網頁

2016年6月26日 星期日

瞕瞕的三歲生日

唔知大家對近日全城熱論「贏在射精前」有甚麼看法?bb既出生月份的確係可以計算,實不相瞞,我都係咁樣計劃生瞕瞕出來的。


不過是我的出發點完全不同罷了。


我只是好傻好天真地想瞕瞕同我一齊生日咋。


雖然我老公總是認為「計劃趕不上變化」,但我卻是那種相信「凡事經過計劃總會提高成功機率」的人。


結果如我所願,瞕瞕跟我在同一個月份出世。而今年新舊曆相遇,我同佢更在同一日生日。鼓掌鼓掌。




其實我都很佩服其他媽媽落足全力地幫小朋友搞一個生日會,自問真係無咁既心力,而且我是一個喜歡平淡生活的人,所以幾年來都係一家三口簡單慶祝。


對瞕瞕來說,只要有蠟燭吹,有蛋糕切就已經夠開心。這些「儀式」在佢的角度是非常重要的,其重要程度,比我地想像中還要重要得多。話說生日當天,我地正常地吹蠟燭和切蛋糕,但蛋糕吃不完,第二天再拿出來切左一份俾佢食。點知佢一見到面前那片切好了的蛋糕,突然全身宛如雷擊,接著嚎哭不已。


經過一番了解和慰問,先明白原來佢唔可以接受「無份吹蠟燭和切蛋糕」,所以一切又要undo,我地重新找來蠟燭點上,等佢唱左生日歌,等佢吹熄蠟燭,再等佢切好蛋糕,分配好,破涕為笑。。。終於可以食= ="





某程度上佢都幾執著,但只要佢開心,呢d咁小既事我地都會盡量滿足佢。




三歲的瞕瞕,一個充滿靈氣的小孩子,無條件地愛著自己的父母,有時我都想將時間停留在這一刻。以下分享一件眼淺小事:


瞕瞕曾對我講了一句說話,令我覺得對住佢再辛苦也值得,我願意為佢做任何事情。


佢話:「大個我會照顧你。」


我感到極之愕然,追問了幾次邊個教佢講。佢話自己教自己。


當時的情形是這樣的,佢已在床上碌左一個鐘都未訓著,仲碌醒埋我。


我同佢四目交投,我沒說話。


黑暗中,佢閃亮亮的眼睛看著我,殷切地說:「我讀新學校戈時你要來接我放學喔~」


我當然想,我說我會盡力,只是我也要工作,工作的意義是什麼,是為了我們現在的生活,是為了大家將來的生活。


我講完,仲驚佢會諗唔開。


佢就突然講左句大個會照顧我。


我攬住佢。。。佢好快就甜甜地進入了夢鄕。


我還是忍不住流了幾滴眼淚。


我感動是因為我覺得佢明白事理,因為佢懂得感恩。


無論邊個做佢阿媽佢都有個心去回報,覺得自己好幸運可以做佢媽媽。





2016年6月23日 星期四

好用的床上桌

我同瞕瞕有睡前閱讀的習慣。從佢bb時只能專注一分鐘,看一頁書;到現在三歲,可以連續看上一個小時也不知厭倦。由於時間逐漸拉長,而佢日益長大的身體又被我環抱在懷中,沈重地壓坐在我的大腿上,我開始感覺到腰酸、背痛、腳痺。


正在此時,朋友跟我分享她淘到的好康物。那是一張可摺疊的小桌子,可以張開放在床上看書,打電腦,甚至飲咖啡。。。就稱它為「床上桌」吧。它取大的可取之處是桌面角度可以自由調較,斜斜地承載住本書,等我地唔駛再做低頭一族,護脊又護眼,而且收納方便,只需要一條罅,就放到,剛好我的床邊就有這麼一條罅,我覺得這個idea十分好,所以馬上淘返張。




我隨心願揀左最順眼,最潔淨的銀灰色,一收到試用就即時後悔了——後悔點解咁早d買啊??我對質量和效果都感到非常滿意:)





對比一下,以前看書多累啊,真的不能長此下去。







還好入手最大的17吋,枱面足夠讓瞕瞕放一本畫冊,再放一盒顏色筆。等時或者做些小手工也可以。




自從擁有左這張床上桌,瞕瞕更喜歡花時間在上面看書,塗鴉,享受寧靜的時光。











2016年6月19日 星期日

恐龍初接觸

我有少少內疚,因為呢個星期日係瞕瞕托兒所既畢業旅行,去大陸d農莊玩,但可惜我同老公都要返工。佢返10:00-18:00,我返15:00-22:00,冇可能去到。


為左彌補,我等瞕瞕一訓醒就問佢:「你想去邊度玩呀?今日放假去邊都得。」起碼我有一個上午的時間陪到佢嘛。


佢答:科學館。


噢,其實我本身唔太想去的,出面好熱,路途又遠,去程要轉兩次巴士,回程仲要在一個幾近無遮檔的車站(攝氏33度)等成廿分鐘。。。一想起這些,我便說「你都唔夠高,唔俾入場呀。」


點知瞕瞕很認真地諗左陣:「唔係喎,歐玥晴係全班最矮,佢都可以買飛睇恐龍;我高過佢,即係可以買飛啦。」


我擺明係呃佢架喇,但見佢咁認真地同我解釋,打動左我。


被佢的邏輯打動。


我地9:55就去到,等10:00開門,排隊買飛。買飛戈度已有隻會郁又會叫的恐龍,漿漿已經話驚唔想睇。唔係呱,咁辛苦到你先話唔想睇?!


我無奈地問佢:「咁你唔睇恐龍,想睇乜呀?」


佢話:「想睇黃色小鴨子。」



我沒好氣地答佢:「睇鴨仔都要排隊買飛呀。」事實當然唔駛,它只是一個很普通的擺設。


成功氹掂瞕瞕入恐龍展館後,佢行左幾步又話唔想睇要走。都係既,由於我地早到無乜人,直頭好似包場咁,唔似開幕戈陣人頭湧湧,唔知究竟睇緊人定恐龍,我地相反個感覺就猶如置身在史前時代的荒漠中,恐龍造型比例既逼真又巨大,眼前的暴龍張開血盤大囗,背後又有翼龍拍翼尖叫飛過,以瞕瞕矮細的身型和稚嫩的思維,唔驚至奇。


不過我依然想鼓勵瞕瞕走畢全場,始終咁難得一場來到。於是我同佢講,要走到盡頭那邊才是出口。瞕瞕聽罷,即刻以大逃亡速度,直奔向展館的另一邊出口,逃生。。。諗起仲覺得好好笑,哈哈。





雖然瞕瞕唔想睇恐龍,但科學館仍然有好多野啱佢玩,特別是那個「建築工地」,百玩不厭,臨走時仲戀戀不捨。










2016年6月9日 星期四

面試之五 Fu Luen School

學校特色


係瞕瞕而家讀緊戈間托兒所既直屬學校,位置偏遠但有校車接送。往年都可以從托兒所直升幼稚園,但因為近年出生率奇高,競爭太大,所以今年已消取保送政策,需要靠自己報名,自己考試。


考試過程


面試安排在3:00pm。這個時間瞕瞕不可能清醒,算是出師不利。再加上一個陰霾的天氣,瞕瞕明顯心情不佳。又可能谷埋對上一次考試的壓力,佢終於爆發左出黎。




我地提早到左些少,亦有提早俾我地面試,不過老公被攔截在校門外,只可由一位家長(即我)陪同進入。但我陪到課室門口就要停低,最終由瞕瞕自己一個行入課室。


成個面試過程都唔知發生乜事,雖然我係站在門外,但課室所有門窗都被紙條封上,一條罅都睇唔到,氣氛郁悶而壓抑。


一種不詳預感籠罩著我。。。果然,瞕瞕入去未夠三分鐘,就己聽到佢爆喊-___-'' 唔係話無諗過佢會喊,但佢之前in幾間都唔會咁。


因為佢喊,所以個面試就咁結束左。老公接過滿面涙痕,表情猶有餘悸的瞕瞕,顯得有點錯愕,顯然佢都無諗過瞕瞕會喊。


反正亊情已過去。我們給予的,只有安慰。


考試結果


Rejected, no waiting list


得個喊字,又無in埋家長,理所當然地考唔到。不過我地又無所謂,因為已有另一間十拿九穩,而且有人比我地更需要呢間學校。我唔會覺得,考得到愈多,愈證明我地既能力,總之,考到一間適合的已經夠,我地就會欣然接受,開開心心地準備返學。


K1面試在此告一段落。