肚痾算唔算病？

有一晩臨訓前，瞕瞕在bb床上砵左幾下，我心想，該不會是這個時候有便意呱？應該係放屁而已，加上瞕瞕都無扭計，照訓可也，我便沒有為意。

第二天一早便發覺瞕瞕賴左pat 屎，而且pat pat又紅又腫，我個心即時感到內疚，因為我知道係up住成晚先搞成咁。

但事情並未完結，同一日裡面，佢又痾多幾次，每次只係得少少。老人家話哞牙仔係咁，正常個喎，見佢又無發燒，便由得佢了。

如是者又再過左一天，老公同我趁天氣好帶瞕瞕去公園玩，但點知玩玩下佢突然扭計喊，又抱又孭都唔制。我地估佢可能扭眼訓，帶佢返屋企休息下先。未開片已知佢又賴左，滲濕了一片，好在冬天d衫夠多夠厚，先無整到面衫。由於當時已是傍晚，所以我地決定等第二日一早先同佢睇醫生。

十點鐘出發，在鏡湖門診掛號時意外地見到宋冬其醫生有當值，聽講佢係成個兒科最好的醫生，但係輪候號要等30個。。。唔理，照掛左先。

姑娘探熱後話無發燒，仲叫我地唔行開，因為好多人電話預約左宋醫生，但其實未黎。結果變左第四個就到我地。其實我已忘了宋醫生講乜，總之佢既意思係唔嚴重。唔駛半個鐘已睇完醫生，只係在藥房攞藥等左好耐，最後差唔多要一點先走得。

由於我這個媽媽沒有餵藥經驗，好自然地認為飽肚先食藥，點知d藥太難食，嘔到一身都係。講真瞕瞕咁大個先係第一次嘔咋，情況好似山泥傾瀉咁，差d嚇si我。擔心之餘，跟住仲要執拾了一大輪，重新餵飽瞕瞕，累上加累，有些欲哭無淚的感覺。

即使醫生話唔嚴重，但都要痾返三五日至好。一包Pampers M碼尿片一星期唔夠就用晒，換片已經換得好密，可是無奈瞕瞕個pat pat都係損左。。。唔係，正確既講法係潰爛左，甩皮，流血戈種，每次幫佢搽藥佢都痛苦地叫喊。

痾到第五日，有次一解開條片，看見裡面有血，叫埋99黎睇，佢同樣分唔到係痾血定pat pat d皮膚損左出血，唯有睇多次醫生。

第二次決定睇山頂，皆因我都想了解下兩邊醫院的情況。這是一個不幸之夜，正常在山頂睇兒科急疹，個零鐘就搞掂。但這晚有很多小朋友縫針case，一個就hold住左醫生半個鐘，結果我同瞕瞕等左4個半鐘，真係由日落等到半夜。最慘係我無預期要等咁耐，連bb車都無帶上去，等等下瞕瞕仲訓左兩個鐘，我只可以單手抱住佢，第日隻手痛到已抬不起。無論如何，以後凡係要等待既野，都一定要推埋bb去。

期間都有d有趣既野。坐我隔離個bb 9個月大，自己在唱歌仔。瞕瞕好鍾意人地d小朋友，想交流下，便大聲叫嚷回應。勢估唔到人地個bb就咁俾瞕瞕嚇親，將臉埋在媽咪心口哭泣。瞕瞕見個bb喊緊，扮個鬼臉吐下舌頭，便擰轉頭聊另一邊個姨姨。個姨姨稍為俾少少反應佢，佢興奮到手舞足蹈。全場咁多病童，我估佢係心情最好既一個，根本一d都唔似有病。

終於叫到瞕瞕個名，首先姑娘幫佢磅重，頑皮的瞕瞕踢到個磅的兜砰砰聲，姑娘鬧佢曳，叫佢坐喺度磅，而家瞕瞕重8.4kg，依然是個中碼b。

醫生話呢個季節好多bb都肚痾，不必過份緊張。至於出血既問題，係便便出得太快，衝破了肛周表皮血管所致。同腸胃出血無關，令我鬆了一口氣。醫生無乜點開藥，主要開左d消化酶之類，只要腸胃免疫功能恢復，就自然停止肚痾，我都十分buy山頂的做法，bb食咁多藥的確唔好。

時至今日已有一個星期多，瞕瞕完全好返晒，無再痾了，只係等pat pat 損左戈層皮自己生返埋。不過痾左咁多日，係咪瘦左呢？

人地話bb六個月大之後，從母體帶來的抗體用完就開始多病，等睇病時隔離個姨姨仲同我講，只要不是輪狀病毒痾到脫肛脫水，少少肚痾唔算病。遲d一入托兒所，有集體感染危機，更加一日病到黑！而家就當係預習下睇醫生程序同照顧下bb啦。