夏令班

正式黎講係九月先開學，而學校要我地在七月返學三個星期（夏令班），提早適應一下。

第一次見到瞕瞕穿起校服的樣子，我同老公都難以置信，我地製造出來的bb已經咁大個了。

有句話叫做「初生之犢不怕虎」，瞕瞕第一日返學係無問題架，佢被老師帶進課室坐好後，便揮揮小手向我同嫲嫲道別。

不過跟住戈幾日都有喊。甫行到課室門囗，瞕瞕已隱約感受到一種離愁別緒，突然軟癱在地，湧出兩行眼涙。我萬萬想不到佢會咁，於是抱起佢交俾老師，瞕瞕死命用腳夾住我條腰，用手緊緊箍住我條頸，老師好不容易才將佢從我身上分離開來-___-"

由於家校有一段少少距離，我開始有點擔心之後既日子唔知點算，好驚佢從訓醒那一刻，已經扭計話唔返學。果然。。。某一天我從睡夢中搖醒瞕瞕後，佢非常不情願地說：「就算我訓醒都唔會返學。」

我的心情跟外邊黑壓壓，即將要下大雨的天空一樣，欲哭無淚。我心裡輕嘆了一口氣，轉而用帶點興奮的語氣跟瞕瞕說：「落雨啦，我地著雨衣著水鞋，出去踩水氹啦！」在半推半就之間，我迅速地幫瞕瞕穿上成套裝備。

但就在出門那刻，瞕瞕「如夢初醒」，低頭看著自己的水鞋，喃喃地說：「著水鞋可以，但要返學不可以哦。。。」我避重就輕地答佢：「係呀，現在就是要出發踩水氹囉。」瞕瞕仍覺得唔對路，佢大力地扯著身上的校服，憤怒地大叫：「點解踩水氹要著校服？？剝左佢，剝左佢呀！！」

唉，煩心。。。我同瞕瞕講「係要返學，返學途中經過水氹可以踩下」佢當然唔係好接受，但佢本身很喜歡下雨天，所以我又不停地提住「落雨、擔遮、踩水氹」好不容易才哄到佢返學。

一踏進學校門口，瞕瞕委屈地對我說：「其實我好鍾意返學，我想媽咪在課室一齊陪我，唔好走呀。」聽佢咁講，我有少少心酸。我嘗試講左一段佢可能會明白的說話：「我知道媽咪走左你會唔開心，因為你覺得得返自己一個。大人返工，小朋友返學，學校有很多小朋友陪你一齊玩，會好開心架。不過你而家只係返左三日學，同佢地未熟，你再返多幾日識晒佢地，就會好開心架喇。媽咪細個都好似你咁，開頭返學會喊架，但係返多幾日識左新朋友，可以一齊玩，就唔喊了。你以前剛剛返托兒所的時候，都唔識d小朋友，返多幾日就識，係咪？俾d信心同自己啦，你一定得架，放學時我會黎接你，我幾時有呃過你。。。」

講完呢番說話，瞕瞕情緒好似好左少少，哭喪著臉走向自己所屬的座位，心不在焉地把弄枱面上的玩具，雖然佢係一臉不高興，但起碼佢沒有失控，也沒有扯著嗓門大聲喊「我要媽咪」，看情況佢已冷靜下來，並慢慢接受著，消化著。

就是這樣，每天的一點點進步，直至返學的第五天，佢已沒有抵觸的情緒，在走廊轉角處，佢大聲地向著課室大叫「老師早晨！」睇住佢瘦小的身影，獨自走進課室，嘗試自己掛好書包在椅子後，雖然笨手笨腳，但我卻覺得很感動。作為母親。。。你懂的。

返學的第二個星期，一切駕輕就熟。瞕瞕每天輕鬆地步進課室，動作俐落地掛好書包，就急不及待地玩d玩具，仲熱情地拎去俾老師睇，去分享。。。連我在門口叫佢，同佢say bye bye, 佢都置若罔聞。這不禁令我回想起一個星期前既佢，係咁同我糾纏「嗚嗚，媽咪唔好走，唔好唔要我～」而家判若兩人，都唔知係邊個唔要邊個呢，哈哈。