巧虎11月號．乖乖地食飯

「有無覺得今期既巧虎薄左好多？」Blog友Whatsapp我，問了這麼一句。

其實今期的巧虎剛拿回來後，我也沒有仔細看，只知道內容大概是乖乖地食飯之類，很多部份都需要家長幫助拼砌。適逢瞕瞕又病左，根本茶飯不思，完全唔係時候講呢d，便將它收起來，半個月後先再拎出來。

首先給瞕瞕玩的這個「音樂律動搖鈴」，但裡面竟沒有附送的電芯，成日話買都唔記得，買左又找不到螺絲批，囧。。。

幾經周轉，個搖鈴終於可發聲，開頭瞕瞕都玩得幾開心，不過佢更有興趣既係背後的開關，佢知道on/off制才是發聲的關鍵。而這類按鈕玩具間唔中會自己突然發聲，除非off左佢。瞕瞕好唔鍾意玩緊一樣野時其他野發聲，所以成日走去關上所有會發聲的玩具的開關。

待瞕瞕精神好返d，佢主動同我講本書的內容。由第一頁翻起，佢話封面戈d係葉，因為以往星期日都有帶佢行山，所以佢知道地上黄黄啡啡戈d係落葉。

瞕瞕自己睇得明本書，係咁話「巧虎食飯」「魚」「肉」「菜」「湯」「食晒啦，無啦~」我趁機曉以大義，讚巧虎食飯好乖，瞕瞕食飯都好乖，同巧虎一樣咁乖。我送了一個「巧虎叻叻」貼紙俾瞕瞕，讓他自己貼在high chair上，經常提醒他食飯時記得要乖。

每當瞕瞕食飯時又想扭扭擰擰，我就問佢巧虎叻叻喺邊呀？佢指住個貼紙，我話巧虎食飯時好乖個喎，你都。。。話口未完，佢又肯食多啖，再氹又再食。由於有巧虎的魔力，所以瞕瞕而家食飯都算有規矩，食完仲識學巧虎抹嘴。不過我唔知呢個方法可以keep到幾耐。

 

好多人都問我巧虎係乜，係咪DVD？我的答案是：巧虎是一隻卡通老虎仔，圓頭圓腦的很可愛，它是小朋友的榜樣，每期都有一個生活自律/自理主題，例如：手拖手，食飯，去廁所，打針食藥，做家務，分享等，用一種正面洗腦的方式，將一些好習慣的潛意識印記在小朋友腦海裡。這跟一般學ABC的早教教材有極大不同。

巧虎貴就貴在idea，優質的書和玩具也只是其次，因此我並不在乎巧虎書的厚薄，只要戈期至少有一個point係瞕瞕學到的，成為他好習慣的一部份，就已值回票價了。