瞕瞕19個月大

每個月的14號，就是瞕瞕又長大了一個月的日子。一歲之後既幼兒，身體方面既成長會放緩腳步，即係話，之前本身生得細粒，依段時間亦唔會特飛猛進。下一次的猛長期機會，分別會在升上小學和中學的時候。

瞕瞕而家重11kg，高83cm，唔算太失禮，不過有個問題，就是前囟門尚未完全閉合，兩個月後要繼續返去保健醫生度複診。

 

1）進食

乖左，20分鐘內可以規矩地食晒一碗飯，不需要玩具，只需要一張紙巾，瞕瞕由頭到尾就係揸住張紙巾，抺走跌出黎的飯粒。

早晚飲8安奶奶，依然用奶樽，因為瞕瞕要訓喺張床度嘆奶，如果用杯，貪玩的他，有危機倒瀉到成張床都係。

每天進食三份水果。瞕瞕鍾意食蘋果，香蕉，雪梨，橙，藍莓。蘋果和雪梨都會搞蓉，其他切成一粒粒俾佢食。

自從迴避了導致過敏的食物，eg. 雞蛋，深海魚，皮膚紅疹問題消失了。

2）睡覺

8pm捉佢上床，7am起身。自從識講野，開始多事幹，一陣又話要起身玩，一陣又問媽咪daddy嫲嫲去左邊，一陣又話你知張床單有花花/星星圖案。。。直至問到自己累了，便自言自語地說「黑嗎嗎，我要訓覺」說完便轉身睡去。

日間會在托兒所午睡兩小時。

3）Potty training

已成功戒屎片兩個月。尿片未打算幫佢戒，起碼過左依個冬天先，除非佢自己識表達。

4）大肌肉（體能動作）

來去自如，步履自然，曾經擔心過的外八字腳問題，最終在行穩後自行調整好。識徒手蹲下，企返起身，倒後行，轉圈。

但就未識扶住行樓梯同跨過障礙物，可能我地少俾機會佢，讓我想想可以點樣訓練。

5）小肌肉（精細動作）

擰樽蓋，擰藥膏蓋，串珠仔，疊積木，拉鏈，除鞋除襪都ok，甚至識啪我部iPhone旁邊的靜音鍵，玩貼紙唔怕黐來黐去甩唔到手整爛晒，手指都幾靈活，用匙羹筆野食的能力也在進步中。

6）認知

特別喜愛玩配對遊戲，即係手抓板，入形狀戈d，雖然某些形狀較難的佢會塞唔到入去，但起碼會放在相同圖案上。

認顏色亦然，雖說不出是甚麼顏色，但會將相同顏色group埋一齊。

對生活日用品的用途瞭如指掌，除了電話用來聽，梳用來梳頭等，也知道了耳溫槍用來探耳仔，打開雨傘是因為「落雨」。我只係在佢面前用過一次個gip，自此佢就成日走埋去，拍個gip，話「箱箱，開左佢」，又學我轉個密碼鎖，一邊轉，一邊喃喃自語「轉轉，1234，123。。」佢鬼咁認真個樣真係超搞笑。

對數字明顯感興趣過英文字母，呢樣留返下次開blog再講。

7）語言

能表達自己的需要和感受。例如「我要食飯/訓覺/痾屎/坐車/去街。。。」「怕怕/嚇死我/痛痛/辣辣。。。」辣辣是因為佢之前係咁搞個暖爐，便用苦肉計辣佢隻手仔，警惕下佢。

努力地描述眼前所見的一切，組織句子的能力令人驚喜。在最近的一個星期天，帶了瞕瞕去公園玩，佢見到有個妹妹仔吹緊肥皂泡，泡泡隨風飄起，在陽光下閃閃生輝。瞕瞕用六個字去形容這個景象「有風喎，波波飛」

佢歡快地走來走去，見到個阿姨拿著水喉噴花，好奇地停下來觀察，指住話「噴水，噴花花」

簡單對答如流，等待你問我很多個為甚麼，期待與你談天說地的一天。

8）情感

學其他blog友咁，首次增加「情感發展」一part。

瞕瞕而家成日撻人地人朵，如果我鬧佢，佢會喊住搵daddy，如果daddy鬧佢，佢又會搵媽咪的了，佢暗想有人幫佢撐腰。

喜歡被讚賞和被禮貌對待。一讚佢，積極度就會加強N倍，學習能力也迅速提升。

瞕瞕肯分享零食給我們時，我們會非常開心地說「多謝你」，當瞕瞕幫手做d野時（例如丟垃圾，遞野），我們也會由衷地說「唔該晒你呀瞕瞕~你真係好幫得手」。由於瞕瞕吸收了這種愉快感受，所以佢都會自覺地說「多謝你」和「唔該晒」^^

我地成日問瞕瞕「你錫唔錫我呀？」佢之前會爽快地答「錫~」而家佢會撲過來，用小手捧著你的臉龐，深情地給你送上一吻，直接用行動去表達他的愛意。