網頁

2016年5月14日 星期六

面試之四 Secret Heart Cannosian College

學校特色


我的母校,女校。

它跟老公的公司和99的屋企相距只有五分鐘步行路程,地理位置極好,2016年首屆招收男生,所以即管俾瞕瞕試下。

「女校男生」到底是一種怎麼樣的概念?我不知道,考左先算。

面試過程

面試日子和時間皆為任君選擇,倘若跟其他學校撞期,還可以一再更改以方便自己,呢樣野佢地做得真係好好,好大方。唔似某d學校,當你提出需要更改時間的請求,佢地會以「唔尊重佢,沒有將佢放在第一志願」而拒絕,毫無商量餘地。

我當然揀左上午清醒時分面試。畢竟係第一年招收男生,男仔考生比例非常少,約為1:10。點名後我們被安排坐在操場的長椅上,等候進入露天遊樂場進行round1。

遊樂場就在我們前方正對面,而我們卻要靜坐著,邊等邊望住人地玩,這種誘惑對小朋友來說甚難抗拒,唔知係咪刻意考驗我們的。幸好一直有對瞕瞕進行「延遲滿足」的訓練,佢又無乜野,好肯等。等左一陣,等候中的15對考生家長就一齊被放行入去遊樂場玩了。

勢估唔到平時細膽的瞕瞕,竟然要玩最高的那個滑梯,而且仲玩左幾次。跟住佢又好開心地跑去另一邊,想玩一個較矮的滑梯。正當我尾隨佢走過去的時候,突然有工作人員出來,窺看瞕瞕衫袖上的姓名貼紙,mark左佢名。這可不是一個好的舉動,因為我知round1係唔計分,只會倒扣分,無被人留意到先係最好,但如果被mark名,即係扣分。

開始有點納悶,唔知做錯左乜,瞕瞕並沒有跟任何小朋友發生爭執或碰撞,也沒有任何搗蛋或鬧情緒行為。。難道係覺得我跟得太貼,過份保護??

遊樂場裡面有一個很新穎的設施 - 吊橋。我以為佢唔敢玩,點知佢學人地行左上去,但佢又論盡,行到最後一步時,腳下一滑就單腳被卡在兩塊橋板中間 -___-...我唯有抱返佢上黎,但此情此境又被再次mark了名。





好奇怪!難道玩遊戲都唔可以發生意外?只不過是小小的意外。沒有影響其他小朋友,沒有受傷,更沒有哭鬧。玩到呢度,就話時間到了要集隊。有小朋友糾纏著不願意離開,當然又係會被扣分。不過瞕瞕倒是乖巧地跟我離開。

迅速地在操場排好隊,跟著隊伍準備上樓時,瞕瞕抬頭望向高聳的大樹,和四層高的課室,他突然很高興地嚷叫:「哇,我返學喇,我讀書識字喇!」其實佢對上學這回事,總是抱著一份熱切且深厚的期待,因為佢係一個愛學習的孩子,所以佢對入學面試完全沒有抗拒。





我也希望快點有學校收你,快點迎來我們的新階段,你開學對我們來說是頭等大事呢。

round2是律動。高年級姐姐站在課室講臺上,帶領小朋友聞歌起舞。小朋友們須各自站在指定位置,家長則退下。當音樂一響起,瞕瞕並不是跟著動作做,而是秒迅尋找我的身影。很顯然,佢非常唔慣這樣的環境,佢驚到面都青晒,個樣想喊咁。小朋友是不能離開指定位置的,我只好以溫柔眼神鼓勵佢。雖然瞕瞕怕醜,但佢本身係好鍾意跳舞的(睇巧虎碟同托兒所都跳得多),佢帶著哭音請求我同佢一齊跳。於是我硬著頭皮走到佢身邊,瞕瞕便即時跟音樂動了幾下,好明顯佢真係想跳但又怯場。。。同一時間我被要求退回家長席。

當瞕瞕一發現我離開,便逃離指定位置搵我。由於之前已俾左一次機會,這次佢便被mark了名,即係又扣分,唉。

在一種複雜的心情中,音樂聲終止了,瞕瞕如釋重負舒了一口氣。當我地排隊去禮堂繼續進行round3時,佢突然同我講「下次又帶我黎跟姐姐跳舞丫」,證明佢的確鍾意跳,但考試形式對佢來說卻是心理折磨,這使我感到心酸不已。

round3在我無比熟悉的禮堂中進行,我在這裡做過中學六年的測驗卷考試卷,接過畢業證書領過奬項,出來社會工作後我也曾回到這裡演講。

偌大的禮堂set好了十幾張枱櫈,每個小朋友和家長為一組,由一位老師單獨進行面試,首先是家長被問及兩個關於教養上的問題,然後退下,輪到小朋友。由於有剛才瞕瞕怯場的經驗,所以我十分擔心佢能否獨自面對老師。

起初我和瞕瞕肩並肩地,雙雙坐在老師的對面。老師問瞕瞕是否可以跟媽咪調位,好讓她方便跟我說話。瞕瞕搖頭表示不願意,我也哄了一次但不成功,只好隨他。老師問我對學校有多理解?在看著瞕瞕成長的這三年,有甚麼感受之類的。

之後我便被要求坐到瞕瞕身後,到老師問佢。正當我慶幸瞕瞕無驚,唔怕走佬時,佢又重施故技,老師問佢幾歲,佢答人四歲。老師重覆問左佢兩次佢都話四歲,老師不可置信地翻閱報名表,嘀咕著:點會係四歲??

枱面上有兩組玩具:積木和煮飯仔。老師要瞕瞕跟住佢砌野,瞕瞕無興趣砌。正確地說,係瞕瞕無興趣「跟住砌」,其實佢平時在家好鍾意砌,字母,數字,河馬,直升機都砌到出黎。可惜呢一刻佢死都唔砌,都迫唔到佢,老師唯有放棄積木戈part,拿出一本書同瞕瞕講故事,瞕瞕能專心地聽,亦有回答老師問題。講完故事,老師又抽出三張卡片,放在枱上問瞕瞕是甚麼東西,瞕瞕答了。不過我估唔到老師會將卡片反轉蓋在枱上,問瞕瞕記唔記得張卡係乜,佢竟然答到!而我從未同佢做過類似記憶訓練。

最後,老師拿著糖果問瞕瞕想唔想食糖,我知道係考佢識唔識講多謝,但瞕瞕係一個唔胃食的小朋友,所以佢又搖頭。至此佢總共拒絕了老師三次:唔肯調位,唔跟住砌積木,唔想食糖。現場的小朋友九成係女仔,乖到無得頂,我已知道凶多吉少。

考試結果

Rejected, no waiting list

雖說這間不是我們首選,但由於投考的男生數目太少,而佢地又有意將學校轉型為男女校,所以幾乎所有男生都收晒,得瞕瞕一個被拒於門外,我承認這次對我有點打擊,和耿耿于懷。 

2016年5月5日 星期四

面試之三 Chan Sui Ki Perpetual Help College

學校特色


澳門蛇b出生率係6000幾,但聞說報考這間的便有3000人,是本澳競爭最大的學校。


為什麼它會得到眾多家長的青睞呢?因為高端教學質量,因為濃厚學習風氣,這些都不用多作解釋了。


它幼稚園行活動教學,小學行中文教學,中學行英文教學,而且是男女合校,讀得上的話,學生在學術方面會得到很好的發展。澳門沒幾間學校可以考到HKU,它是數一數二的。


最重要的是,它是入網學校,即是學費全免。


面試過程


跟面試之二的Hou Kong Middle School在同一日考試,而這間被安排在4:00pm。所以考完Hou Kong之後,即刻帶暲瞕返屋企食飯,要佢訓晏覺。


間學校離我地屋企好近,所以我地並没有早很多出發,但去到都要等左一段唔算短既時間。


等候區設置在禮堂,由整整齊齊的兩排座椅貫穿整個空間,看到這個格局,我第一眼感覺就是:紀律好嚴!


真的很擔心瞕瞕能不能規矩地坐著等,但佢又唔怕,pat pat無離座。


一組是十個小朋友,由家長牽著小朋友的手,行三層樓梯,進入課室考試。家長討論群組話,這三層樓梯也是考試要點,如有扭抱、亂跑、爭先恐後等行為,即failed。預先知道這些,都有一點壓力。


行完三層樓梯,家長便停靠在走廊盡頭,小朋友則由老師逐個領進去面試。瞕暲被叫到名字後,頭也不回地跟老師走進課屋去了。


至於課室裡面發生甚麼事,考甚麼,我是完全不知情的。同組家長中,我偶遇中學同學,閒談之間,便見到瞕瞕蹦蹦跳跳地返出來了,過程好似得幾分鐘咁短。不過見瞕瞕臉上盡是天真燦爛的笑容,我覺得無乜問題呱,起碼無喊無驚無鬧情緒先,我已感覺安慰。


回家路上我同瞕瞕講起考試內容,佢話老師問佢幾歲,佢答四歲。明明佢三歲都未夠,做乜答人四歲呢?佢話因為覺得四歲叻過三歲,係大個仔。佢仲話俾我聽,老師話佢唔乖。


我心一沈,其實未等到放榜已知結果不妙。


考試結果


Rejected,  no waiting list


就算瞕瞕表現正常,都未必收佢,更何況佢咁曳呢??錄取名額又得戈百幾個,根本無乜可能,所以我都無乜感覺了。