停課

本來22日的大假，可以休息，可以做自己野，但是瞕瞕突然病了，而且今次幾嚴重添。

由於連續高燒三日（40.8度），所以至少上左山頂兒科急診三次，為了寫假紙照顧他。

在第三次睇急診時，咁啱我見到瞕瞕隻耳仔好似有d野流出來，便問醫生係咪發炎，因為有前科。

靚女醫生照完耳仔，神色有點凝重，但沒有多講，只是飛快地打了一封信，轉介我地去耳鼻喉科跟進，不過要排期到明年一月-__-...

拿藥的時候，藥劑師對住張藥單皺晒眉，問我知唔知呢d係咩藥，點解醫生要開咁重藥。講真我又點會識？！

於是藥劑師就直接打電話問醫生，一再confirm之下，d藥先出得街。我覺得他超有責任心，正準備寫封表揚信俾佢。

不過正因為d藥開得咁重，我自己有所保留，所以決定睇多個醫生，聽取多一點意見穩陣d。

於是翌日我就帶瞕瞕去睇一個頗有名氣的私人耳鼻喉科醫生，中耳炎原來是這樣可怕！醫生用內窺鏡照瞕瞕的耳仔，裡面情況即刻顯示到在電腦屏幕上，見到充血，水腫，流膿。。。醫生俾我睇正常的耳膜係點，又同我解釋瞕瞕的耳膜變成點。佢話瞕瞕的中耳炎係俾d感冒菌上左耳仔所致，正常的耳膜係圓形，光滑，反光，但瞕瞕的耳膜已被病菌侵犯到變左形，巢左，不光澤。聽到呢度，令我擔心不已。

而當醫生知道瞕瞕高燒不退，話其實已經係住院邊緣，不過可以試下打消炎針先，如果有效在三日內控制到耳仔的炎症，就不用住院。

幸好當天打了第一針後就完全退燒了，好在好在搵到個好醫生，之後都有keep住返去複診，三日治療期內耳仔好返九成，精神也好轉了很多。

跟住戈十日係康復期，醫生話這段時間不能再讓他接觸到其他病菌，即係不要俾佢托兒所，以免病上加病，令病情反覆。

此時瞕瞕的班主任又通知我，托兒所爆發了手口病，叫我暫時不要帶瞕瞕返去。結果瞕瞕前前後後停課了半個月有多。Blog也停寫了差不多咁上下時間吧。

瞕瞕今次是第二次中耳炎，之前戈次真係有住院，罪魁禍首都係控制唔到流鼻涕。正常一個小朋友感冒第七日才會有中耳炎，但瞕瞕抵抗力比人地差d，耳鼻免疫屏障唔得，第四日已經顯變為中耳炎。

因此，以後要加倍小心，即使看似是普通傷風感冒。完全明白咩叫做長憂九十九。