非預期進度

本來我以為瞕瞕在一歲過後就會識行，所以當初諗住入托前（即7月21日前）帶佢出去影很多戶外寫真。

可惜時光一躍去到10月，瞕瞕在這方面的進度幾乎停滯不前，甚至倒退，不但使我的攝影計劃泡湯，而且我們又開始擔心他了。

雖然他在一歲三個月零十日那天第一次放手行，但他想行的意願始終不高。身邊的人叫我用玩具或食物引佢行，佢就只會迅速地爬過來。拖住佢隻手可以行得好地地，一放手就跪喺度或坐喺度，唔肯再行，問佢點解，佢係咁拍心口話「怕怕」，我地估佢極大可能在托兒所跌親。 

當然我相信佢機能上是沒有問題的，不過每次看到人地d小朋友已經跑跑跳跳，我心裡都感到唏噓，點解瞕瞕明明識行都唔行，99仲話「咁爬法要爬到幾時，唔通成世都係咁爬。。。」更加令我納悶不已。

Blog媽們你地話我點好？

與此同時，瞕瞕在語言方面卻又以另一種非預期進度發展緊。根據正常進展，幼兒在歲半能講出五樣有意思的東西，例如：貓貓，狗狗，波波，車車，餅餅已是達標。

記憶中瞕瞕在一歲兩個月的時候都做到以上所指，現在接近一歲五個月的他，可以講一些音節較為複雜的東西，前幾天他學識了奇異果和士多啤梨，發音是「提朵」和「知多啤」。即使發音仍不太準，但佢每次都會自我調整，讓發音逐漸趨近原形，明顯地不斷有進步。

老公話覺得瞕瞕最得意就係成日話「爸爸喺度」「嫲嫲喺度」「媽咪邊度」，而我覺得佢最得意係會將玩過既野放回原位，還一本正經地說「擺返好」。

我在淘寶買過一套bb衫，包裝非常精美，附送了一個連衣架的有拉鏈的透明膠袋，而家變了瞕瞕的新玩具，他將一些小玩意（車仔，積木之類）放進膠袋，拉上拉鏈，提著衣架fing 來fing去，一面話「袋啊，街街啊~」。

剛剛過去的煙花節，我地帶瞕瞕睇左一場，教佢叫煙花做bom bom，於是整個晚上佢都指著夜空，興奮地大叫「bom bom喺度，bom bom靚靚！」喺度和靚靚是他自己加上去的，由此我知道他其實明白了不少詞語的配搭使用。

只要是瞕瞕認識的東西，他都會開心地叫出來。我試過開YouTube 播一首叫做Alphabet song的歌給他聽，首歌內容大意是＂A for apple, B for ball, C for cat, D for dog, E for elephant, F is fish, G for gorilla, H for hat, I for igloo, J for juice..." 瞕瞕邊看著畫面，邊順序地自己指讀出「apple, 波波，貓，汪汪，er~（模仿大笨象叫聲），魚，馬騮（佢將猩猩誤認作馬騮），帽帽，（igloo佢唔識所以無講），橙汁」。那一刻我有些驚訝，佢好似做緊即場中文翻譯配音咁，哈哈。

對答方面更有趣了。

你錫唔錫媽咪呀？

錫錫。

你叻唔叻呀？

叻。

咁媽咪靚唔靚呀？

靚靚。

諸如此類啦，佢而家識同我傾計，我多左個傾訴對象，生命充滿了意思。