小朋友的私有財產

仍是由最近的事講起。上星期六為父親的60歲生日，訂了兩圍酒席慶祝。

由於席間會有很多小朋友，所以我準備了一些小禮物給他們。

打水機。

我用這個小小玩意代替零食，畢竟不是每一個家長都同意小朋友吃零食。玩下這種懷舊遊戲機則無傷大雅。

瞕瞕今次無想像中咁怕醜喎，都肯叫人，同其他小朋友一齊玩。

大部分時間瞕瞕都係乖乖地坐在自己座位上，拿筆畫畫畫。我畫條魚，佢畫隻眼，樂此不疲。不過後來佢發現左一部風扇仔，係阿妺個仔既。當時哥哥仔行開左去玩氣球，瞕瞕就攞左黎玩。

哥哥仔見到當然要攞返，但瞕瞕又唔肯放手。礙於同枱大人的壓力：「弟弟細呀，你讓佢啦」部風扇仔就被瞕瞕霸住左。

我覺得，瞕瞕係細姐，但哥哥仔都好細架咋，而且正值小朋友私有財產的敏感期，佢所擁有既野必須受到尊重，任何大人都沒有暗示、強迫佢要讓出東西既權利，除非佢自己願意分享。

此時如果你係我，你會點做？

我拎起瞕瞕的玩具，問哥哥仔交換玩一陣好唔好。可惜哥哥仔唔要，仲喊添。

我轉頭對瞕瞕說「哥哥仔喊了，點解呀？」

「因為佢部風扇仔唔見左，去左邊？」

「係咪在瞕瞕手上？」

瞕瞕抬頭看見傷心地哭的哥哥仔，低頭看了看手中的風扇仔。。。

突然佢做了一個舉動，還返俾哥哥仔。

佢應該係感受到哥哥仔唔開心，就算霸住也玩得唔安樂吧。

三個反問就令瞕瞕自省，出乎我意料之外。我本來還打算從他手上強行拿回給哥哥仔。這也是書教的做法 -- 如果孩子拿了別人的東西不鬆手，應當告訴他别人的東西不可以拿。如果他不聽，就要強行取回並還給別的小朋友。不必講大道理，可以允許孩子哭一會兒或者生氣。但經過幾次這樣的事情後，兒童就會總結出別人的東西是不可以拿的。成人用語言來教育兒童沒有太大用處，但在動作的過程中，兒童會自己形成自己的經驗。如果這都能做到，兒童內心的秩序就會形成了。

其實關於這種經驗，我是有陰影的。記得小時候，親戚來我家玩，表弟看見我妹的翠兒公仔就要拿。大人不斷施予壓力「表弟細，你讓佢，買返個俾你」，阿妹已經說明個公仔係特別版，某某送的，你們買不到。但在表弟橫蠻，加上大人不公正對待之下，個公仔卒之跟左表弟返屋企。

我妹為了這件事傷心了很久。表弟家裡有數之不盡的玩具，甚麼玩具對他來說根本都是蕓花一現，d公仔多一個唔多，少一個唔少。但我家很窮，全屋只得一個公仔。最糟糕的是，大人亦沒有信守承諾，無買返個公仔俾我妹。

此事對表弟的成長也有不良影響。以前我一直不明白，為什麼成長在優渥家境中的他，應有盡有，但是性情霸道，自私，小器，自我中心到極點。。。一個人的成長背景對他往後的人格塑造真的太重要，看清了這些，雖然我很不願意在教養過程中跟瞕瞕產生衝突，但為免重蹈覆轍，有時態度強硬，堅守原則也是必要的。