在托兒所學回來的說話

身邊好多人都話返托兒所學野會快d，包括學講野。我唔知道有無關係，不過瞕瞕講既野，有d的確從托兒所學返黎，因為淨係得戈度先有咁既語言環境。

前幾晩，我地大人食飯，瞕瞕走過來痴餐，我便往他口裡塞了一點白飯，平時都是煮爛飯仔給他吃，可能一粒粒的更有口感，瞕瞕覺得很新奇，咀嚼幾下吞落肚後，又再要求攞食。這時他爆出了一句：姨姨食飯！！ 

瞕瞕見我們沒有反應過來，便抓住餐桌邊，gut高腳焦急地大叫：姨姨食飯！姨姨食飯！！姨姨食飯！！！

一句表達得多麼清晰的句子啊。但為甚麼他會叫「姨姨」，而不是媽咪或阿嫲呢？

我地猜想佢係在托兒所咁樣叫慣左，因為照顧幼兒的阿姨是一對五的，小朋友坐好一排，阿姨由左至右，餵了第一個食一啖，就餵第二個。。。如此類推再餵返第一個。有d小朋友食得快，有d食得慢，食得快戈d自然會不停叫攞食，但都要阿姨sense到先得。唔怪得同事講過，如果連攞食都唔識，就連屎都無得食！

接著第二晩，我地叫外賣上海野返屋企食，當中包括饅頭。瞕瞕見我地開餐，佢又興沖沖走過黎攞食。令我們非常驚喜的是，瞕瞕識得自動波地將戈句「姨姨食飯」，改為「姨姨食包包」。當然如果佢識改為「媽咪/阿嫲食包包」就更perfect。不過我地對佢其實無乜要求，反正遲早會識。只要提供正常的成長環境，幼兒在語言方面獲得的能力，是一件極其自然的事情。 

有好多野，無特別教，去到一個特別時刻，佢就自己轉tune，例如之前瞕瞕見到張全家幅，佢會指住男戈個叫daddy，女戈個叫媽咪，中間戈個叫bb，而家佢已識得將bb叫做瞕瞕，佢已明確自己的身份就是瞕瞕。不久後佢又會識將瞕瞕改為「我」，到時就是他發展出「你、我、他」概念的時候。