35w6d：持續宮縮

時間來到了35w6d，本來諗住夜晚食飯後，同老公出荷蘭園揀條運動褲，跟住再去新馬路Häagen-Dazs食杯綠茶雪糕。但臨時改變左行程，因為食飯前後都完全感覺唔到有胎動，個肚仲好硬，所以決定上山頂醫院檢查下。


山頂有樣野好，就係急診另外分婦產科同兒科，幾乎不用等就直接輪到我。個阿姨仲問我可唔可以自己行，駛唔駛用輪椅推我。


分流時，護士循例問我一些懷孕資料，如最後一次月經係幾時，第幾胎，有無流產史，平時產檢是否正常。。等等。搞笑既係，佢睇我本產檢手冊，驚訝地說，以，你5月12日預產期，但今日已是20號了，即係遲左一個星期有多，做乜唔上黎催生呀？？


另一個路過的護士反應非常快，撞一撞佢膊頭，善意提醒：而家4月咋！佢先意會過來，係喎，傻左~！


我被安排平躺在床上做胎心監測，護士一摸個肚，即刻聽到胎心，個人都定d。。。佢話要連續做半個鐘，觀察下先。我便打俾老公，好在出面等候室有部電視，播緊謝霆鋒"線人"，唔怕悶親佢。


聽左15分鐘，護士話胎心幾好，唔覺有胎動可能只係bb訓左教教，佢攞左枝電棒過黎督左我個肚三下，bb成個彈起，唔知有無嚇親佢呢？在最後的15分鐘，bb自己郁左兩三下，算有返胎動。


做完胎監終於見到醫生，佢示意我除半邊褲子做內檢，我是生平第一次做這個檢查，都幾。。。少少痛，但一定無傳說中咁恐佈。醫生戴住即棄手套，上面亦塗有潤滑劑(我最關心的事，為甚麼之前聽jm說都沒有呢？？爭好遠個喎)醫生告知我宮頸情況穩定，半度都沒有打開，但。。睇返頭先戈半個鐘既紀錄，發現我咁短時間內有五次宮縮，似乎密左d，而我又只有36週未足月，佢驚我會作早產，寫三日假俾我在屋企休息。最後佢地全部都好客氣地話，如果有咩唔舒服記得再上黎啦。


回家後第一件事就是馬上知會了上級，讓他有一點思想準備，提前為工作人手作出一些安排調動。


p.s.點都好，bb呀，唔好心急，我都係想你等耐少少先出黎，我唔貪心架，起碼養到6磅先。