這世界真的有鬼

而家瞕瞕每晚都會醒一，兩次，但我又唔算辛苦，因為我只是扯高件衫，佢就識得自己碌過黎。我唔知咁樣算唔算要飲夜奶，有時佢只係啜十零下又訓著左，咁就一覺天光了。

但有一晚半夜唔知做咩，瞕瞕食左幾啖奶奶就飛開我0係度喊，為免佢嘈醒晒全家人，乃至大廈鄰居，即使多累我也勉強振作起身，打棟抱佢氹下佢。

其實瞕瞕已經識分日與夜，夜晚黑嗎嗎，靜英英，佢好少會咁，我覺得很奇怪。最奇怪的事發生了，抱下抱下佢突然0係度笑，卡卡聲。我仲以為佢扭計得逞笑出聲，但突然佢抬起頭望向我身後的天花板，哇的一聲哭了出來，令我嚇了一跳。跟住佢又變臉0係度笑，再跟住又喊。。。甚至EE Wu Wu講bb話，個情形就好似我背後有另一個人在扮鬼臉，逗佢笑，又整喊佢咁。頓時我覺得全身的血液好像凝固了，完全唔敢望我身後有咩。

我只懂緊緊攬住自己的兒子，心跳仍加速。然後唔知過左幾耐，直至感覺到瞕瞕個頭跌左落我膊頭度，我便知佢重新入睡了。我將佢放返在床上，我也迷迷糊糊地睡著了。

這令我回想起從醫院接瞕瞕回家的第一天晚上，剛生產完我躺在大床上休息，沒有戴隱形眼鏡也沒戴眼鏡，視線非常模糊。我看到一團小小的灰影在bb床床欄上移動，湊近一看，原來是一隻灰色的飛蛾。以我的科學常識，飛蛾多在秋天出没，而且盤繞在燈光之下。但當時正值盛夏，加上bb床那邊那麼暗，不知道為何會有飛蛾。

因為我怕昆虫太接近bb不衛生，所以我揚手想把牠趕走。牠飛起來，在瞕瞕頭上轉了三個圈便消失了。

隔天我告知老公此事，他說：是爺爺回來看孫孫。

99也說，如果爺爺仍在生，他一定非常疼瞕瞕。雖然我未見過我老爺，但所有人都說瞕瞕和爺爺長得很像。她說他以後還會找機會回來看他的。