阿媽遺傳

瞕瞕係一隻鸚鵡，經常複製我們的說話。

有些句子甚為複雜，佢當然不可能明白當中意思，但佢能精準地複製三至四個音節。

好似前兩晚同姑9食飯，佢話自己人生四十一枝花，是不老的傳說。

我99話，係喎，點解真係唔覺你老既？

我話：阿媽遺傳（同時恭維兩個）

99大笑：哈哈哈，阿媽遺傳。

由於佢笑得太誇張，瞕瞕即時學講「阿媽遺傳阿媽遺傳阿媽遺傳。。。」

我地都驚呆了。

跟住佢成晚都講住同一句阿媽遺傳。佢根本唔知咩意思，以為好好笑。

點解我會生左個咁搞野既仔？^^＂

托兒所正式開課一個月記錄

瞕瞕就讀的托兒所辦學理念很好，令我們放心把瞕瞕交給他們培育。每個星期五都會派手冊，等家長知悉孩子被安排的教學內容，還有一個表格，詳列其情緒行為表現，讓家校雙方互評。

正式開課一個多月，手冊派了五次，呢篇blog總結一下。

首先是「紀律整潔記錄」，五個星期以來的表現都一樣：

-喜愛來所，不哭喊（表現佳）

瞕瞕一直都無乜點喊，前段日子在分離那一刻佢有些不捨得，會喊幾聲，但很快就平伏了情緒。而家佢超鍾意返學，成日話「阿姨度」，「帶返學」，一返到去就也不回地拖住阿姨入課室，完全沒有拖拉糾纏。我地去接佢的時候很興奮，睇得出佢又度過了愉快的一天

-對人有禮，會說早晨、再會、謝謝（表現佳）

從一開始的懵懂，到揮手示意bye bye, 再到現在大聲同人講「bye bye」，長大了很多。我地而家用巧虎教材教緊佢講早晨，多謝和晚安，佢有意識講，但發音未準確，正在調整中

-能將用過的東西放回原處（表現佳）

瞕瞕算係有手尾，玩過乜都會歸位，話「擺返好」。床頭長期放著三隻公仔，分別是米奇，咩咩和巧虎，佢會視乎心情去親下d公仔，玩到眼訓時佢自己一個個放返好，先至訓。呢樣真係好得意，因為佢並不會攬住d公仔一齊訓，而係一眼訓就放返d公仔去原來個位度，可能係覺得公仔都要訓呱。

試過有日朝早幫佢穿好鞋襪，準備出門口了，點知佢突然走返轉頭，我地仲以為佢扭計唔想返學添，原來佢發現廳間有個櫃桶拉左出黎，於是便走埋去泊返好，小臉上還露出一副滿意的神情。

多少有d似係天生，瞕瞕對亂左序既野好敏感，一定要整返好先至安樂，所以我都估到佢在外面的表現係點

-對小朋友友愛互助（表現佳）

書話，處於這個月齡的小孩未係好識同其他小朋友交流，都係傾向自己同自己玩。所以這項主要是看他會不會爭玩具，咬人之類。

瞕瞕尚算斯文，即使佢未係好識「一齊玩」的概念，都唔會攻擊其他小朋友既。有些小朋友其實是想表示友好，但由於不懂拿揑力度，可能想「摸」下人，便變成「打人」。呢方面我地都有教過瞕瞕，方法是叫佢摸下攬下d公仔，一如我地所料，佢一野便拍落去，我地捉住佢手仔，控制佢的力度「慢慢黎」「細細力」。經過多次的練習，瞕瞕現在已可以溫柔地撫摸我的臉龐和頭髮。佢一d都唔粗魯，從不扯我的頭髮。

也許有人會覺得奇怪，點解我會俾瞕瞕玩公仔，係咪有d乸型。其實這跟柑媽的出發點一樣，不久前她買了套廚房玩具俾柑B玩，係想小朋友從中學習一個模擬既情境。只要戈樣玩具有意義，何必拘泥于男女之分？

-排隊快、靜、齊，走路不爭先（暫未評分）

很抱歉，由於瞕瞕未如同齡小朋友行動穩健，所以班主任不安排他跟同學仔一起搭膊頭排隊。但這又不代表他不乖，我相信他一樣會乖既。

老老實實，瞕瞕在大動作發展方面，真的慢過別人，而這不是他的錯。往後我會努力幫助他增強肌肉鍛鍊，期待有所改進。

-午睡能安靜，姿勢正確（表現佳）

咩叫午睡姿勢呢？哈哈，我都唔係好明。跟其他家長傾過，估計係屬於指令類，阿姨叫眯埋眼就眯埋眼，叫蓋好被子就蓋好被子，乖乖睡吧。

值得安慰的是，瞕瞕由細到大都唔怕忸眼訓，也不需要暗訓。他一感到睡意，便會哼歌仔氹自己訓

-吃飯時有規矩，不太快或太慢（表現佳）

呢一part我深感托兒所訓練得好，在這麼短的時間內，佢已學識用開口杯飲水，仲識得端起飯碗飲湯。

托兒所膳食安排營養豐富，瞕瞕比較有胃口，通常都會跟著大夥兒把食物吃清光。

可是他在家裡吃飯卻不乖，令人非常勞氣

-上課能留心（表現佳）

班主任話瞕瞕適應力強，迅速融入了新環境，一靜下心來就吸收到許多新知識。她的一番話令我想象到瞕瞕專心地玩玩具，聽故事的畫面。不論何時，他專注的神情是最吸引的

接著分享教學內容。瞕瞕很幸運有托兒所讀，如果放在家裡，父母都要上班，長輩又只會以照料他的生活起居為主，一定不及托兒所學得多。

Week1（9月22日至9月27日）

認物：玩具箱和小熊 

英文：A

數數：1-5

識數：紅色

兒歌：玩具箱，親小熊

唱遊：小豉歌

Week2（9月29日至10月4日）

認物：小皮球

英文：B

數數：1-5

識數：紅色

兒歌：小皮球

唱遊：小鼓歌

Week3（10月6日至10月11日）

不詳，忘了記低，估計學了個C字

Week4（10月13日至10月18日）

認物：積木

英文：A-C

數數：圓形

識數：1-5

兒歌：積木多

唱遊：玩具汽車

Week5（10月20日至10月25日）

認物：餐具

英文：D

數數：1-5

識數：「1」的認識

兒歌：小寶寶，用餐具

唱遊：三輪車

我覺得托兒所已教得很多野了，當然識唔識又係一回事。總之我是個懶媽媽，在家中幾乎從不教他ABC123，打算由托兒所代勞。我享受用有限的時間同瞕瞕在繪本世界裡遨遊。

手眼協調小玩意

不久前我睇過一本蒙特梭利，關於兒童敏感期的書，裡面提到一件教具，叫做「幾何圓柱體插座」。

圓柱體插座這東東，體現了蒙特梭利教學法的基本思想，用身體感官得到認知技能。幾何是空間的邊界，而圓柱體插座把幾何的概念直觀化。簡而言之，就是讓兒童通過圓柱體插座的操作，從中發現大小形狀並感知序列，比較錯誤對應和正確對應，去掌握空間這麼抽象的概念。

睇完相關描述後，我感到有興趣，想弄一副來跟瞕瞕一齊研究下。本身打算帶瞕瞕去氹仔教育活動中心借黎試下，但一來山長水遠，二來有手足口病風險，所以打消了這個念頭。

最後靠萬能的淘寶，找到了我要找的。貨比多家之下，簡直難以置信以32元的價錢，可以買到如此精緻的玩具。稱之為玩具，是因為瞕瞕一定會視之為玩具，佢對督窿窿一直很著迷。與其成日用手指去督d不知名的窿，不如籍住呢件玩具俾佢消耗下呢方面既精力。

收到貨後對質量相當滿意，一共有四組。我先拆了最容易的一組：高矮一樣，肥瘦不同。其他三組則是肥瘦一樣，高矮不同；高矮肥瘦全部都不同，遞增或遞減。

一如我所料，瞕瞕馬上愛上這玩意。佢首先用自己的手指逐個窿督下，這個小動作看在我眼內覺得很有趣，畢竟幼兒是會用手指探索這世界，然後才拿起這些圓柱逐個窿配對。

有時佢會擺錯，不過經我提示之下佢會再試到擺返啱，佢算係好好耐性的了。其實這套教材最難的地方在於，將四組二十粒圓柱泊在一起。但我覺得不必一下子將難度提到咁高，而且我唔想咁快遺失晒d小配件，暫時都仲係玩住第一組先。得閒就攞出黎俾瞕瞕玩下，不知不覺訓練下佢的專注力就算。

為左享受包郵優惠，我仲買左一套穿珠仔玩具。雖然50元貌似有d貴，但它可能是整個淘寶最正的同款玩具，無氣味，唔甩色，打磨光滑沒有瘕疪，兩面都有圖案，每一粒珠仔的大小和厚度也不一樣，即係難度都唔同，更堪玩味。

我原以為串珠玩具會附送一枝木針，點知係一條鞋帶，仲擔心瞕瞕玩唔到，但出乎意料佢handle到。見我示範過一兩次後，佢已穿得有模有樣。開頭試過穿極都穿唔到，發脾氣掃晒d珠落地下。由於我最唔欣賞別人發脾氣，所以一去到佢快要脾氣戈個位，我就善意提出話「不如媽咪幫下你」，跟住就慢動作地示範給他看。因此佢知道了可以讓媽咪幫忙，於是打後幾次佢穿唔到，就叫嚷「媽咪，@#-¥€*%珠珠呀！」@#-¥€*%是一連串bb話，但佢講得出d關鍵字，令人足以明白佢既意思。

然而，在提供幫忙既同時，我對他說過「試另一粒」，因為d珠珠係有厚有薄，有大有細的，肯定是又細粒又薄的易穿。這些遊戲根本沒有分輸贏，取易而行也不為過，即使是取巧地完成一半，總比發脾氣放棄一切要好得多。瞕瞕亦能明白我所指，佢穿呢粒唔得會試下第二粒，穿第二粒唔得佢又再試第三粒，試得多了他技巧也純熟了，慢慢地他可以自己穿起一條頸鍊了，中間過程沒有再發脾氣，我也為他的改進而感到萬分高興。

此情此境，我想起龍應台的一本書＜孩子，你慢慢來＞，書名和題辭正符合我的心情寫照。

我，坐在斜陽淺照的石階上，望著這個眼睛清亮的小孩專心地做一件事；是的，我願意等上一輩子的時間，讓他從從容容地把這個蝴蝶結紮好，用他五歲的手指。孩子你慢慢來，慢慢來。（節錄自孩子，你慢慢來）

About potty training

三個月前的這一天，是瞕瞕初進托兒所的日子。才沒幾天，我地就發現佢每次poo poo左，都會用雙手掩著下面。即係話，佢已經有這種意識，也知道要告訴別人，不過當時佢只有一歲兩個月，未識講，所以用手勢表達，而這個手勢應該是托兒所阿姨教的。

而此時又剛好是瞕瞕處於秩序敏感期的月齡，我地十分注重幫瞕瞕建立一套定時的作息規律。我地最初的想法是如果每一餐都俾佢準時進食，咁佢亦會準時有得poo poo。於是每天瞕瞕踏正七點睡醒，飲完8安奶後，五分鐘之內就會poo poo。其實能在指定的時間內poo poo是很好的，可以等我地有所準備，減低了爆片風險，床單不再遭殃，免卻了我地清理收拾的功夫，而且也不必再擔心出街換屎片的煩惱。

這段歷程大概經過了兩個月，瞕瞕真的每天都準時地poo poo在片片上，我地待佢一poo完就馬上捉佢去清洗。瞕瞕更從中學會了講「痾屎」，「痾晒」這些關鍵詞。轉念一想，既然佢已經識得清楚地用語言表達，為何不嘗試直接讓佢自己坐在potty上呢？

本來我地打算買個漂亮和多功能的potty給他，但考慮到空間和男仔生理結構等因素，又結合到朋友提供的意見，最後都係由嫲嫲買了個傳統的紅色痰盂。

唔知係咪新屎坑三日香，瞕瞕對坐potty全無抗拒，不過佢要求睇書，成個麻甩仔咁，哈哈。至今佢已成功戒掉屎片逾一星期了。

至於戒尿片，聽講男仔會慢d，而且我地亦認為遠遠未到時機，也許要過了這個冬季先，到時候再配合托兒所幫忙，慢慢來吧。。。

巧虎第二回

由於瞕瞕對第一期的巧虎反應不俗，因此令我一直很期待下一期。於是今次一收到mama care電話通知，便即刻去攞，回家又即刻拆閱。

但我們睇完所有內容之後，覺得好似無上一期咁好睇，連老公和朋友都有這種感覺。

「晚安，早晨」戈d瞕瞕一早已識講，佢又唔會唔肯沖涼洗頭。。。今期生活主題對佢黎講無乜特別。沖涼戈頁既意義，就係咁塞隻巧虎公仔落去個窿度，其實瞕瞕有點不知所措，又或者佢唔係好明。

至於訓覺戈part，因為平時都有教瞕瞕整低巧虎公仔，再舖條紗巾仔當被，所以佢有少少sense，一見到戈頁，就立即自己去床頭拎個巧虎公仔，再拉起張卡紙蓋住巧虎當被。佢甚至話俾我知，張被上面的圖案係「魚喎」，講真我完全沒有留意，而你都幾細心。

今次瞕瞕唯一學到的新知識，是「兔兔」^____^

沖涼戈套玩具算唔錯，不過我本身已經有一套了（不是同一套，但idea是一樣的）。其中有一個杯，杯的一端有幾個小孔，戴滿水後水流會分別由幾個小孔飛瀉出來，瞕瞕一拿上手就知道是這樣玩，他用一隻手端起杯子舀水，伸出另一隻手接住細細的水柱，佢非常沉迷於這個遊戲。

還有另一件小東西（是潛艇乎？），浸滿水後，輕按著它可以噴水。瞕瞕玩得不亦樂乎。 

愛玩水玩沙是小孩的天性，他們仿似永遠都不會厭倦。