所以自己無晒d花瓣，最後枯死了但變了一道彩虹，更為美麗。

第二朝自己巢返本書出黎，係咁話meet meet meet，自我不斷地回味裡面的情節。

 

相對於零食，圖書亦是一種利誘。我成日都同瞕瞕講「乖先有書睇」，咁佢又真係會短暫乖一陣。朝早叫佢起身poo poo，但佢唱反調在張床度碌來碌去，捉實d被舖枕頭，根本無法將他抱起來。我話「你坐喺度poo poo，媽咪去攞本書俾你睇。」點知佢一坐上塔度，就抬頭問我「我本書書呢？」我話「咁你坐喺度，唔好走開呀，媽咪去攞書」佢答我「知道」。

自此，朝早poo poo和臨訓前，都是故事時刻。

身邊有唔少朋友的小朋友都認識了幾乎全部字母和數字，但瞕瞕係一個字都唔識的，一同佢講親呢d就好抗拒。我唔想迫佢，呢d暫時放緩一邊吧。不過佢又唔係完全唔識字母和數字，佢見到衣服或招牌上的英文字會大叫「ABCD」，見到超市收銀機打出來的價目則大叫「1234」，而且佢識唱半首ABC song，由A唱到P，又識打算盤，一粒一粒珠咁數1234...

至於顏色和形狀，佢可以做啱晒d 配對，但依然未講得出任何一種顏色和形狀，至少我知佢辨認顏色無問題就得，都係等佢慢慢來吧。可能下個月會識，又可能下下個月會識。

LEGO是歷久不衰的經典玩具，真係由一歲到一百歲都啱玩，我覺得值得投資。除左學動手砌一樣野出黎之外，最重要的就是構建了一個想像世界。細路成長過程中，極需要想像遊戲，好似煮飯仔，Barbie都係一種想像遊戲。

我同瞕瞕一齊用LEGO Duplo 砌左個停車場，加上一架Vtech車車，瞕瞕沈迷地玩左好耐。「開車，坐車，停車，砵砵，開門，關門」等字眼佢都係從呢個遊戲中學識的。

後來我得知淘寶有仿LEGO玩具，有很多不同主題，包括：遊樂場，海洋，農場，火車軌道，森林。。。etc，我小試牛刀買左佢地的遊樂場和汽車套裝，質量好極了！而家瞕瞕日日沈醉在自家LEGOland裡，推薦左俾好多朋友。

語言

瞕瞕意識到世上萬物皆有其名，所以佢現在極努力地學習更多的名稱，大至於滑梯秋千，小至於母指食指中指無名指尾指，佢都很積極地去記住這些名字。

這一個月以來，我看到瞕瞕語言方面的最大進展，明顯在於組合句子。

他會表達一切需求「我要玩／睇／食飯／落地／訓覺／渣住／抱我洗手／幫我剝鞋。。。」

表達一些感覺「我鍾意／開心／驚／唔要。。。」

表述人地做緊乜「嫲嫲走左／daddy洗手／樂樂返屋企／媽咪換衫。。。」

表述發生咩野事「花花跌左／飛機爛左／提子食晒，無啦／水水飲晒，無啦。。。」

 

有時講d野好搞笑。話說瞕瞕很貪靚，出門前幫佢戴好帽，頸巾，手袋後，佢會自己走去開衣櫃門照連身鏡，邊說「我要睇靚仔」

比較起以前無咁生保，但依然很怕醜。搭同一部lift時，陌生人聊他，他會害羞地把臉埋在我懷裡。姨姨叔叔打趣地問他「bb你去邊度啊？」此時我在他耳邊輕輕的提示說「我要返學」，他又會鼓起勇起同人地講「我要返學！」

 

總結

這個時期能看出瞕瞕性格的雛型--專注而不執著，內向但開朗，雖膽小但給予鼓勵也願意嘗試。

特別的韓國手信

好像心有靈犀一樣，當我正在物色緊d認物掛圖，行左幾間書店+淘寶都未有心水的時候，突然收到一份來自遠方的心意。

掛圖一共五張，主題分別是：動物、交通工具、生活用品、人物器官、顏色形狀。韓文其實無礙於圖像認知，而且我一向也傾向於實物認圖，而非卡通，所以我可以話係超鍾意這份禮物，當然瞕瞕都好鍾意啦。

由於家中地方有限，一次我只能掛一張出來，其他暫時收埋先，等瞕瞕學到咁上下，先至換另一張。我打算動物放在最前面，顏色形狀放在最後面。

雖然瞕瞕最鍾意睇動物，但掛圖中至少有三分之一他是不認識的，例如熊貓、狐狸、駱駝、企鵝、孔雀等，我們可以慢慢學習了。而有左這張掛圖之後他新學識的有老虎、長頸鹿、蝴蝶、蜻蜓、兔仔等。搞笑既係，瞕瞕會成日指住隻蜻蜓叫「飛機」，乜真係有咁似咩？不過當我問佢邊隻係蜻蜓，佢又可以指啱俾我睇。

我將此事post上Facebook分享，有些朋友以為我瘋了，咁細個就灌輸瞕瞕學韓文，畢竟現在學韓文是大熱。但梗係唔係啦，邊有d咁既事，我自己都唔識韓文又點教佢喎。等佢識認晒全部圖畫，用廣東話講得出來，我已經很開心的了。

玩貼紙書的樂趣

第一次淘貼紙書，是為了搭夠郵費；第二次也是。因為貼紙書很便宜，大概5元一本，如果我還差10元才能包郵，我會拍兩本，如果差20元，就拍四本，前前後後共拍了十多本，哈。當初沒想到瞕瞕會咁鍾意玩，而且透過貼貼紙，都學到d野，還增進了我們的親子關係。

我們的玩法是這樣：打開中間有貼紙戈頁，我問瞕瞕要邊個貼紙，等佢揀一個之後，再引導佢貼在相關戈頁適當既位置。

以下分享一些瞕瞕自己貼出來的作品，童稚的世界真的很有趣。

1）馬騮仔

瞕瞕鍾意將d 動物貼埋一堆，但又不至於覆蓋在上面。尤其係睇完'Five little monkeys' 之後，佢覺得幾隻馬騮應該要撞埋一齊玩，而且方向隻隻都唔同，就好似five little monkeys在床上又跳又翻筋斗咁。

2）戴眼鏡

瞕瞕是有見過我戴眼鏡的，所以他亦知道眼鏡是貼在眼睛上。對於一個不足兩歲的孩子來說，他準確地做到這個對應貼，是成長過程中的理程碑，我依然清晰地記得當他掌握了這個概念時給我的驚喜。

3）菜市場

這有點像分類遊戲，將各種蔬菜group埋一齊。瞕瞕學識左講「菜菜」「蕃茄」「蘿蔔」etc。

4）派糖

我同瞕瞕講話長頸鹿想食糖，你俾佢食好唔好？瞕瞕高興地答我「好！」佢明白「俾」的定義是要交到對方手中，所以佢都能逐一將糖果貼紙精準地貼啱在小動物手上，我又代青蛙說「呱呱，我仲未有呀，快d啦！」此時瞕瞕會加快速度。一頁貼紙書就好似一個故事咁，每一頁都可以玩好耐好耐。

5）雀仔d羽毛

把彩色的羽毛隨意貼在小鳥身上，這個task表面看來沒有甚麼特別，但瞕瞕一邊貼一邊喃喃地跟住我講「雀仔d毛毛。。。雀仔d毛毛」咁樣又學識了一個新句式。邊貼邊說，其實是導入小朋友學講野的最佳時機。

即使貼完了一本貼紙書，我也不捨得馬上丟掉，而且瞕瞕會把它當作一本圖畫書經常攞黎睇。有樣野令我頗感驚訝的是，某天瞕瞕翻開了貼紙書中間戈頁，指住右上角被meet走了的貼紙空位，說「雀仔d毛毛」，我記得戈個位真係雀仔d毛毛，然後佢又指住左下角個貼紙空位，說「眼（鏡）」，真神奇，佢竟然記得大部份貼紙空位曾經是甚麼，而我已經無晒印象了。