生病中的開竅

誰在生病中開竅？當然不是我啦，雖說入托初期會成日病，應該要睇開d，但瞕瞕是我身上掉下來的一塊肉，不論何時，他生病了我一樣會肉痛的。

開竅的是瞕瞕，近來看醫生的次數多了，有時輪候的時間頗長，在這個特殊的環境中，我更能觀察到他的一舉一動，我能明顯地覺得他長大了，懂性了。

新落成的山頂兒科急診大樓很空曠，很明亮。在這裡，瞕瞕更是首次主動鬆開我隻手，自己走來走去。我還一度擔心瞕瞕唔識行，但現在看來，他的機能一點兒問題也沒有，純粹是出於他的意願而已。

輪到瞕瞕見醫生，他不但挺配合醫生的檢查，他還竪起耳朵仔細聽隔壁診室的哭鬧聲，然後悄悄對我說：「媽咪，bb喊哦。」

那一刻，我感到極度驚訝！除了他突然說出一個句子之外，他竟然不會被其他小朋友的哭聲嚇怕而喊埋一份，甚至仲細心地留意周遭的環境，我感到十分不可思議。這可會是一種早熟的表現？

其實瞕瞕無乜大礙，都係不停打噴嚏，流鼻水，有幾聲咳。每次他打噴嚏的時候，我都忍唔住笑他：「以~」然後他就很不好意思地說：「乞痴呀。」我又問他點咳，他扮咳了幾聲。他應該明白生病是一回怎樣的事。

帶他回到家後，嫲嫲問他：「點呀，醫生話邊度唔舒服呀？」怎料他答嫲嫲：「燒呀。」實情佢沒有發燒，不過佢可能聽我地講得多，便以為所有唔舒服都係發燒。

我用了汪培珽老師「跟小孩講大道理」的方法，所以餵瞕瞕食藥沒難度。

我耐心地跟他解釋生病，看醫生和吃藥的道理：而家呢，有細菌入侵左瞕瞕身體喎，同瞕瞕身體裡面的小天使打緊仗，但係細菌太厲害，小天使唔夠打，打敗仗，因此就病倒了，病左就會唔舒服，打乞痴，咳咳，好唔舒服好唔舒服。。。咁點算好？我地要去搵救兵，醫生就係救兵嘞，佢會幫你檢查身體d細菌匿埋喺邊，醫生用聽筒一聽就知架，一望你喉嚨都知，你要乖乖配合佢，知道嘛？小天使打扙打左咁耐，都累了，也要吃飯了，但佢地唔係食你平時戈d飯喎，而係要食醫生開既藥，好特別架d藥，專門俾小天使食，一食就可以恢復體力，跟住就打贏仗，yeah，咁就好返了！

佢似懂非懂地聽我講完呢d道理，轉頭果然又肯順攤地飲晒d藥。

講真，我99都服了我，如果唔係親身經歷過，佢都幾難相信小朋友肯食藥，佢一直以為餵藥是要強行來的，要㚒手夾腳，要鍊住個鼻，要強行灌佢-____-＂

配合聞蒸氣的效果也是很好的。我在瞕瞕面前組裝了吸管和面罩，引發起他的好奇心，然後我對著面罩，誇張地深呼吸一口氣，讚嘆地說「哇，好清新的空氣啊~」引到瞕瞕都躍躍欲試。相比起以前瞕瞕細個時，一聽到部機的摩打聲，便喊到劏豬咁，而家自動自覺聞蒸氣，老公也認為太神奇了。

我地一家人都十分願意跟瞕瞕講道理，愈講得多，佢似乎也愈是懂性。