產後房同產房最大的分別，是這裡中央有一個育嬰室。當我甫被推進產後房的一刻，便聽見一陣陣此起彼落的大合奏。助理感嘆地對我說：幾多小生命，你聽下~
後來我才知道，這幾天遇著嬰兒出生的高峰日子。正常來說生產後2小時會留在產房觀察，然後轉落產後房，但因為產後房床位爆晒，遲我少少的那批產婦等左足足7個鐘先轉到去產後房，就連bb點心車都唔夠用，唔單止母嬰同室，仲要母嬰同床添呀，慘慘。。。
老公被通知 "你太太生左，你可以攞個走佬袋黎俾佢" 的時候是清晨5點幾，由於是非探病時間，佢只能在我身邊停留15分鐘，同埋望左bb一眼，就被保安趕走左嘞。離開戈時當然係依依不捨啦，這短短的半個夜晚，我同佢既身份都分別變左爸爸媽媽，實在有太多既野要傾訴。不過我可以趁呢段時間休息下，好快到中午佢又可以來探我了。
我攞返部手機之後，第一時間上facebook宣佈喜訊，竟收到200多條讚好，畢竟身邊好多人都陪我期待左成10個月。
7點幾，助理入房叫醒我地出canteen食早餐，但佢見我手臂仲吊住葡萄糖液，知我啱啱生完行唔開，就話一陣攞入來給我食。我的早餐是1碗河粉，1碗麥皮，1杯牛奶。唔知點解，碗河粉個樣都幾正，可惜超咸超難食，一啖都食唔落。
我住的是三等房，床號是近住門口戈張，姑娘問我地3個餵唔餵人奶，如果餵就抱bb俾我地。我諗都無諗過就話餵，雖然我仲未想像到乳汁是怎樣分泌的，但只要你願意，聽講姑娘都會好有心機教你同幫你。同一時間，姑娘又囑咐我，順產後4-6小時內一定要有第一次小便，當感到便意便叫人扶我去廁所，千萬不可自行下床。
因為食左碗麥皮同飲左杯奶既關係，其實都好快覺得急，於是便禁鐘。個助理機械式地問我d網褲，衛生巾同拖鞋放在哪裡，她幫我攞齊晒之後，便告訴我怎樣除低條成人紙尿片改穿上網褲，和用甚麼姿勢下床。可是我一移動身軀，下身便傳來撕裂般的痛楚，聽覺麻木了，加上她說話是一輪嘴的，我根本來不及接收，所有的動作戞然停止，只管坐在床邊冒冷汗。冷不防地她出口這一句：真係唔知係咪個個生完都會變蠢架。。。我心中非常委屈，感到極度不是味兒。她好像很不耐煩地陪我去完廁所，我忍唔住望左一下個馬桶，好似一缸血，突然之間覺得好虛弱，暈暈地。
我一返到床上躺下，姑娘已經抱左個b準備俾我餵佢，佢地做野既效率真係無得頂！姑娘教我打側身訓，又將bb打側身面向住我，捲起條毛巾攝住佢背脊仔，等佢唔好碌來碌去。然後她捏住我的乳頭，一下就塞進bb咀裡。當我與bb的身體銜接的瞬間，不痛又不癢，頓覺生命是如此奇妙。原以為bb離開左我的4個鐘，會忘記了怎麼吸吮要重新學習，但看來尋乳反應真的是嬰兒本能。這個時候我一滴乳汁分泌也沒有，不過我知道剛開始都是這樣的，bb起勁地吸著只是為了滿足口慾，而非真正有食慾上的需求。姑娘睇左個情況，便轉身在我個bb紀錄表上勾左"有效吸吮"和"母親需要協助"兩項，便又去教隔離床個產婦了。其實佢地真係好多野做，無得停咁。
現在我才能看清楚自已的兒子，五官細緻，頭髮稀稀疏疏的覆蓋了一層，好小好小的一個人兒，讓人怪憐惜的。唯一安慰就是他吸吮得很有力，我留意到他每吸吮五下便停頓五下，都幾有規律咁。
餵左大概25分鐘，bb便停止了吸吮，我諗佢都應該累啦。此時又有一堆人匆匆地走進來，原來是鬼佬醫生+實習醫生+姑娘要巡房。姑娘叫我除低一邊褲管，讓醫生檢查傷口，我驚慌地說不是要內診吧？因為生完之後傷口超痛呀！真係唔想再俾人掂囉。幸好只是觀察而已。鬼佬醫生話我傷口幾腫，需要食消腫藥，另外佢仲開左枝痔瘡膏給我，戈刻我仲未意識到自已痔瘡有幾嚴重，後來就知慘了。
踏正中午12點，助理又叫我地出去食飯。望住碟飯我食得好少好少，我而家無陀住bb戈陣時咁食得了，諗返起自已肥左37磅，但生個bb只得6磅，我唔介意自已肥左多少，但吸收既營養好似去唔到bb度，真的有些少失望，可能咁樣亦都影響左我既胃口，再加上傷口超痛，我勉強食左15分鐘便急急腳返房了。
終於到左探病時間（1pm - 4pm），99率先獨自上來探我，仲帶左木瓜瘦肉湯上來給我。其實她並不是很想我餵人奶，因為她成日驚我咁瘦弱，懷欵造唔造到足夠奶水架？但由於見我決心咁做，所以唯有積極煲d上奶湯水，佢都唔希望餓親自己個孫既。關於這一點，我是十分感激的。在邊談邊睇bb既期間，老公都放左工上黎啦，還有姑婆，丈公都親自過來探望，給了bb利是，祝佢快高長大，又為我買來補身的雞精。
探病時間過後，所有人潮退去，產後房又回復一片平靜。相比起另一間醫院，其實我喜歡這裡較短的探病時間。在我所屬的床位，得返我同bb兩個獨處，除左食飯同沖涼可以將bb推返育嬰室，其餘都是自己照顧bb。所謂的照顧係要做d乜？餵奶、掃風、換片片？看著這個人仔陌生的臉兒，不禁有點茫然。說真的，以前我從未抱過人地的初生bb，太細個嘞掂都唔敢掂。但對著自已的孩子，就係有一種本能要攬緊佢，所以很快地我就學會了抱bb。
突然間bb哭叫起來，我再一次將乳頭塞進他的咀裡，他安靜地吃著，直至他停止了動作才將他放回點心車，自已也趕緊歇息一會。但我剛閉上眼睛不久，便又聽到一陣哭叫聲。我看了看手錶只是隔了半小時，不知道bb今次又有d咩訴求呢？？我嘗試解開佢條片檢查下，一看不得了。一大片墨綠色的，又黏又稠的漿狀物體幾乎要從條片湧出來。即使我讀過陪月課程，知道那是胎糞，又實習過換片，但那一刻依然不懂怎麼處理。手忙腳亂的我搞到床墊，bb的衣物，還有我雙手都沾滿了胎糞。幸好這時有一個十分好人的助理從我身後經過，見狀馬上幫忙。她問我是不是第一次幫bb換片，我囁嚅答是的。她問我為甚麼不找她們幫忙呢？我無諗過咁好可以搵人幫手，以為唔會有人理我，所以一時之間都唔知點答佢。她向我介紹了她自已，又跟我閒聊生產時的情況以及湊bb心情，她真誠地說有甚麼事請儘管找她幫忙，使我大大地鬆了一口氣。
不一會，輪到隔離床個bb嚎哭不止，原來又係賴左屎片。個媽咪舉步維艱地(因為開刀生)行到我張床，問我頭先抹pat pat的濕棉花片哪裡有提供，以及是否有人會幫下手換片，我叫佢去育嬰室問下。但見佢死死氣地行返黎，話d姑娘得知佢係第二胎，叫佢自己搞掂。真係同人唔同命。。。不過如果係我，相信亦唔敢麻煩d姑娘。
晚間探病時間（6pm - 8pm），細佬同姑9上黎探我，咁啱我行開左食飯，食完返到去見佢地到處搵緊我。我地三個仲一齊企0係育嬰室的落地玻璃前，研究人地的bb。細佬同姑9分別有個2歲半同3歲半既仔，剛剛經歷過為人父母之路，佢地都話而家睇返d咁細個既bb，真有一種說不出的感受。
姑娘話過左9點鐘就可以將bb推返入育嬰房交俾佢地照顧，我地自己去沖涼，訓教，點都得。如果要餵人奶的話，佢地會在凌晨12點，3點，6點叫醒我起身去育嬰房。而家係唔會再將bb抱去你床，因為驚無人睇住會發生意外喎。至於夜嗎嗎，捱住眼訓在育嬰房餵奶的經驗，將會在下一篇blog度分享。
- 留言者: 檸檬BB女
- Email: joyce81580@yahoo.com.hk
- 網址:
- 日期: 2013-06-10 15:59:21
[版主回覆06/10/2013 21:14:26]多謝! 我會盡力ga la
- 留言者: 黎生黎太
- Email: py_chung1030@yahoo.com.hk
- 網址:
- 日期: 2013-06-05 00:26:58
[版主回覆06/05/2013 11:45:14]HA, 咁快就睇到似我? 係lu...99.999%既人都係咁講
我地公立醫院以前會抱出黎給媽媽餵, 但年前試過發生意外, 所以而家一律要自行到哺乳室
沒有留言:
張貼留言