入托後，大家的小朋友相繼病了

由於開波以來，瞕瞕很適應，很樂於入托生活，所以一直都不需要讓我們掛心。可惜的是，他中了入托就成日病的咀咒，之前是我報喜不報憂，這個問題仍然無法解決。

返托第十日，就住了五日醫院，出院後休養一星期。復課一星期後又再病，病完休息幾天又送他返去，然後差不多每隔幾日又見他流著兩行鼻涕回來，或者係咁咳，或者發燒，或者出疹。總結就是，這兩個月內，佢未試過可以連續超過十日唔睇醫生＞＜

人地話，咁細個的小朋友因為第一次接觸新的病毒，而自身沒有相應的抗體，打敗仗好正常。隨著月齡愈大，身體的免疫機制逐漸成熟，對曾經遇過的病毒存在記憶，可能會打返贏場仗，到時就會好d。其實小朋友最適合的入托時間是兩歲，不過現在托額難求，今年有機會入到，出年卻未必有這種運氣。亦即是說，絕大部份的家長都不會輕言放棄，怕生病就寧願返少d，疏d，點都會留住個名額。

至於我地又唔會咁做，只係瞕瞕真係病左返唔到。

開頭都有些不忿氣，好以得自己個仔一個會病咁T.T...但後來跟一班同學仔的家長熟悉了，才知道大家的小朋友情況都是差不多，也有的入托第二天已ko左，要入院吊針，仲要唔知住幾耐先出到院；也有的返左兩日就想退學，因為小朋友喪喊到嘔奶，回家也繼續嘔奶，都唔知係情緒抵觸導致嘔奶，定係根本就病左，令人不安。

為左減少瞕瞕生病的痛苦，我們能做的都會做，首先打好佢個底，包括讓他食一些營養補充品，如維他命，魚肝油，smart fish，煲d健身湯水；同時加強個人防護方面，接放學即洗手，返到屋企馬上洗澡，換上乾淨衣服。

還有就是對待疾病初期的方法。例如初起的傷風感冒，多數都是不停打噴嚏，繼而流鼻水，鼻水倒流而狂咳，如果此階段不處理就會喉嚨發炎，極痛壓住氣管又勁咳，最後到氣管都發炎就多痰，結果就是有排都未好，所謂咳手尾長。喉嚨有痰尤如傷口流膿一樣，假如當初有洗傷口，有勤換藥，是不會搞到流膿呢一步的。因此在剛開始流兩行鼻涕的時候，已經要留意了。做法是清左d鼻水先，用生理鹽水洗鼻，吸鼻涕，滴鼻，補充維他命c，聞蒸氣，請一日假，咁隔日應該會好。有需要當然要睇醫生，病向淺中醫嘛！