網頁

2016年10月19日 星期三

原來你是高敏兒

在不知道有高敏兒這個標籤之前,大家都只會覺得瞕瞕是個歇斯底里的孩子,帶給我地不少困擾。曾跟很多人談論過關於瞕瞕的「狀況」,多數都會認為是我地教養不當的結果,及後接觸到<孩子,你的敏感我都懂>這本書,開始對佢多了一份理解與包容。





甚麼是高敏兒?請先看以下這份問卷:



1. 容易受到驚嚇。
2. 抱怨衣服粗糙扎人,襪子縫線不舒服,衣領標籤磨得皮膚癢。
3. 一般而言,不喜歡大的意外驚喜。
4. 用溫柔的勸說比嚴厲的處罰有效。
5. 好像可以讀我的心。
6. 語言能力較同齡小孩成熟,會使用超齡的詞彙。
7. 會注意到最微小的不尋常味道。
8. 幽默機智。
9. 直覺強。
10. 經過興奮的一天後,難以入睡。
11. 遇到重大改變有適應困難的問題。
12. 如果衣服濕了或弄髒了就想要換衣服。
13. 有問不完的問題。
14. 是完美主義者。
15. 會注意到別人的不開心。
16. 喜歡安靜的玩耍。
17. 問深刻而需要思考的問題。
18. 對痛苦非常敏感。
19. 在吵雜的環境中會顯得焦躁不安。
20. 會注意到細節(例如你動過家裡的擺設或是換了髮型)。
21. 爬高之前會先考慮安全。
22. 沒有陌生人在場的時候表現得比較好。
23. 對事情有深刻的感受。


如果你家中的小孩中了十三個或以上選項,佢大概就係一個高敏兒了。瞕瞕更是二十三個選項全中,佢係高敏兒之中的高敏兒,完全唔駛懷疑。






其實係又點,唔係又點?

教養方式不同啊!
















瞕瞕的高敏特質往往會會令人誤解,而這些誤解的形容詞也比較傾向負面,例如:膽小,退縮,自私,自我,挑剔,麻煩,依賴,痴身,多愁善感,頑固,不合群,老積。。。所以作為父母的我們,要全力開解佢和幫助佢成長。可能人地教仔係唔俾佢掂呢樣又唔可以搞戈樣,但在於我地而言,反而成日都鼓勵瞕瞕自由地趟開心扉去多作嘗試。





早在嬰兒時期已見端倪,瞕瞕是一個從未試過碌落床的bb,單是這點就很詭異。我觀察過很多次,佢爬到床邊就會向下伸手探究離地高度,再退回來;佢一點也不喜歡發光發聲的Fisher-Price玩具,永遠要求把開關關上,家裡總是靜悄悄的;佢很遲才學識行,但一行就行得很穩,未栽過筋斗,佢係一個好穩陣的人,凡事有十足把握才會做,不作冒險嘗試,性格不衝動;屋企有任何變動都會留意得到,大至換左一個洗衣機防塵罩,小至貼多左一個4cm x 4cm的磁石貼在雪櫃上,佢都能馬上從原有的20多個磁石貼中一眼辨認出來;佢十分喜歡看書和沉思,有家長因此問過我,你仔是否只會看書不愛玩?當然不是啦!佢有很多心愛的小零件,整天在把弄它們,難道這不叫玩?佢只係唔鍾意熱鬧地玩,即係扮超人從梳化跳落黎戈種姐,也不是揮刀舞劍那類典型淘氣男孩。






隨著瞕瞕漸長,語言表達能力與日俱增,佢某部份的高敏特質更趨明顯,特別是從五官而來的實體感覺,例如會抱怨隻襪裡面有條線梗住佢,或者不安於一d我根本聞唔到的氣味,隔好遠都話feel到人地燒街衣既熱度等等。佢的感官總不會突然間變成這般「靈敏」的吧?這些感覺對佢來說應該一直都存在,直到而家識講既野多左,先可以同我們分享到佢個人的感覺。同一時間,亦因為佢的理解能力強左,我地可以同佢解釋到這眾多疑惑感覺的來源,從而緩和到佢最初歇斯底里的情緒。一個很簡單又很深刻的事例,瞕瞕bb時很怕洗衣機既乾衣程序,我唔知其他bb會唔會有感覺,但對瞕瞕就好似地震和世界末日咁,佢會悟著耳朵高聲尖叫,懇求我地抱佢遠離那個危險的怪物。。。當佢識講野之後,佢會哭喪著臉話唔鍾意洗衣機隆隆聲,好驚,而我們又可以講返乾衣程序係一回咩事。經驗話俾我地知,只要我地耐心地,用佢能理解的方式去跟佢溝通,佢係可以接受的。如果直接同佢講「乾衣就係咁,唔明你有乜好驚,點解你咁細膽」係幫佢唔到之餘,仲將佢推向深淵。















高敏兒很容易情緒激動,我試過同朋友講「很小的刺激,對佢地來說已是很大的刺激」點知個朋友將這句話詮釋成為「很小的刺激,對高敏兒來說已是很大的滿足,你就好啦,個仔咁易湊。」如果係有咁簡單就好咯,這種刺激對高敏兒來說又不是enjoy -___-...就好似瞕瞕抗拒離心力,一般遊樂場的設施,滑梯,鞦韆,氹氹轉,佢都幾乎不玩,但在地上撿到一塊樹葉,佢倒是很感興趣,會細緻地研究上面的葉脈。外人眼中佢好奇怪,好唔合群,但我個仔一直都係咁,無乜點變,佢唔熱衷玩呢d,變相體育發展弱左,又要另外諗方法幫幫佢。





高敏特質並非負面性格,正正由於這些特質,高敏兒通常有很深的同理心,能體察他人又願意貢獻,再因為佢地關注細微的事情和擅長回憶,在學習上也有優勢。最終發揮如何,還需看配合怎樣的父母和教養方式。我會珍重瞕瞕的特質,佢在我心目中始終獨一無二。





16 則留言:

  1. 真是寫得夠詳細、清晰,有高敏孩子的一看就明。希望更多人了解HSC,不要再誤解他們。

    回覆刪除
    回覆
    1. 呢篇文我放在草稿箱已久,等待時日見証才把它完成。早在瞕瞕兩歲前我已懷疑佢係高敏兒,但當時佢仲未係好識表達自己,對於那些「抱怨衣服扎人」「強烈感官傳來的感覺」等項目尚有保留,直至佢真講到出來,咁我就確信無疑了。
      再加上我地而家有睇書,可以知道佢對書中人物會產生同理心,甚至為小動物代言。。。全部癥狀中晒。
      至於人地誤解,始終都是在所難免的。

      刪除
    2. HSC可以說是高風險高回報產品。

      刪除
    3. 是的,每個困境背後,都隱藏著人生的神秘禮物

      刪除
  2. 唔睇c琪blog都唔知有依個term,你好犀利,咁細個就開始留意到瞕瞕嘅特質。不過學你話齋,知道佢有依個特質,因材施教,一定可以幫到佢。

    回覆刪除
    回覆
    1. 如果不是在養育瞕瞕遇到困難,我不會去探索,也不會深刻反思自己的成長歷程和思維模式。現在,我的生命在走向開闊,這是我個仔帶來的改變:)

      刪除
  3. 媽媽你好細心,可以留意到咁多野,瞕瞕雖是高敏兒,好彩有你依個媽媽在旁引導幫佢!

    回覆刪除
    回覆
    1. 其實高敏兒很難搞的,不可能留意不到,只是有的會把它跟「感統障礙」搞錯,然後愈搞愈錯。

      刪除
  4. 其實每個小朋友都係獨特的, 我覺得事情有正反兩面睇, 視乎抱住咩心態去看事物:D
    C琪你一都好細心去觀察到瞕瞕既發展, 所以即使係高敏兒定唔係, 佢都一定可以活得平衡快樂:)

    回覆刪除
    回覆
    1. 謝謝Little K媽媽,我的原則就係要瞕瞕快樂地成長。高敏兒某程度上係完美主義者,唔係咁易滿意。所以我會教佢追求卓越,自己同自己比,只求今天的你比昨天的你有進步,便行。

      刪除
  5. 暲暲有你呢個媽媽真係好幸福,相信你一定可以令佢成為一個快樂嘅高敏兒

    回覆刪除
  6. 謝謝你的分享,且你對章章觀察得得細膩,要向你好好學習,同埋有positive power.我正開始有時討厭這樣的女兒,但你最後一句提醒了我

    回覆刪除
    回覆
    1. 我地係戰友啊!要一直彼此扶持下去

      刪除
  7. 我仔仔都有哩個情況 令我好困擾

    回覆刪除
  8. 我女女都係,情況同你所講完全一樣,而家大d,開始返學,總會有d人批評小朋友不合群,內向,甚至乎是自閉,做媽的由小到大捱過幾多擔心,用過幾多心機別的媽會知嗎?不是每個小朋友都係中意玩到癲咁架~我的小孩就是這樣,為何要逼佢變成大眾眼中的乖寶寶,但另一方面如你所講,去公園佢地係緊張多過開心,但變相體能方面就落後,喜歡別人不在乎不察覺的東西使他們變得不合群,甚至乎有點影響社交,心痛的我們就只能找別的方法幫幫他們,但并不是每個人都可以理解,我正在困擾是否要將女兒硬逼成別人心目中的形象,還是保留她的原色,幸好看到你的文章,心中有答案了,高敏兒媽媽還是再努力點用心點吧!

    回覆刪除