Without a Pause: 瞕瞕的公公婆婆

2013年7月13日星期六

瞕瞕的公公婆婆

未有bb前，我每個星期都有keep住返娘家看望父母，大肚後由於行動不便，開始換左佢地過黎睇我。雖則佢地已經退晒休無咩特別野做，但要兩老撲來撲去(等巴士，迫巴士，再行一段路先來到我家)，始終有點不好意思，有時都婉拒佢地，不過佢地依然堅持一有時間就搵我，使我從中感受到佢地對我真切的愛與思念。

我在生產住院期間，父親和Elsa姨姨剛巧因身體抱恙，錯過了山頂的探病時間。所以在出院後，佢地一直等到十二朝，便迫不及待上來探我。

瞕瞕係父母的第四個男孫了，初見照樣興奮無比。父親抱起瞕瞕的時候，忍不住轉身問母親：我地生d仔女有無咁細粒的？

他的意思是，瞕瞕比我們四兄弟姊妹出生的時候還要瘦小。真的不知道為何會這樣，我整個懷孕期的產檢，瞕瞕的發育週數都是正常的，甚至超前，而我最後一共重左37磅，對於本身只有80幾磅的我來說，差唔多肥左50%！所以真係估唔到瞕瞕會咁瘦，直頭係成個b房最瘦既bb。

佢地仲帶左兩個表哥仔來，大表哥仔叫做峻峻，7歲8個月，細表哥仔是霖霖，1歲9個月。兩兄弟來的，哥哥頑皮，細佬可愛。峻峻係咁0係度用雙手比劃緊瞕瞕的大小，佢話瞕瞕好似得佢隻手掌咁大喎！

父母有d奇怪我地無安排滿月飯局，又唔好意思問，我解釋返會搞百日宴。但佢地唔理咁多，跟足傳統在瞕瞕滿月這天，準備了一些禮物給他，包括兩套衫仔，一條金鍊仔。

特別喜歡這套衫仔，著得瞕瞕好醒目。可惜剛過了滿月不久就唔啱著了，本來很簡單的一件事，我心中卻掠過一絲傷感－瞕瞕一日一日咁長大，意味著我父母也一日一日地老了。